Eze 38 | TyvTUV | STEP | Дээрги-Чаяакчы меңээ Бодунуң сөзүн ажыдып чугаалаан:

‏ Ezekiel 38

Гогтуң Израильче халдаары

1 Дээрги-Чаяакчы меңээ Бодунуң сөзүн ажыдып чугаалаан: 2 «Кижи амытан, Магог деп черде Гогче – Мешех биле Тувал ^a деп черлерниң дээди чагырыкчызынче ^{▼▼ Азы: «Гог – Рош, Мешех болгаш Тувал деп черлерниң чагырыкчызы».} шиглей көргеш, аңаа удур өттүр билип медегле. 3 Дээрги-Бурган-Чаяакчының чугаалаан чүвезин аңаа дамчыт: о, Гог, Мешех биле Тувалдың дээди чагырыкчызы*, Мен сеңээ удур апардым! 4 Мен чаактарың өттүр тыртпа суп ^c, сени ээй тырткаш, бүгү аг-шерииң: аъттарың, бүрүн чепсегленген аъттыг шеригжилериң, дозуг-камгалалдарлыг, хылыштарлыг дүк-түмен шерииң-биле кады чериңден үндүре бээр мен. 5 Сээң аг-шерииңге Персия, Эфиопия болгаш Ливияның ^d дөгерези дозуг-камгалалдыг, куяк бөрттерлиг шерии каттыжар; 6 Гомер чоннуң шерии, соңгу чүктүң кыдыг-кызыгаарындан тогарма аймактың ^e бүгү шерии олар-биле кады болур. Сээң-биле кады хөй чоннар чоруур.

7 Гог, белеткенип, дөгернип ал – сен база сээң чаныңга чыглып келген бүгү аг-шериг; оларны башкарар сен. 8 Хөй хүннер эрте бээрге, бодуңга айтыышкын алыр сен. Келир үеде дайын-чаадан адырылган, чонун хөй чоннардан даглыг Израильче чыып эккелген, үр үеде ээн чыткан чуртче халдаар сен. Ол черниң чурттакчыларын өске чоннар аразындан чыып, дедир чандырыпкан, олар ам айыыл чок чурттап турар ^f. 9 А сен бодуңнуң аг-шерииң-биле, хөй чоннар-биле кады көдүрлүп, хат-шуурган ышкаш халдап кээр сен; черни дуглаптар булут ышкаш боор сен ^g».

10 Дээрги-Бурган-Чаяакчы мынча дээн: «Ол үеде сээң угааныңга багай бодалдар кирер, кара сагыштыг чүве бодап аар сен. 11 „Быжыглаттынмаан хоорай-суурларлыг черже чоруй барайн. Сагыш амыр, айыылзынмайн чурттап турар чонче халдаайн: олар ханалар чок чурттап турар-дыр, оларда дээктер, эжиктер чок-тур ^h. 12 Үптеттинип, олчаланыр мен; ээн турган, ам улус чурттай берген черже, өске чоннар аразындан чыып эккелген, чер-мал ажыл-агыйлыг болгаш делегейниң дал ортузунда чурттап турар чонче холум көдүрер мен“– дээр сен. 13 Шева биле дедан аймактар ⁱ, Фарсис чурттуг садыгжылар болгаш оларның бүгү суурлары ^{▼▼ Азы: «Бүгү аныяк арзылаңнары».} сенден: „Үптээр дээш үнүптүң бе? Мөөң чонуң чыып алгаш, олчаланыр, алдын-мөңгүн ап аар, мал-маган, эт-хөреңги хунаап аар, байлак олча-тывыш эккээр дээш үнүптүң бе?“– деп айтырар.

14 Ынчангаш, кижи амытан, өттүр билип медеглеп, Дээрги-Бурган-Чаяакчының чугаалаан чүвезин Гогка дамчыт: Мээң израиль чонум айыыл чок чурттап эгелээр хүнде сен ол дугайында албан билип аар сен. 15 Соңгу чүктүң кыдыг-кызыгаарында бодуңнуң чуртуңдан сен база сээң-биле кады хөй чоннар үнүптер силер – шупту аът мунган улус, эмге-тикчок бөлүглежиишкин, кончуг улуг аг-шериг. 16 Гог, сен Мээң израиль чонумче, черни дуглаар дээн булут дег, көдүрлүр сен. Келир үеде Мен сени Бодумнуң черимче эккээр мен. Ынчан бүгү чоннар Мени билип аар, чүге дээрге олар көрүп турда, Мен сени дамчыштыр Бодумнуң ыдыктыымны көргүзер мен ^k».

Гогтуң болгаш ооң аг-шерииниң бастырары

17 Дээрги-Бурган-Чаяакчы мынча дээн: «Мен шагдан бээр Бодумнуң чалчаларым, Израильде Бурганның медээчилерин дамчыштыр сээң дугайыңда чугаалап турган эвес мен бе? ^l Олар эрте шагда Мээң сени Израильге удур эккээримни өттүр билип медеглеп турган. 18 Ол хүн болур чүве бо-дур: кажан Гог израиль черже халдап кээрге, хорадаанымдан Мээң килеңим кыптыгар – деп, Дээрги-Бурган-Чаяакчы медеглээн. – 19 Хорадаан сеткилимге хаара туттургаш, ажынган сагыжымның одунга хөме алыскаш, даңгыраглап тур мен: ол хүн израиль черге коргунчуг чер шимчээшкини болур ^m. 20 Далайның балыктары, дээрниң куштары, хову-шөлдерниң аң-меңи, черде соястаан бүгү дириг амытаннар болгаш чер кырында бүгү кижи төрелгетен Мээң мурнумга сирилээр; даглар буступ дүжер, хаялар барып ужар ⁿ, ханалар шупту черже кээп дүжер. 21 Мээң бүгү дагларымга Гогка удур дайылдажыр кылдыр хылышты кыйгырар мен ^o – деп, Дээрги-Бурган-Чаяакчы медеглээн. – Ооң бүгү дайынчылары хылыжын бот-боттарынга удур хынындан уштур. 22 Мен Гогту шиидип, хамчык аарыг болгаш өлүм-чидим-биле кезедир мен ^p. Олче, ооң аг-шериинче, ооң-биле кады турар хөй чоннарже суггур чаъс чагдырар мен, улуг долу, оттуг күгүр дүжүрер мен ^q. 23 Мен шак ынчаар Бодумнуң өндүр бедиимни, ыдыктыымны көргүзер мен ^r, хөй чоннарга ажыттынар мен. Олар ынчан Мени Дээрги-Чаяакчы деп билип аар ^s».