Eze 40 | TyvTUV | STEP | Туттуруушкунга таварышканывыстың чээрби бешки чылының эгезинде, бир айның онда, найысылалывысты үреп бусканындан бээр он дөрт чыл эрткенде – ол хүн Дээрги-Чаяакчының холу мени катап база башкарып эгелээш , Иерусалимче аппарган.

‏ Ezekiel 40

Бурганның чаа өргээзи

(3 Хаан. 6:1-38; 2 Чыл. 3:1-17)

1 Туттуруушкунга таварышканывыстың чээрби бешки чылының эгезинде, бир айның онда, найысылалывысты үреп бусканындан бээр ^a он дөрт чыл эрткенде – ол хүн Дээрги-Чаяакчының холу мени катап база башкарып эгелээш ^b, Иерусалимче аппарган. 2 Бурган Бодунуң чоруткан көстүүшкүннеринге ^c мени израиль черже аппаргаш, дыка бедик даг кырынга тургузуп каан ^d. Дагның мурнуу чүкче көрүнген талазында хоорай-даа ышкаш тудуглар көстүп турган. 3 Бурган мени ынаар эккелди. Көөрүмге, хүлер дег кылаңнааш ^e кижи тур. Ол кижи хемчээшкин кылыр лён хендир ^f биле хемчээр мерге тудуп алган ^g, хаалга чанында турду. 4 Ол кижи меңээ: «Кижи амытан, карааң-биле көрүп, кулааң-биле дыңна. Сеңээ көргүзер бүгү чүвемче кичээнгейден сал ^h, чүге дээрге сени бээр ол дээш эккелген болгай. Көрген бүгү чүвеңни израиль чонга чугаалап бээр сен» – дээн.

Даштыкы хананың чөөн талазында хаалга

5 Бурганның өргээзин долгандыр туткан хана көрүп кагдым ⁱ. Демги кижиниң холунда хемчээр даянгыыштың узуну алды кыры дурту болду. (Мында анаа кыры дуртунга дөрт илиг немеп каан хемчээлди – узун кыры дуртун ажыглап турар.) ^{▼▼ Анаа кыры дурту чээрби дөрт илигге деңнежир, а узун кыры дурту чээрби сес илигге азы бежен ийи хире сантиметрге деңнежир (Иез. 43:13 көр).} Ол кижи хананы хемчээрге, чоону бир хемчээр даянгыыш дурту, а бедии база бир даянгыыш дурту болган.

6 Оон демги кижи чөөн чүкче көрүнген хаалгаже баргаш ^k, тепкииштерлиг чадалап ынаар үнгеш, ооң бир талазында эргинни хемчээрге, дооразы бир даянгыыш дурту, а өске талазында эргинниң дооразын хемчээрге, база бир даянгыыш дурту болган. 7 Хаалганың өдүүнүң иштинде таңныылдар өрээлдерин хемчээрге, кайызының-даа узуну бир даянгыыш дурту, дооразы база бир даянгыыш дурту; а өрээлдер аразы беш кыры дурту болган. 8 Хаалганың серилиг чери өргээже көрүнген турган. Ону хемчээрге, дооразы бир даянгыыш дурту болган. 9 Хаалганың серилиг черин хемчээрге, ниити дооразы сес кыры дурту. (Ооң чаактарының чоону ийи кыры дурту болган). Ол серилиг чер Бурганның өргээзинче көрүнген турган.

10 Чөөн чүкче көрүнген хаалганың өдүүнүң бир талазында үш, өске талазында база үш таңныылдар өрээли турган; олар шуптузу чаңгыс хемчээлдиг болгаш оларның бир-даа, өске-даа талазында чаактары база дөмей хемчээлдиг болган. 11 Хаалганың кирер черин хемчээрге, дооразы он кыры дурту, а узуну он үш кыры дурту болган. 12 Таңныылдар өрээлдериниң кайызының-даа мурнунда бедии бир кыры дурту моондак ханажыгаш турган. А өрээлдерниң боттарын кайы-даа талазындан хемчээрге, алды кыры дурту хемчээлдиг болган. 13 Бир талада өрээлдиң дээвииринден өске талада өрээлдиң дээвииринге чедир хаалганың дооразын хемчээрге, чээрби беш кыры дурту болган. Бир өрээлдиң эжии өске өрээлдиң эжииниң дужунга турган. 14 Хаалганың чаактарын хемчээрге, алдан кыры дурту болган. Шөлдүң бүгү талаларында хаалганың чаактары ындыг турган. 15 Хаалгаже кирер черниң мурнуу талазындан эгелээш, серилиг черниң ындыы кыдыынга чедир хемчээл бежен кыры дурту болган. 16 Таңныылдар өрээлдериниң даштыкы ханазында, оларның аразында ханаларда болгаш серилиг черниң бодунуң бүгү талаларында хана-каракталчак соңгалар турган ^l. Хаалганың чаактарында пальма ыяш дүрзүлери оюп, каастап каан болган ^m.

