Gal 1 | TyvTUV | STEP | Улустуң шиитпири-биле болгаш кандыг-бир кижиниң даалгазы-биле эвес , а Иисус Христостуң база Ону өлүглер аразындан катап диргискен Бурган Аданың адындан элчин апарган Павел менден,

‏ Galatians 1

Киирилде сөстер

1 Улустуң шиитпири-биле болгаш кандыг-бир кижиниң даалгазы-биле эвес ^a, а Иисус Христостуң база Ону өлүглер аразындан катап диргискен Бурган Аданың адындан элчин апарган Павел менден, 2 ол ышкаш мээң-биле кады турар бүзүрээн ха-дуңманың шуптузундан байыр! ^b Галатия девискээринде христиан ниитилелдерге бижидим ^c.

3 Бурган Адавыс болгаш Дээргивис Иисус Христостан келген авырал биле амыр-тайбың силерге доктаазын. 4 Чурттап турарывыс бузуттуг бо делегейниң эрге-чагыргазындан бисти хостаар дээш, Ол бачыттарывыс ужун Бодун өргүлге салган ^d Бурган Адавыстың күзел-соруу ындыг болган ^e. 5 Аңаа кезээ мөңгеде алдар доктаазын. Аминь.

Өске Буянныг Медээ чок

6 Силерни Христостуң авыралы-биле кый деп алган Бургандан ындыг дүрген ойталап турарыңарны ^f, Буянныг Медээ-даа эвес өске-бир өөредигни ^g эдерер деп барганыңарны кайгап ханмас-тыр мен. 7 Өске кандыг-даа Буянныг Медээ ылап-ла чок! Христостуң дугайында Буянныг Медээни өскертирин кызып, чүгле ол дээш араңарга хөлзээзин өөскүдүп турар улус бар ^h. 8 Ынчалза-даа өске кым-даа, бис азы дээрниң төлээзи-даа ⁱ дижик, ооң мурнунда медеглээнинден өске Буянныг Медээни силерге медеглей берзе, Бурган ону Бодундан бүрүнү-биле аңгылап каапсын! ^j 9 Мооң мурнунда-даа чугаалап турдувус, ам база катаптап тур мен: хүлээп алганыңардан өске өөредигни силерге медеглей бээр кижини Бурган Бодундан бүрүнү-биле аңгылап каапсын!

10 Чүнү чедип алыксааным ол: мени улустуң эки көөрүн бе азы Бурганның бе? Азы улус аайынче кирер деп бардым бе? ^k Ынчалза-даа амдыгаа дээр улус аайы-биле чоруп келген болзумза, Христостуң чалчазы турбас ийик мен.

Павелдиң канчап элчин апарганы

11 Ха-дуңма, мону билип аарыңарны күзеп тур мен: силерге медеглээним Буянныг Медээ – кижиниң чогаадыы эвес-тир. 12 Мен ону улустан албадым, меңээ ону улус-даа өөретпеди, харын ону Иисус Христостуң ажыдыышкынын дамчыштыр алдым! ^l

13 Иудей сагылгалыг чоруур шаамда, канчаар чурттап чораанымны дыңнаан боор силер ^m. Мен христиан ниитилелди каржызы-биле истеп-сүрүп, ону узуткаарын кызып турдум ⁿ. 14 Иудей шажынны өөрениринге мээң чонумнуң иштинде үе-черге өөрүмнү мурнап чоруп турган мен, ылаңгыя ада-өгбениң чаңчылдарын эң чүткүлдүү-биле сагып чордум ^o. 15 – 16 Ынчалза-даа Бурган Бодунуң авыралы-биле ием иштинге турумда-ла, мени шилээш, кый деп алган ^p. Ол, Бодунуң Оглун меңээ ажыдып бергеш, «Өске чоннарның улузунга Ооң дугайында медеглээр сен» деп айыткан ^q. Мен ынчан улус аразындан кымдан-даа арга-сүме айтырбадым. 17 Иерусалимге турган, мээң мурнумда-ла элчиннер апарган улусче-даа барбадым, а Аравияже чоруптум, ооң соонда Дамаскыже ээп келдим ^r.

18 Ооң соонда, үш чыл эрткенде, мен Кифа Пётрга ^s ужуражыр сорулгалыг Иерусалимге чедип келгеш, ийи чеди хонук дургузунда ооң-биле кады турдум ^t. 19 А өске элчиннерден кымга-даа ужурашпадым, чүгле Дээрги Иисустуң дуңмазы Иаковту ^u көрдүм. 20 Силерге бижип орар бүгү чүүлүм актыг шын деп, Бурганның мурнунга аашкынып тур мен! ^v

21 Мен ооң соонда Сирия болгаш Киликия девискээрлеринче чорупкан мен. 22 Ынчалза-даа Иудеяда христианнар аразынга мээң арным көрген, таныыр кижи чок турган. 23 Олар чүгле: «Мурнунда бисти истеп-сүрүп чораан кижи бир шагда узуткаар дээш, ыйыдып шаг болганы бүзүрелди ам суртаалдап турар-дыр» – деп чугаалар дыңнааннар ^w. 24 Олар мени дээш Бурганны алдаржыдып турган.