Eze 43 | TyvTUV | STEP | Хемчээкчи кижи мени чөөн талада хаалгага эккелди .

‏ Ezekiel 43

Бурганның өндүр чырыының өргээзинче эглип келгени

1 Хемчээкчи кижи мени чөөн талада хаалгага эккелди ^a. 2 Көөрүмге, Израильдиң Бурганының өндүр чырыы чөөн чүктен кел чытты ^b. Ооң үнү шапкын агым сугнуң коолааны дег болду ^c, Ооң өндүр чырыы чер кырын херелдендир чырыдыпты ^d. 3 Шак ол көстүүшкүн, мээң ооң мурнунда, кажан Ол ^{▼▼ Өске бурунгу сөзүглелде «мен» деп бижээн.} хоорайны чок кылып каар дээш кээп турда, көргеним дег база Кевар хем чанынга ^f көргеним дег көстүүшкүн болган. Мен хаваамны черге дегзи доңгая кээп дүштүм ^g. 4 Дээрги-Чаяакчының өндүр чырыы чөөн чүкче көрүнген хаалга таварып, Бурганның өргээзинче кире берди.

5 Бурганның Сүлдези мени көдүргеш ^h, өргээзиниң иштики шөлүнче аппарды ⁱ. Көөрүмге, Дээрги-Чаяакчының өндүр чырыы өргээни бүргей апты. 6 Демги кижи мээң чанымга турган. Бурганның өргээзиниң иштинден меңээ чүве чугаалаан үннү дыңнап кагдым. 7 Ол үн мынча дээн: «Кижи амытан, бо дээрге Мээң дүжүлгем турар чер-дир, Мээң бут салыр черим-дир ^j. Мен маңаа израильчилер-биле кады кезээ мөңгеде чурттаар мен. Израиль чон Мээң ыдыктыг адымны моон соңгаар бужартатпас ^k – олар боттары-даа, оларның хааннары-даа самыыраашкыны-биле база хааннары өлүп каарга, оларның мөчү-сөөгү-биле ^{▼▼ Азы: «Мөгейиишкин кылыр бедик черлер-биле».} Мээң адымны бужартатпас. 8 Олар боттарының ордузунуң эргинин Мээң эргиним чанынга, боттарының эжииниң кастыктарын Мээң эжиимниң кастыктарының чанынга, аравыста чүгле хана турар кылдыр тургузуп алган, Мээң ыдыктыг адымны чүдек-бужар херектери-биле бужартадып каан. Ынчангаш Мен килеңим кыптыгып, оларны чок кылып каан мен. 9 Ам олар Менден боттарының самыыраашкынын база хааннарының мөчү-сөөгүн чайлатсыннар. Ынчан Мен оларның аразынга кезээ мөңгеде чурттаар мен.

10 Кижи амытан, Бурганның өргээзиниң дугайында израиль чонга тодарадып чугаалап бер, олар боттарының кем-буруулуг херектеринден ыядып човазыннар база өргээни хемчээзиннер ^m. 11 Бир эвес олар бүгү үүлгедиглеринден ыядып човаар болза, өргээниң хевирин болгаш турар чурумун, үнер-кирер черлерин, ооң бүгү тургузуун болгаш бүгү дүрүм, хоойлуларын оларга тайылбырлап көргүс. Ол бүгүнү оларның мурнунга бижип каг – олар өргээниң тургузуун билип алгаш, дүрүмнерин күүсетсиннер.

12 Бурганның өргээзиниң дугайында хоойлу бо-дур: өргээ турар даг бажын долгандыр бүгү девискээр аажок ыдыктыг болур. Бурганның өргээзиниң дугайында хоойлу ол-дур».