Өргээниң даштыкы шөлү

17 Хемчээкчи кижи мени өргээниң даштыкы шөлүнче эккелди. Шөлдү долгандыр даш бедиктээш база ооң кырында турар үжен өрээл бар болду ⁿ. 18 Бедиктээш бүгү хаалгаларга чыпшыр турар, ооң дооразы хаалга бүрүзүнүң узуну-биле деңнежир болду. Ол дээрге адаккы бедиктээш-тир. 19 Даштыкы хаалга биле иштики хаалга аразын хемчээрге, чүс кыры дурту болган. Чөөн-даа, соңгу-даа талада хаалгалар аразы ындыг хемчээлдиг турган.

Соңгу, мурнуу чүкче көрүнген хаалгалар

20 Ол кижи даштыкы шөлдүң соңгу чүкче көрүнген хаалгазының узунун болгаш дооразын хемчээди. 21 Хаалганың өдүүнүң бир талазында үш, өске талазында – база үш таңныылдар өрээли турган, оларның чаактары болгаш серилиг чери баштайгы хаалганыы дег хемчээлдиг болган: узуну бежен кыры дурту, а дооразы чээрби беш кыры дурту. 22 Ол хаалганың соңгалары, серилиг чери болгаш пальмалар дүрзүлери чөөн талада баштайгы хаалганыы дег болган. Ынаар чеди тепкииштиг чада үнген, а ооң серилиг чери иштики талазында турган. 23 Соңгу талада хаалганың дужунда, чөөн талада хаалганың дужунда дег, иштики шөлче кирер хаалга турган. Даштыкы хаалга биле иштики хаалга аразын хемчээрге, чүс кыры дурту болган.

24 Оон хемчээкчи кижи мени мурнуу талаже аппаарга, ынаар углай көрүнген хаалганы көрүп кагдым. Хаалганың чаактары биле серилиг черни хемчээрге, өске хаалгаларныы ышкаш хемчээлдиг болду. 25 Хаалга-даа, серилиг чер-даа, өске хаалгаларда дег, долгандыр турар соңгаларлыг болду. Хаалганың узуну – бежен кыры дурту, а дооразы – чээрби беш кыры дурту. 26 Ынаар үнер чада чеди тепкииштиг, а ооң серилиг чери иштики талазында турган. Хаалганың чаактарының кайы-даа талазын пальма дүрзүлери каастаан. 27 Иштики шөлдүң мурнуу чүкче көрүнген талазында база хаалга бар чорду. Даштыкы хаалга биле иштики хаалга аразын хемчээрге, чүс кыры дурту болган.

Иштики хаалгалар

28 Хемчээкчи кижи мени мурнуу талада хаалга дамчыштыр иштики шөлче киире берди ^o. Ону хемчээрге, өске хаалгалар ышкаш хемчээлдиг болган. 29 Ооң таңныылдар турар өрээлдери, чаактары болгаш серилиг чери өске хаалгаларныы дег хемчээлдерлиг чорду. Хаалгада болгаш серилиг черде долгандыр соңгалар бар болду. Хаалганың узуну – бежен кыры дурту, а дооразы – чээрби беш кыры дурту. 30 Иштики шөлдү долгандыр хаалгаларның серилиг черлериниң узуну – чээрби беш кыры дурту, а дооразы – беш кыры дурту. 31 Ол хаалганың серилиг чери даштыкы шөлче көрнүп турган. Хаалганың чаактарын пальмалар дүрзүлери каастаан, хаалгаже үнер чада сес тепкииштиг болган.

32 Демги кижи мени чөөн талада хаалга дамчыштыр иштики шөлче аппаргаш, ол хаалганы хемчээрге, өске хаалгалар ышкаш хемчээлдиг болган. 33 Ооң таңныылдар турар өрээлдери, чаактары болгаш серилиг чери өске хаалгаларныы дег хемчээлдиг чорду. Хаалгада болгаш серилиг черде долгандыр соңгалар бар. Хаалганың узуну – бежен кыры дурту, а дооразы – чээрби беш кыры дурту. 34 Ооң серилиг чери даштыкы шөлче көрнүп турду. Чаактарны кайы-даа талазындан пальмалар дүрзүлери каастаан, хаалгаже үнер чада сес тепкииштиг болган.

