Gal 5 | TyvTUV | STEP | Христос бисти шак ол хосталга дээш хостап каан . Ынчангаш туруштуг болуңар, кымның-даа силерни катап кулданып аарын болдурбаңар .

‏ Galatians 5

Христиан хосталга

1 Христос бисти шак ол хосталга дээш хостап каан ^a. Ынчангаш туруштуг болуңар, кымның-даа силерни катап кулданып аарын болдурбаңар ^b.

2 Дыңнаңар, Павел мен силерге чугаалап тур мен: кыртыжап демдектедирин дамчыштыр ыдыктыг хоойлуже эглир болзуңарза, Христостуң силерге кандыг-даа ажыы чок ^c. 3 Силерге база катап чугаалап тур мен: бодунга кыртыжап демдектээшкин кылырынга чөпшээрешкен кижи бүрүзү ыдыктыг хоойлуну бүрүнү-биле сагыыр ужурлуг ^d. 4 Ыдыктыг хоойлуну сагыыры-биле агартыышкын алырын шенээр болзуңарза ^e, моон соңгаар силерде Христос-биле дөмей чүү-даа чок боор. Бурганның авыралындан ам хоорулган-дыр силер. 5 А бис бүзүрелдиң ачызында Бурганның мурнунга актыг боорувуска идегээр болгай бис. Ол идегелди четтикпейн манаарын ^f Сүлде биске сагыш алындырып турар. 6 Христос Иисус-биле сырый харылзаалыг апаар болзувусса, кыртыжап демдектедири-даа, кыртыжап демдектетпези-даа чугула эвес ^g. Ынакшыл дамчыштыр бодун көргүзер бүзүрел ^h – чүгле ол чугула.

7 Бүзүрелдиң оруу-биле эки маңнап олурдуңар ⁱ. Ынчаарга кым силерни астыктырып, алыс шынны дыңнавас улус кылдыр хуулдурупту? 8 Силерни кыйгырган Бурганның ынчаар өөретпээни ылап боор! 9 «Хөй далган хөөй берзин дизе, ынай ажыткы херек» ^j. 10 Дээрги-Чаяакчының мурнунга силерге бүзүрээр мен: бистиң аравыска аңгы үзел-бодал турбас. А силерни хөлзедип турар кижи, ол кым-даа болза ^k, шииттирер.

11 Ха-дуңма, мени кыртыжап демдектээриниң талалакчызы деп турары шын болза ^l, олар ам мени чүү дээш истеп-сүрерил? Христостуң белдир-ыяшка өлүмүнүң дугайында суртаал ынчан кымга-даа моондак болбас ийик ^m. 12 А силерни хөлзеткен ол хейлер боттарын чүгле кыртыжап демдектевейн, харын акталап-даа каапсыннар! ^{▼▼ Азы: «А силерни хөлзеткен ол хейлерни силерден ырадыр хөөглепкен болза аар!»}

Сүлдеге башкартып амыдыраары

13 Ха-дуңма, Бурган силерни хосталгаже кыйгырган-дыр. Чүгле ол хосталгаңарны кижи бүдүжүнүң кара туразында аажылаар чаңынче хуулдурбаңар ^o. Харын бот-боттарыңарга ынакшылдыг бараан болуңар ^p. 14 Чүге дээрге бүгү ыдыктыг хоойлу чаңгыс борбак домакта туттунуп турар ^q: «Чаныңда кижиге бодуңга бодуң дег ынак бол» ^r. 15 А бот-боттарыңарны үзе-чаза тыртарын уламчылаар болзуңарза, шуут-ла узуткажып кааптарыңардан кичээниңер.

16 Ынчангаш силерге чугаалап тур мен: Сүлдениң айыткан аайы-биле амыдыраңар ^s, кижи бүдүжүңерниң бачыттыг күзээшкиннеринге черле алыспаңар ^t. 17 Чүге дээрге бачыттыг бүдүштүң күзээр чүүлү Сүлдеге удурланышкак, а Сүлдениң күзээр чүүлү бачыттыг бүдүшке удурланышкак болур. Олар үргүлчү адааннажып чоруур, ооң түңнелинде кылыр бодаан чүвеңерни кылып шыдавайн баар силер ^u. 18 Ынчалза-даа Сүлдеге башкартыр болзуңарза, ыдыктыг хоойлу силерни баш билип шыдавас ^v.

19 Кижиниң бачыттыг бүдүжүнүң ажыл-херээ илдең көскү ^w. Ол дээрге самыырал, бужар күзээшкиннер, туттунмас туралаашкын ^x, 20 дүрзү-бурганга чүдүүрү, караң көрнүрү, адаан-өжээн, килең-кылык, алгыш-кырыш, аңгылажыг ^y, бактажыры, 21 мурнун былаажыры ^{▼▼ Өске бурунгу сөзүглелдерде бо сөстерге «Өлүрүкчү чорук» деп сөстерни немээн.}, арагалаары, эмин эрттир хөглеп-дойлаары болгаш өске-даа ындыг янзылыг чүүлдер-дир. Мен силерни ооң мурнунда-даа сагындырып турдум, ам база катап сагындырып каайн: ындыг чүүлдер үүлгедикчилери Бурганның Чагыргазын канчаар-даа салгап албас ^aa.

22 А Сүлдениң үре-түңнели бо-дур ^ab: ынакшыл, өөрүшкү, амыр-тайбың, шыдамык болгаш буянныг чорук, энерел, бүзүрел, 23 томаарыыры болгаш бодун туттунуп билири. Ол бүгүнү буруу шавар кандыг-даа хоойлу чок! ^ac 24 Христос Иисуска хамааржыр улус боттарының бачыттыг бүдүжүн ооң хамык күзээшкиннери ^ad болгаш хандыкшылдары-биле катай-хаара белдир-ыяшка хере шаап каапкан ^ae. 25 Бистиң амыдыралывыстың үнер дөзү Сүлде болганда, Ооң аайы-биле амыдырап көрээли! 26 Ынчангаш адыыргак болбаалы, бот-боттарывыска хорадаваалы база адааргаваалы ^af.