Eze 39 | TyvTUV | STEP | «Кижи амытан, Гогка удур өттүр билип медеглеп, Дээрги-Бурган-Чаяакчының чугаалаан чүвезин аңаа дамчыт: Гог – Мешех биле Тувалдың дээди чагырыкчызы , Мен сеңээ удур апардым.

‏ Ezekiel 39

1 «Кижи амытан, Гогка удур өттүр билип медеглеп, Дээрги-Бурган-Чаяакчының чугаалаан чүвезин аңаа дамчыт: Гог – Мешех биле Тувалдың ^a дээди чагырыкчызы ^{▼▼ Азы: «Гог – Рош, Мешех болгаш Тувал деп черлерниң чагырыкчызы».}, Мен сеңээ удур апардым. 2 Мен сени ээй тырткаш, соңгу чүктүң кыдыг-кызыгаарындан үндүре бергеш ^c, даглыг Израильге удур эккээр мен. 3 Сээң солагай холуңда чаны ушта шапкаш, оң холуңда согуннар черже кээп дүжер кылдыр кылып каар мен ^d. 4 Сен Израильдиң дагларынга бодуңнуң бүгү аг-шерииң болгаш эдерип чоруур чоннарың-биле кады кээп дүжер сен. Мен сени янзы-бүрү араатан куштарга база ховунуң аңнарынга чемиш кылдыр бериптер мен ^e. 5 Сен ажык шөлге кээп дүжер сен, чүге дээрге Мен ону чугааладым – деп, Дээрги-Бурган-Чаяакчы медеглээн. – 6 Мен Магог деп чериңче, далай эриинде айыыл чок чурттап турар улузуңче от ыдар мен ^f. Олар ынчан Мени Дээрги-Чаяакчы деп билип аарлар.

7 Мен Бодумнуң ыдыктыг адымны израиль чонумнуң аразынга ажыдар мен. Бодумнуң ыдыктыг адымны моон соңгаар бактатпас мен ^g; бүгү чоннар ынчан Мени Дээрги-Чаяакчы, Израильдиң ыдыктыг Бурганы деп билип аар. 8 Ол хүн чоокшулап келген, ол ыяап-ла дүжер – деп, Дээрги-Бурган-Чаяакчы медеглээн. – Ол дээрге Мээң чугаалап турганым хүн ол-дур.

9 Ол үеде Израильдиң хоорайларының чурттакчылары октапкан ок-чепсекти оттулар чүүл кылдыр чыып үнүп кээр ^h. Олар от кыпсып, бичии болгаш улуг дозуг-камгалалдар, ча-согуннар, моңнар болгаш чыдаларны өрттедип эгелээр. Ол бүгү оларга чеди чыл дургузунда оттулар чүүл боор. 10 Оларга оттулар ыяшты хову-шөлден чыгган азы арга-арыгдан кескен херээ чок: ок-чепсек-ле оларга оттуларынга четчир. Олар боттарын үптеп турганнарны үптээр, боттарын олча кылып турганнарны олча кылып аар ⁱ». Дээрги-Бурган-Чаяакчының медеглээн чүвези ол-дур.

11 «Ол хүн Мен Израильге, далайның мурнунда Аварим шынаазынга, Гогту хөөржүдер чер аңгылап бээр мен. Ол чер чорук кылган улустуң оруун моондактаар, чүге дээрге Гогту болгаш ооң мөөң бөлүглежилгезин аңаа хөөржүдүп каар. Улус ону Гамон-Гог шынаазы ^{▼▼ Азы: «Гогтуң мөөң бөлүглежилгезиниң шынаазы».} деп адаар. 12 Израиль чон чер-чуртун арыглаар дээш, оларны чеди ай дургузунда хөөржүдүп кээр. 13 Чурттуң бүгү чону оларны хөөржүдер болгаш Мээң Бодумну алдаржыдар хүнүмде ооң-биле алдар-ат чедип аар». Дээрги-Бурган-Чаяакчының медеглээн чүвези ол-дур.

