Ezr 3 | TyvTUV | STEP | Израильчилер боттарының хоорайларынга чурттай берген соонда, ол чылдың чеди айда бүгү чон, чаңгыс кижи ышкаш, Иерусалимге чыглып келген .

‏ Ezra 3

Өргүл салыр бедигээшти катап тургусканы

1 Израильчилер боттарының хоорайларынга чурттай берген соонда, ол чылдың чеди айда бүгү чон, чаңгыс кижи ышкаш, Иерусалимге чыглып келген ^a. 2 Иоседектиң оглу Иисус ^b бодунуң ха-дуңмазы болур Бурганның бараалгакчылары-биле, Салафиилдиң ^c оглу Зоровавел ^d бодунуң акы-дуңмазы-биле Израильдиң Бурганынга өргүл салыр бедигээш тудуп эгелээн ^e. Олар ону Бурганның кижизи Моисейниң ^f хоойлузунда бижип каанын ёзугаар аңаа бүрүн өрттедир өргүлдер кылыр дээш тудуп эгелээн ^g. 3 Олар кожа чоннардан ^h коргуп турган-даа болза ^{▼▼ Азы: «Олар кожа чоннардан коргар болгаш».}, өргүл салыр бедигээшти биеэги таваанга тудуп кааш, аңаа Дээрги-Чаяакчыга бүрүн өрттедир өргүлдерни эртен, кежээ эккеп салып турган ^j. 4 Оон олар ыдыктыг хоойлуда айтып каанын ёзугаар Чадырлар байырлалын демдеглеп, ону эрттирер хүн бүрүзүнде бүрүн өрттедир өргүлдерни доктааткан сан-хемчээл ёзугаар салып турган ^k. 5 Ооң соонда олар хүннүң-не кылыр ужурлуг өргүлдерни, ай чаазының байырлалында ^l болгаш Дээрги-Чаяакчыга тураскааткан бүгү ыдыктыг хүннерде ^m кылыр өргүлдерни, эки тура-биле кылып турар өргүлдерин эккеп салып эгелээн. 6 Чеди айның бирээде, Дээрги-Чаяакчының өргээзиниң таваа ам-даа салдынмаан-даа турган болза, олар Аңаа бүрүн өрттедир өргүлдерни эккеп салып эгелээн.

Бурганның өргээзин катап тудуп эгелээни

7 Израильчилер даш чонукчуларынга, чазаныкчыларга акша-мөңгүннү, а Тир биле Сидоннуң чурттакчыларынга аъш-чем, арага-хымыс болгаш олива үзүн, олар Персияның хааны Кирниң чөпшээрели-биле пөш ыяшты Ливандан Иоппияже далайлап сөөртсүн дээш ⁿ, берип эгелээн.

8 Олар Иерусалимде Бурганның өргээзинче чедип келген соонда, ийиги чылдың ийи айда Салафиилдиң оглу Зоровавел, Иоседектиң оглу Иисус болгаш оларның өске ха-дуңмазы – Бурганның бараалгакчылары, левиттер болгаш Вавилонга туттуруушкундан Иерусалимче ээп келген бүгү улус ажылдап эгелээн. Олар чээрби хардан өрү назылыг ^o левиттерни Дээрги-Чаяакчының өргээзин тудар ажылдар хайгаараары-биле томуйлап каан. 9 Ынчангаш Иисус, ооң оолдары, акы-дуңмазы; Кадмиил, ооң оолдары база Иуданың аймаа Бурганның өргээзин тудар ажылдарны, чаңгыс кижи дег, хайгаарап көрүп эгелээн. Хенададтың оолдары ^p болгаш оларның левит ха-дуңмазы оларга дузалап турган.

10 Тудугжулар Дээрги-Чаяакчының өргээзиниң таваан салып каарга ^q, боттарының тускай хептерин кеткеш, трубалар тудуп алган Бурганның бараалгакчылары биле кимвалдар тудуп алган левиттер (Асафтың үре-салгалы) Израильдиң хааны Давидтиң чагыын ёзугаар Дээрги-Чаяакчыны алдаржыдар дээш туруп алган ^r. 11 Оон олар Дээрги-Чаяакчыны алгап-мактаан, алдаржыткан ырларны ырлажып эгелээн: «Ол ачылыг-дыр, Ооң Израильге энерели кезээ шагда үстүп төнмес-тир» ^s.

Бүгү чон Дээрги-Чаяакчыны алдаржыдып, ыыткыр ырлажып турган, чүге дээрге Ооң өргээзиниң таваан салып каан болган. 12 Ынчалза-даа дыка хөй улус – Бурганның биеэги өргээзин көрген ^t, назы-хары улгаткан бараалгакчылар, левиттер, төрел салгалдар баштыңнары чаа өргээниң таваан салып турарын көргеш, ишкирнип ыглажып турган. А өске хөй улус өөрүшкүден ыыткыр алгыржып турган. 13 Чон ынчаар шимээргеп, хөлзээрге, өөрүшкүнүң алгы-кышкызын ыы-сыыдан ылгаары болдунмас болган. Ыыт-шимээн кайы ырактан дыңналып турган.