Gen 46 | TyvTUV | STEP | Израиль бар-ла өнчүзүн ап алгаш, орукче үнүпкен. Беэр-Шевага келгеш, ачазы Исаактың Бурганынга өргүлдер салган .

‏ Genesis 46

Иаковтуң Египетче аян-чоруун Бурганның деткээни

1 Израиль бар-ла өнчүзүн ап алгаш, орукче үнүпкен. Беэр-Шевага келгеш, ачазы Исаактың Бурганынга өргүлдер салган ^a. 2 Дүне дүжүнде Бурган ону: «Иаков! Иаков!» – деп кыйгырарга, ол: «Дыңнап тур мен» – дээн. 3 Бурган аңаа: «Мен сээң ачаңның Бурганы-дыр мен. Кортпа, Египетче чорувут. Ол черге сенден улуг чонну чаяап каар мен. 4 Мен сээң-биле кады Египетче чоруптар мен. Оон дедир база үндүрүп каар мен ^b. Өлүп каарыңга, Иосиф бодунуң холу-биле сээң карактарыңны шимдиндир суйбап каар» – деп чугаалаарга, 5 Иаков Беэр-Шевадан чорупкан. Оолдары ачазы Иаковту, боттарының кадайларын, ажы-төлүн фараоннуң бергени тергелеринге олурткаш, чорупканнар. 6 Ханаан черге азырап чорааны мал-маганын, эдилеп чорааны эт-хөреңгизин ап алгаш, Иаков бодунуң бүгү төрел аймаа-биле Египетке чедип келген. 7 Оолдарын, уругларын база оларның ажы-төлүн – бодунуң бүгү-ле төрел аймаан Египетке эккелген.

Иаковтуң үре-салгалының даңзызы

(1 Чыл. 2:1-5)

8 Египетке чедип келген израиль чоннуң даңзызы бо-дур ^c.

Иаков болгаш ооң оолдары.

Иаковтуң дун оглу: Рувим. 9 Рувимниң оолдары: Энох, Фаллу, Хецрон болгаш Харми ^d.

10 Симеоннуң оолдары: Иемуил, Ямин, Огад, Яхин, Цохар база хананей херээженден төрүттүнген Саул ^e.

11 Левийниң оолдары: Гирсон, Кохат болгаш Мерари ^f.

12 Иуданың оолдары: Ир, Онан, Шела, Фарес, Зерах. А Ир биле Онан ханаан черге-ле чок апарганнар ^g. Фарестиң Хецрон биле Хамул деп оолдары турган.

13 Иссахарның оолдары ^h: Тола, Фува, Яшув ^{▼▼ Өске бурунгу сөзүглелде «Иашув» эвес, а «Иов» деп бижээн.} болгаш Шимрон.

14 Завулоннуң оолдары: Серед, Элон, Яхлеил ^j.

15 Оон аңгыда Иаков Дина деп кыстыг турган. Бо оолдар, кыстар – үжен үш кижи – Лия биле Иаковтуң Паддан-Арамга чурттап турган үезинде өзүп-көвүдээн үре-салгалы чүве-дир.

16 Гадтың оолдары: Цифион, Хагги, Шуни, Эцбон, Эри, Ароди, Арели ^k.

17 Асирниң оолдары: Имна, Ишва, Ишви, Брия база кыс уруу Серах. Брияның оолдары: Хевер биле Малхиил ^l. 18 Бо уруг-дарыг – он алды кижи – Лаванның уруу Лияга чалча кылдыр берип кааны Зелфа биле Иаковтуң үре-салгалы чүве-дир.

19 Иаковтуң кадайы Рахилдиң оолдары: Иосиф биле Вениамин. 20 Илиопольда ^m бараалгакчы Поти-Фераның уруу Асенет Иосифке Манассия биле Эфремни египет черге божуп берген ⁿ.

21 Вениаминниң үре-салгалы: Бела, Бехер, Ашбел, Гера, Нааман, Эхи, Рош, Муппим, Хуппим, Ард ^o. 22 Бо оолдар – он дөрт кижи – Рахил биле Иаковтуң үре-салгалы чүве-дир.

23 Данның оглу: Хушим ^p.

24 Неффалимниң оолдары: Яхцеил, Гуни, Иецер, Шиллем ^q. 25 Бо оолдар – чеди кижи – Лаванның уруу Рахилге чалча кылдыр бергени Валла биле Иаковтуң үре-салгалы чүве-дир.

26 Иаков-биле кады Египетке чедип келген ооң дорт салгакчылары, келиннерин санаваска, шупту алдан алды кижи чүве-дир. 27 А Иосифтиң ийи оглу Египетке төрүттүнген турган. Ынчангаш Иаковтуң Египетче көжүп келген төрел бөлүүнүң саны чеден ^{▼▼ Өске бурунгу сөзүглелде «чеден беш» деп бижээн.} кижи турган ^s.

Иаковтуң өг-бүлезиниң Египетке чедип келгени

28 Гесемче баар орукту айтып берзин дээш, Иуданы Иаков эртежик-ле Иосифче чорудупкан турган. Олар Гесемге чедип кээрге, 29 Иосиф бодунуң чуузазын белеткээш, ачазы Израильди уткуп, Гесемче чорупкан. Ачазын көрүп кааш, Иосиф оон куспактаныпкаш, дыка үр ыглап келген. 30 Израиль Иосифке: «Оглум, сени көрүп алганымда, ам өлүп калзымза-даа, ажырбас!» – дээн. 31 Иосиф бодунуң акыларынга болгаш төрелдеринге: «Фараонга барып: „Ханаандан мээң акыларым болгаш төрелдерим чедип келди. 32 Олар малчыннар болгаш, мал-маганын ап алгаш келген“– деп чугаалаайн. 33 Фараон силерден: „Кандыг ажыл-агыйлыг силер?“– деп айтырарга, 34 „Бис, силерниң чалчаларыңар, өгбелеривис дег, бичиивистен тура кадарчылар улус бис“– дээр силер. Ынчан силерни Гесемге чурттадып арттырып каар. Чүге дээрге хой кадарчыларын египетчилер ческинчиг деп санаар улус-тур ^t» – дээн.