Eze 28 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 28

Тирниң хаанының буураашкыны

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Тирниң ^a чагырыкчызынга Дээрги-Бурган-Чаяакчының чугаалаан чүвезин дамчыт:

Улуургак чорууңга алзып: „Мен – бурган мен ^b.
Далай ортузунда, бурганның дүжүлгезинде саадап олур мен“– дээр-дир сен.
Бурганның мерген угааны-биле сээң угааның дөмей деп бодаар-даа болзуңза,
сен дээрге Бурган эвес, а кижи-дир сен.
3 Даниилден мерген угаанныг сен,
сеңээ билдинмес чажыт чүве-даа кайда боор! ^c
4 Мерген угаанныыңдан, угаан-сарыылдыыңдан бай-шыдалдыг апарып,
шыгжамырларыңны алдын-мөңгүн-биле долдуруп алган сен ^d.
5 Садыглажып билириңден, улуг угаанныыңдан бай-шыдалдыың дам барган,
бай-байлааң дээш эмин эрттир улуургай берген сен».

6 Ынчангаш Дээрги-Бурган-Чаяакчы мынча дээн:

«Бодуңнуң угааныңны Бурганның мерген угааны-биле дөмейлээниң дээш,
7 Мен сенче өске черлер улузун, чоннарның эң түрлүүн ыдар деп тур мен ^e;
олар сээң мерген угаан, чараш-каазыңче
хынындан ужулган хылыштарын аннып, сени бужартадып каар.
8 Олар сени тамыже киирер,
далай ортузунга хылыш-биле шаштырткан кижи ышкаш өлүртүп каар сен.
9 Бодуңнуң шаажылакчың холунга бурган эвес,
анаа кижи болур болганыңда,
өлүрүкчүң мурнунга: „Мен – бурган мен!“– деп катап-катап чугаалаар сен бе?
10 Сен кыртыжадып демдектетпээн хейниң ^f өлүмү-биле
даштыкы улустуң холундан өлүр сен,
чүге дээрге Мен ону чугааладым».
Дээрги-Бурган-Чаяакчының медеглээн чүвези ол-дур.

11 Дээрги-Чаяакчы меңээ Бодунуң сөзүн ажыдып чугаалаан:

12 «Кижи амытан, Тирниң хааны дээш кажыыдал ырын ырлап, Дээрги-Бурган-Чаяакчының чугаалаан чүвезин аңаа дамчыт:

Сен – болбаазыраңгай чоруктуң дээди демдээ сен,
кедергей мерген угаанныг сен, тулган чараш-каас сен ^g.
13 Сен Эдемге – Бурганның сесерлиинге турдуң ^h.
Сени янзы-бүрү эртине даштар:
рубин, топаз, алмаз, хризолит, оникс, яшма,
сапфир, бирюза болгаш изумруд каастап турган ⁱ.
Оларны алдын-биле хоолап, сиилбирлээш ^{▼▼ Бо шүлүктүң утказы эки билдинмес. Болгу дег өске утказы мындыг: «Сеңээ хөгжүмчүлер болгаш херээженнер бараан болуп турган».},
сээң чаяаттынган хүнүңде сеңээ белеткеп каан болган.
14 Сени күчүлүг херувимниң ^k камгалалының адаанга арттырып каан мен ^{▼▼ Азы: «Сени шилиттинген камгалакчы херувим дег кылдыр тургузуп каан».}.
Сен Бурганның ыдыктыг даанга туруп,
оттуг даштар аразынга чоруп турдуң.
15 Чаяаттынган хүнүңден эгелээш, бодуңнуң оруктарыңга кем чок бооп келдиң.
Ынчалза-даа ооң соонда кем-буруулуг апардың.
16 Сээң садыыңның хемчээли улгаткан тудум,
ишти-хөңнүң баксырап, күчүлел база бачыт үүлгедип алдың.
Мен сени, бужар кижини дег, Бурганның даандан дүжүр октаптым;
камгалакчы херувим сени оттуг даштар аразындан үндүр сывырыпты.
17 Чараш-каазыңдан улуургай бердиң,
магалыг чаагайыңдан мерген угааныңны чок кылып алдың.
Ынчангаш Мен сени черге чыдар кылдыр октаптар мен,
хааннар сени көргеш, кочулап шоотсун.
18 Бодуңнуң шынчы эвес садыглажыышкының-биле эңдерик кем-буруу кылып,
ыдыктыг черлериңни бужартадып алдың.
Ынчангаш Мен сени чиир отту бодуңнуң иштиңден өөскүдүп үндүрер мен;
сени чер кырынга сенче көрүп турар бүгү улуска көзүлдүр
хүл кылдыр хуулдурар мен.
19 Сени билир бүгү чоннарны сээң салым-хууң коргудуптар.
Сен коргунчуг төнчүге таваржыр сен,
моон соңгаар кажан шагда турбас сен ^m».

Сидон хоорай дугайында

20 Дээрги-Чаяакчы меңээ Бодунуң сөзүн ажыдып чугаалаан: 21 «Кижи амытан, Сидонче шиглей көрүнгеш, аңаа удур өттүр билип медегле ⁿ. 22 Дээрги-Бурган-Чаяакчының чугаалаан чүвезин аңаа дамчыт:

Сидон, Мен сеңээ удур апардым,
Мен сээң чонуң аразынга алдаржыыр мен.
Сеңээ үндүрген шииткелди күүседип,
чурттакчыларың аразынга ыдыктыымны көргүзеримге,
улус Мени Дээрги-Чаяакчы деп билип аар.
23 Мен сенче хамчык аарыгны,
сээң кудумчуларыңче – кыргып-хыдыышкынны ыдар мен ^o.
Сээң чурттакчыларың аразынга кайыын-даа шанчып турар хылышка өлүрткеннер
кээп дүжүп турар апаар.
Олар Мени Дээрги-Чаяакчы деп билип аар.
24 Израиль чон моон соңгаар, теннери-биле шиштеп балыглаар бок үнүштер ышкаш ^p,
ону куду көөр кожаларлыг болбас.
Олар ынчан Мени Дээрги-Чаяакчы деп билип аар ^q».

25 Оон Дээрги-Бурган-Чаяакчы мынча дээн: «Израиль чонну тарадып чорудупканым өске чоннардан чыып алгаш ^r, ол чоннар көрүп турда, израильчилерниң аразынга Бодумнуң ыдыктыымны көргүзер мен ^s. Олар Мээң чалчам Иаковка бергеним черге – боттарының черинге чурттаар. 26 Израильчилер ол черге айыыл чок чурттап ^t, бажыңнар тудуп аар болгаш виноград тарып олуртуп аар ^u. Олар айыыл чок чурттаар, а оларга бак чүве күзээр кожаларын Мен шиидер мен. Олар ынчан Мени Дээрги-Чаяакчы, оларның Бурганы деп билип аар».