Eze 42 | TyvTUV | STEP | Ооң соонда хемчээкчи кижи мени даштыкы шөлдүң соңгу талазынче аппаргаш, иштики шөлде турар тудугнуң дужунда – ооң соңгу талазында турар өрээлдерже эккелди .

‏ Ezekiel 42

Бурганның бараалгакчыларының кол өрээлдери

1 Ооң соонда хемчээкчи кижи мени даштыкы шөлдүң соңгу талазынче аппаргаш, иштики шөлде турар тудугнуң дужунда – ооң соңгу талазында турар өрээлдерже эккелди ^a. 2 Эжии соңгу талаже көрүнген бажыңның узуну – чүс кыры дурту, а дооразы – бежен кыры дурту. 3 Ол бажыңда үш аңгы деңнелде дужааштыр турар өрээлдер шөйүлген болду. Ооң бир талазында иштики шөлде дооразы чээрби кыры дурту ажык девискээр, а өске талазында даштыкы шөлде даш бедиктээш бар чорду. 4 Өрээлдерниң мурнунда дооразы – он кыры дурту, узуну – чүс кыры дурту ^{▼▼ Өске бурунгу сөзүглелде «бир кыры дурту» деп бижээн.} ишкээр эртер өдүг турду. Оларның эжиктери соңгу чүкче көрүнген болду. 5 Үстүкү өрээлдер тарлай берген, чүге дээрге оларның өдүглери бажыңның адаккы болгаш ортаакы каъттарда өрээлдеринден хөй чер ээлеп турар. 6 Бажың үш каът, ынчалза-даа ол даштыкы шөл ышкаш адагаштарлыг эвес болду, ынчангаш чер кырындан эгелээш, өрээлдер тарлап турар. Үстүкү каътта өрээлдерни ортаакы каътта өрээлдерден, а ортаакы каътта өрээлдерни – адаккы каътта өрээлдерден тар кылдыр кылып каан. 7 А даштыкы хана ол өрээлдерге база даштыкы шөлге чергелешкек бооп, өрээлдерниң мурнун дургаар бежен кыры дурту шөйүлген. 8 Даштыкы шөлче көрүнген ол өрээлдерниң ниити узуну бежен кыры дурту, а ыдыктыг черже көрүнген өрээлдерниң ниити узуну чүс кыры дурту болган. 9 Адаккы өрээлдерже оларның чөөн талазында турар даштыкы шөл дамчыштыр эрте берип болур кылып каан.

10 Өргээни долгандыр турар хананың чөөн ^{▼▼ Өске бурунгу сөзүглелде «мурнуу» деп бижээн.} чүкче көрүнген талазында – иштики шөлдүң, ында тудугнуң мурнуу талазында база шак ындыг өрээлдер бар болду. 11 Оларның мурнунда база өдүг бар. Олар соңгу талада өрээлдер ышкаш болган: узуну, дооразы, үнер черлери болгаш хемчээлдери база ол өрээлдернии дег. Соңгу талада өрээлдерниң эжиктеринге 12 мурнуу талада өрээлдерниң эжиктери дөмей болду. Ол өрээлдерже эртер өдүгже кирер чер хананы дургаар турган, ынаар чөөн таладан кирер болду.

13 Хемчээкчи кижи меңээ: «Иштики шөлдүң соңгу база мурнуу талазында турар бо өрээлдер дээрге ыдыктыг өрээлдер-дир. Дээрги-Чаяакчыже чоокшулап турар Ооң бараалгакчылары ол өрээлдерге аажок ыдыктыг өргүлдерни чиир; олар ынаар аажок ыдыктыг өргүлдер – далган-тараа өргүлдерин, бачыт дээш база кем-буруу дээш өргүлдерни эккеп салыр ^d, чүге дээрге ол чер ыдыктыг-дыр. 14 Бурганның бараалгакчылары ыдыктыг черже кирип келген болза, бараан болурда кедер хептерин уштуп, арттырып кагбаан шаанда, даштыкы шөлче үнмес болзун, чүге дээрге ол хептер ыдыктыг-дыр ^e. Олар чон мурнунче үнер бетинде, өске хептер кедип аар ужурлуг» – дээн.

Бурганның өргээзиниң девискээриниң ниити хемчээли

15 Хемчээкчи кижи Бурганның өргээзиниң иштики девискээрин хемчээп дооскаш, мени чөөн талада хаалга дамчыштыр дашкаар үндүре бергеш, өргээни долгандыр хемчээп эгеледи. 16 Чөөн таланы даянгыыш-биле хемчээрге, узуну 500 даянгыыш ^{▼▼ Өске бурунгу сөзүглелде 500 даянгыыш дурту эвес (40:5 көр), а 500 кыры дурту деп бодап турар.} дурту болган. 17 Соңгу таланы ол-ла даянгыыжы-биле хемчээрге, база 500 даянгыыш дурту болган. 18 Мурнуу таланы хемчээрге, база 500 даянгыыш дурту болган. 19 Оон барыын талаже эггеш, ону даянгыыжы-биле хемчээрге, база 500 даянгыыш дурту болган. 20 Демги кижи өргээни шак ынчаар бүгү дөрт таладан хемчээп кагды. Өргээни долгандыр хана турган, ооң узуну – 500 даянгыыш дурту, а дооразы – база 500 даянгыыш дурту. Ол хана ыдыктыг черни ыдыктыг эвес черден аңгылап турган ^g.