Өргүл салыр бедигээш

13 «Өргүл салыр бедигээштиң кыры дурту-биле үндүрген хемчээли бо-дур ⁿ. (Мында анаа кыры дуртунга дөрт илиг немеп каан хемчээлди – узун кыры дуртун ажыглап турар.) ^{▼▼ Анаа кыры дурту чээрби дөрт илигге деңнежир, а узун кыры дурту чээрби сес илигге азы бежен ийи хире сантиметрге деңнежир (Иез. 40:5 көр).} Бедигээштиң таваан долгандыр коошпа турар. Коошпаның узуну-даа, дооразы-даа бедигээштиң тавааның узуну, дооразындан бир кыры дурту улуг; а коошпаның ханызы бир сөөм. Бедигээштиң бедии бо-дур: 14 чер кырындан адаккы каъттың кырынга чедир бедии – ийи кыры дурту; адаккы каът ортаакы каъттан бүгү талаларда бир кыры дурту калбак. Адаккы каъттың кырындан ортаакы каъттың кырынга чедир бедии – дөрт кыры дурту; ортаакы каът үстүкү каъттан бүгү талаларда бир кыры дурту калбак. 15 Үстүкү каът дээрге бедигээштиң одаа-дыр. Ооң бедии дөрт кыры дурту; оортан дөрт мыйыс өрү көдүрүлген ^p. 16 Бедигээштиң одаа дөрбелчин: узуну-даа, дооразы-даа он ийи кыры дурту. 17 Ортаакы каът база дөрбелчин: узуну-даа, дооразы-даа он дөрт кыры дурту. Ону долганган коошпаның бедии чартык кыры дурту; коошпа бедигээштиң таваандан бүгү талаларда бир кыры дурту калбак. Бедигээшче көдүрлүр тепкииштер чөөн талада турар ^q».

18 Бурган меңээ мынча дээн: «Кижи амытан, Дээрги-Бурган-Чаяакчыны дыңна: кажан өргүл салыр бедигээшти тудуп каарга, аңаа бүрүн өрттедир өргүлдер салырының база ынаар хан төгериниң дүрүмнери бо-дур ^r. 19 Садоктан укталган ^s, Менче чоокшулап болур эргелиг левит-бараалгакчыларымга бачыт дээш өргүл кылдыр бугажыктан беривит ^t – деп, Дээрги-Бурган-Чаяакчы медеглээн. – 20 Ооң ханын узуп алгаш, бедигээштиң дөрт мыйызын, ортаакы каъдының дөрт азыын болгаш долгандыр турар черни чаап каг ^u – ооң-биле бедигээшти бачыттан арыглап каар сен. 21 Бачыт дээш өргүлдүң бугажыын алгаш, ыдыктыг черниң даштынга, Бурганның өргээзиниң девискээринде доктаадып каан черге өрттедиптер сен ^v.

22 Даартазында хүндүс бачыт дээш өргүл кылдыр четпес-дудуу эвес дүктүгүр хунадан эккеп салыр сен; өргүл бедигээжин, бугажыктың ханы-биле арыглааны дег, арыглап каапсын. 23 Ону арыглап алгаш, кодан малдан четпес-дудуу эвес малды – бугажык биле кошкарны эккел. 24 Оларны Дээрги-Чаяакчының мурнунга тургузуп каг. Бурганның бараалгакчылары оларже дустан чашкаш ^w, Дээрги-Чаяакчыга бүрүн өрттедир өргүл кылдыр салзын.

25 Чеди хүн дургузунда ^x бачыт дээш өргүл кылдыр дүктүгүр хунадан эккеп салыр сен; кодан малдан четпес-дудуу эвес малды – бир бугажык биле бир кошкарны хүннүң-не эккеп салзын. 26 Өргүл бедигээжин Бурганның бараалгакчылары чеди хүн дургузунда арыглап, ыдыктазын, ооң соонда ону ажыглап болур апаар. 27 Чеди хүн эрте бээрге, сески хүнден эгелеп база оон-даа ыңай Бурганның бараалгакчылары өргүл бедигээжинге силерниң бүрүн өрттедир болгаш эп-найырал өргүлдериңерни салып эгелээр ^y. Ынчан силер Мээң сеткилимге тааржыр апаар силер». Дээрги-Бурган-Чаяакчының медеглээн чүвези ол-дур.