Eze 33 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 33

Иезекиил – Израильдиң доскуулчузу

(Иез. 3:16-21)

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, чонуң-биле чугаалажып, оларга мону дамчыт: Мен кандыг-бир чуртче дайзынның аг-шериин ыдарымга, ол черниң чурттакчылары боттарының аразындан бир кижи шилип алгаш, ону доскуулчузу кылдыр томуйлап аар ^a. 3 Ол кижи чуртче дайзын халдап кел чыдарын көрүп кааш, чонну сагындырары-биле мыйыс эдиски этсир ужурлуг ^b. 4 Бир эвес эдиски үнүн дыңнап каан кандыг-бир кижи кичээнмес болза, дайзынның аг-шерии келгеш, ону чок кылып каар; ол кижи өлүмү дээш боду буруулуг болур ^c. 5 Эдиски эткенин дыңнааш-даа, ол кичээнмээн-дир, өлүмү дээш боду буруулуг-дур. Ол кижи кичээнген болза, амы-тынныг артар ийик. 6 А бир эвес доскуулчу дайзынның аг-шерии кел чыдарын көрүп кааш, чонну сагындырары-биле эдиски эдиспейн баарга, дайзын келгеш, улустуң кайы-бирээзиниң амы-тынын үзүп каан дижик. Өлүрткен кижи бодунуң бачыды дээш чок кылдыртканы ол-дур; ындыг-даа болза, ооң өлүмү дээш доскуулчудан харыы негээр мен.

7 Кижи амытан, Мен сени израиль чоннуң доскуулчузу кылдыр томуйлап кагдым. Мээң аксымдан үнген сөстү дыңнап алгаш, чонну Мээң өмүнээмден баш бурунгаар сагындырар сен ^d. 8 Мен кем-буруулуг кижиге: „Кем-буруулуг кижи, сен өлүп каар сен!“– дээримге, сен ол кижини сагындырып, бузуттуг оруундан чайлаарын айытпас болзуңза, кем-буруулуг кижиниң бодунуң бачыды дээш өлүп каары чайлаш чок. Ындыг-даа болза, Мен ооң өлүмү дээш сенден харыы негээр мен. 9 А бир эвес сен кем-буруулуг кижини бодунуң оруундан чайлаар кылдыр сагындырарыңга-даа, тоовайн барган болза, ол кижи бодунуң бачыды дээш өлүп каар, а сен амы-тыныңны камгалап аар сен ^e.

Бурган улусту өршээрин күзеп турар

(Иез. 18:1-32)

10 Кижи амытан, израиль чонга: „Кемниг херектеривис биле бачыттарывысты чүктеп чор бис, оларның ужун эстип-хайлып чор бис ^f. Канчап амы-тынныг артар улус боор бис?“– дээр-дир силер деп чугаала. 11 Оларга мону дамчыт. Дириг Бодумнуң адым-биле даңгыраглап тур мен ^g: Мен бачыттыгларның өлүмүн эвес, а боттарының оруктарындан чайлап, амы-тынныг артарын күзеп тур мен – деп, Дээрги-Бурган-Чаяакчы медеглээн. – Менче эглип келиңер, бузуттуг оруктарыңардан чайлаңар! Израиль чон, чүге өлүр ужурлуг сен?! ^h

12 Ынчангаш, кижи амытан, чонуңга мону дамчыт: бир эвес чөптүг-шынныг кижи кемниг херек үүлгедир болза, ооң чөптүг чоруу ону камгалавас; бузуттуг-бак кижиниң кем-буруузу, ол оон ойталаан болза, ону узуткавас. Бир эвес чөптүг-шынныг кижи бачыт үүлгедир болза, бодунуң биеэги чөптүг чоруу-биле амы-тынын камгалап шыдавас. 13 Бир эвес Мен чөптүг-шынныг кижиге: „Ыяап-ла амы-тынныг артар сен“– деп чугаалап каарымга, ол бодунуң биеэги чөптүг чоруунга ынангаш, бузут үүлгедир болза, ооң бүгү чөптүг-шынныг херектериниң чаңгызын-даа сагынмас мен, ол кижи үүлгеткен бузудунуң ужун өлүп каар ⁱ. 14 А бир эвес Мен бузуттуг-бак кижиге: „Сен ыяап-ла өлүп каар сен“– дээримге, ол кижи бачыдындан ойталааш, шынныг база чөптүг чорук кылып эгелээш, 15 бодунга өрелиг кижиниң арттырып каан долаазын эгидип ^j, оорлап алган чүвезиниң өртээн төлеп ^k, багай чүнү-даа кылбайн, амыдыраарының хоойлуларын күүседип чурттаар болза, ол кижи ыяап-ла амы-тынныг артып, өлбейн баар. 16 Ооң үүлгеткен хамык бачыттарының чаңгызын-даа аңаа сагындырбас мен. Ол кижи шынныг база чөптүг чорук кылып турар болза, ыяап-ла амы-тынныг артып каар.