35 Оон ол кижи мени соңгу чүкче көрүнген иштики хаалгаже аппаргаш, ону хемчээрге, өске хаалгалар ышкаш хемчээлдиг болду. 36 Ооң таңныылдар турар өрээлдери, чаактары, серилиг чери болгаш долгандыр турар соңгалары база ындыг болду. Хаалганың узуну – бежен кыры дурту, а дооразы – чээрби беш кыры дурту. 37 Ооң серилиг чери ^{▼▼ Өске бурунгу сөзүглелде «серилиг чери» эвес, а «чаактары» деп бижээн.} даштыкы шөлче көрнүп турган. Чаактарны кайы-даа талазындан пальмалар дүрзүлери каастаан, хаалгаже үнер чада сес тепкииштиг болган.

Өргүл белеткээр өрээлдер

38 Иштики хаалганың серилиг черинде кирер эжиктиг, бүрүн өрттедир өргүлдер чуур өрээл бар болду ^q. 39 Хаалганың серилиг чериниң ийи талазында ийи-ийи ширээ бар, аңаа бүрүн өрттедир өргүл, бачыт дээш өргүл болгаш кем-буруу дээш өргүл малдары дөгерер турган чүве-дир ^r. 40 Соңгу чүкче көрүнген хаалгаже кирер чер чанында, ооң даштыкы ийи кыдыында, бир талазында ийи ширээ, серилиг чер чанында өске талазында база ийи ширээ турар чорду. 41 Ынчалдыр хаалганың бир талазында дөрт, өске талазында база дөрт – өргүл малы дөгерер шупту сес ширээ бар болду. 42 Чонуп каапкан даштардан кылган, узуну бүдүн чартык, дооразы бүдүн чартык, а бедии бир кыры дурту, бүрүн өрттедир өргүл малдары белеткээр дөрт ширээ база бар чорду. Ынаар бүрүн өрттедир болгаш өске-даа өргүл малдары дөгерер чепсек салып турган. 43 Өргээни долгандыр турар ханаларда бир карыш дурттуг, ийи баштыг илбектер кадап каан болду, а ширээлерге өргүл эъди салып турган.

Бурганның бараалгакчыларының өрээлдери

44 Иштики хаалга артында, иштики шөлде ыраажылар өрээлдери турган ^s: бирээзи соңгу хаалга чанында, чөөн ^{▼▼ Өске бурунгу сөзүглелде «чөөн» эвес, а «мурнуу» деп бижээн.} чүкче көрнүп турар, а өскези мурнуу хаалга чанында, соңгу чүкче көрнүп турар. 45 Хемчээкчи кижи меңээ: «Мурнуу чүкче көрүнген өрээл Бурганның өргээзинде бараан болуп турар Ооң бараалгакчыларынга хамааржыр. 46 А соңгу чүкче көрүнген өрээл өргүл салыр бедигээш чанында бараан болуп турар бараалгакчыларга хамааржыр. Ол бараалгакчылар дээрге Садоктуң ^u салгалы-дыр; Левийниң салгалындан чүгле оларга Дээрги-Чаяакчыга бараан болуп, Олче чоокшулаарын чөпшээрээн» – дээн. 47 Ол кижи дөрбелчин шөлдү хемчээрге, узуну чүс кыры дурту, а дооразы база чүс кыры дурту болган ^v. Бурганның өргээзиниң мурнунда өргүл салыр бедигээш турган.

Бурганның өргээзиниң кол тудуу

48 Хемчээкчи кижи мени Бурганның өргээзиниң серилиг черинче эккелди. Ооң эжииниң чаактарын хемчээрге, кайызының-даа дооразы беш кыры дурту болган. Хаалганың дооразы кайы-даа талазындан үш кыры дурту болган. 49 Серилиг черниң узуну чээрби кыры дурту ^w, а дооразы он бир кыры дурту ^{▼▼ Өске бурунгу сөзүглелде «он бир» эвес, «он ийи» деп бижээн.}; ынаар үнер чада он тепкииштиг ^{▼▼ Өске бурунгу сөзүглелде «он» деп сөс таварышпайн турар.}; ооң эжииниң чаактарының кайы-даа талазында адагаштар бар болду.