14 «Чеди ай эртерге, черни үргүлчү кезип, ооң кырында артып калган мөчү-сөөктерни дилээр улусту томуйлап каар. Олар хөөржүдүүшкүн кылып, чер-чуртту арыглаар ужурлуг. 15 Ол улус черни кезип чоруптарга, кайы-бирээзи кижи сөөгү көрүп каан болза, ооң чанынга демдек арттырып каар. Ооң соонда хөөржүдүкчүлер келгеш, ол мөчү-сөөктү Гамон-Гог шынаазынга хөөржүдүп каар. 16 Ында турар хоорайны Гамона ^{▼▼ Гамона – «Бөлүглежилге» дээн.} деп адаар. Олар черни шак ынчаар арыглап каар.

17 Кижи амытан, янзы-бүрү куштар биле черлик аң-араатанга Дээрги-Бурган-Чаяакчының чугаалаан чүвезин дамчыт: чыылгаш, Мээң силерге белеткеп каарым өргүл доюнче, Израильдиң дагларында өндүр улуг дойже чер болгандан кады барыңар; эът чип, хан ижер силер ^l. 18 Күчүлүг дайынчыларның эъдин чиир силер, черниң чагырыкчыларының ханын ижер силер. Олар дээрге кошкарлар, хойлар, хуналар болгаш бугажыктар – васан черде бүгү семис малдар дег улус-тур ^m. 19 Мээң силерге белеткээним дойга үс-чагны тоттур чип, ханны эзиртир ижип аар силер. 20 Мээң доюмче чедип келиңер, ынчан аъттарны, аъттыг шеригжилерни, күчүлүг дайынчыларны болгаш янзы-бүрү шериглерни тоттур чиир силер – деп, Дээрги-Бурган-Чаяакчы медеглээн. –

21 Мен бүгү чоннар аразынга Бодумнуң өндүр бедиимни көргүзер мен. Бүгү чоннар Мээң үндүрген шииткелимни, оларны тудуп турар холумну көрүп каар. 22 Ол хүннүң соонда, израиль чон Мени Дээрги-Чаяакчы, боттарының Бурганы деп билип аар ⁿ. 23 А өске чоннар израиль чон бодунуң кем-буруузу дээш, Меңээ шынчы эвес болганы дээш бодунуң черинден өскээр көжүрткенин билип аар ^o. Ынчангаш Мен чонумнуң хайы-биле оон өскээр көрнүп, дайзыннар холунга хүлээдип берген мен – олар шупту хылышка шаштырып өлүрткен. 24 Мен оларны арыг эвези дээш база кемниг херектери дээш ынчаар аажылап, олардан өскээр көрнү берген мен».

25 Ынчангаш Дээрги-Бурган-Чаяакчы мынча дээн: «Мен ам Иаковтуң салгалынга эки чолду эгидип ^{▼▼ Бо сөстерниң болгу дег өске утказы: «Туттуруушкундан дедир чандырып».}, бүгү израильчилерге өршээл көргүзер мен ^q, Бодумнуң ыдыктыг адымны камгалаар мен ^r. 26 Кажан боттарының черинге айыыл чок чурттап эгелеп, оларны кым-даа коргудуп-дүвүретпес апарганда ^s, олар боттарының бак атка киргенин база Меңээ өскерликчи чорук кылганын уттуптуп шыдаар ^{▼▼ Азы: «Чүктээр ужурлуг апаарлар».}. 27 Оларны өске чоннар аразындан дедир чандырып, дайзыннарының чурттарындан чыып эккелгеш, оларны дамчыштыр хөй чоннарның мурнунга Мен Бодумнуң ыдыктыымны көргүзер мен ^u. 28 Мен оларны өске чоннарже туттуруушкунче чорудупкан-даа болзумза, ол черлерге оларның чаңгызын-даа арттырбайн база катап боттарының черинге чыып эккээримге, олар Мени Дээрги-Чаяакчы, боттарының Бурганы деп билип аар. 29 Мен Бодумнуң Сүлдем-биле израиль чонну бүргээш ^v, олардан ам кажан-даа өскээр көрүнмес мен». Дээрги-Бурган-Чаяакчының медеглээн чүвези ол-дур.