17 А сээң чонуң: „Дээрги-Чаяакчының оруу шынныг эвес-тир“– дээр-дир. Чок, оларның оруу харын шынныг эвес-тир. 18 Бир эвес чөптүг-шынныг кижи бодунуң чөптүг чоруундан ойталап, кем-буруу үүлгедир болза, оозу дээш өлүп каар. 19 А бир эвес бузуттуг-бак кижи бодунуң кем-буруузундан ойталап, шынныг база чөптүг чорук кылып эгелээр болза, ол дээш, амы-тынныг артар. 20 А силер: „Дээрги-Чаяакчының оруу шынныг эвес-тир“– дээр-дир силер. Израильчилер, Мен кайыңарны-даа оруктарыңар дээш шиидер мен».

Иерусалимниң узуткатканы

21 Туттуруушкунувустуң он ийиги чылының он айның беште Иерусалимден тын менди үнген бир кижи меңээ келгеш: «Хоорай узуткатты!» – дээн. 22 А ол кижиниң кээриниң бүдүүзүнде кежээ Дээрги-Чаяакчы мени башкарып эгелээш ^l, демги кижи даартазында эртен меңээ кээр бетинде, мээң үнүмнү эгидип берген. Ол мээң үнүм үндүрүптерге, ам-на чугаалап эгелээн мен ^m.

23 Дээрги-Чаяакчы меңээ Бодунуң сөзүн ажыдып чугаалаан: 24 «Кижи амытан, израиль черде бо бузундуларда чурттап турар улус: „Авраам чаңгыс боду турган, ынчалза-даа бо черни ээлеп алган болгай ⁿ. А бис хөй-дүр бис, бо черни биске ээлээр кылдыр берипкен болбайн канчаар“– деп турар-дыр. 25 Ынчангаш оларга Дээрги-Бурган-Чаяакчының чугаалаан чүвезин дамчыт: силер ханныг эът чип ^o, дүрзү-бурганнарыңарже идегел-биле көрүп, өлүрүүшкүн кылып турар-дыр силер ^p – бо черни канчап ээлээр силер? 26 Силер хылыжыңарга ынаныр, чүдек-бужар чүүлдер кылыр, бирээңер өскеңерниң кадайын бужартадыр-дыр силер. Бо черни канчап ээлээр силер?

27 Оларга Дээрги-Бурган-Чаяакчының чугаалаан чүвезин дамчыт. Мен дириг Бодумнуң адым-биле даңгыраглап тур мен ^q: бузундуларда чурттап арткан улус хылыштан кырлып каар, ажык шөлде турар улусту Мен черлик аң-араатанга чемиш кылдыр бериптер мен ^r, шивээлерде база куйларда чаштып турар улус хамчык аарыгдан өлүп каар. 28 Мен бо черни хоозураан кургаг хову кылып каар мен, ооң турамык күчү-күжү чиде бээр, Израильдиң даглары шуут ээнзиреп каар, оларны таварып кым-даа эртпестей бээр. 29 Кажан Мен бо черни израильчилерниң бүгү чүдек-бужар үүлгедиглери дээш хоозурадып каарымга, Олар Мени Дээрги-Чаяакчы деп билип аар ^s.

30 Кижи амытан, а сээң дугайыңда бодуңнуң чонуңнуң улузу ханалар баарында, бажыңнар эжиктеринде туруп алган, бот-боттарынга: „Дээрги-Чаяакчыдан келген медээни барып дыңнаалы“– дижип турар-дыр. 31 Олар сеңээ чоннуң чыыжынче дег чедип кээп, сээң мурнуңга олуруп алгаш, чугаа-сөзүңнү дыңнап турар ^t, ынчалза-даа күүсетпес-тир. Мээң чонум – чүгле боттарының сеткилин өөртүр чүве дугайында чугаалажыр, чүгле боттарының алыксак чүректериниң күзелин хандырар чүве кылыр улус-тур. 32 Сен ол улуска – ынакшыл ырын тааланчыг үн-биле ырлап, эки үдеп ойнап турар ыраажы ышкаш-тыр сен. Олар сээң сөстериңни дыңнап турар, ынчалза-даа күүсетпес-тир.

33 Ынчалза-даа, кажан ол бүгү бүде бээрге (а ол бүгү ыяап-ла бүдер), оларның аразынга Бурганның медээчизи турганын билип аарлар ^u».