Genesis 9
Бурганның Ной-биле чагыг-керээзи
1Бурган Нойну болгаш ооң оолдарын алгап-йөрээп турган: «Черни ээлеп чурттаңар, өзүп-төрүп, саныңар көвүдедиңер-ле a. 2Черниң бүгү аңнары, дээрниң бүгү куштары, далайның бүгү балыктары, соястаарлар силерден сестип, силерниң мурнуңарга коргуп-сүрээдээр болзуннар: олар силерниң эргеңерде. 3Мооң мурнунда силерге ногаан үнүштерни берип турганым ышкаш, бүгү дириг амытаннарны Мен силерге чем кылдыр берип тур мен b. 4Ынчалза-даа ханныг эът чивеңер; хан дээрге дириг чүвениң амызы-дыр c. 5Төккен ханыңар дээш, ара үстүнген чуртталга дээш, кым ол ханны төгерил, араатан аң-даа, кижи-даа болза, Мен аңаа кеземчени онаар мен. 6Бир эвес кым-бир кижи өске кижиниң ханын төгер болза, өлүрүкчүнүң ханы база төктүр d. Чүге дээрге кижи Бурганның овур-хевири-биле чаяаттынган болгай! e 7А силер өзүп-төрүп, саныңар көвүдеңер-ле, черни ээлеп, ооң кырынга тараңар-ла». 8Нойга болгаш ооң оолдарынга Бурган чугаалаан: 9– 10«Мен силер-биле болгаш силерниң салгалдарыңар-биле, бажың-хемеден дүжүп келген куштар, аңнар, мал-маган – черле черниң бүгү амылыг амытаннары-биле керээ кылып тур мен. 11Мен силер-биле мындыг керээ чарып тур мен: моон соңгаар суг халавы бүгү амылыг чүвелерни узуткавас, чер кырын хоозуратпас». 12Ооң соонда Бурган мынча дээн: «Силер-биле болгаш бүгү амылыг чүвелер-биле Мээң мөңге шагда чарган керээмниң бадыткалы бо-дур: 13Мен Бодумнуң ча-челээжимни черниң чурттакчылары-биле Мээң керээмниң демдээ кылдыр булуттарда азып кагдым. 14Кажан Мен дээрге булуттарны чыыптарымга, орта челээш көстүп кээр. 15Ынчан Мен Бодумнуң силер-биле болгаш бүгү-ле амылыг амытаннар-биле чарган керээмни бодап келгеш, силерни узуткаар суг халавы черле болдурбас мен. 16Булуттарда челээш көстүп кээрге, ону көрүп кааш, Мен черниң чурттакчылары-биле Бодумнуң мөңгеде чарган керээмни бодап кээр мен. 17Ол дээрге черде чурттап турарлар-биле Мээң кылган керээмниң демдээ-дир».Хаамның бачыды база Ханаанның каргаттырганы
18Нойнуң бажың-хемеден үнүп келген оолдары – Сим, Хаам база Иафет. (Хаам дээрге Ханаанның ачазы-дыр.) 19Олар үжелээн Нойнуң оолдары, а олардан чер кырында бүгү чоннар тывылган. 20Ной чер болбаазырадып эгелээн. Ол виноград тарып алгаш, 21ооң арагазын ижипкеш, эзирип калган. Ынчан ол идик-хевин ужулгаш, бодунуң майгынынга эвеген удуп чыткан f. 22Ооң эвегенин Хаам (Ханаанның ачазы) көрүп кааш, ол дугайын даштында турар ийи акызынга чугаалаан g. 23Ынчан Сим биле Иафет идик-хеп ап алгаш, майгынче дедирленип алгаш киргеш, ачазын шып кааннар. Ачазының эвегенин олар көрбээннер. 24– 25Ной сергей берген оттуп келгеш, эң биче оглунуң ону көргенин билип кааш, мынча дээн: «Ханаанны каргап тур мен! Акыларының эң чөгенчиг кулу болзун!» 26Оон ыңай мынча дээн:«Симниң Бурганы, Дээрги-Чаяакчыга алдар!А Ханаан Симниң кулу болзун!
27Иафеттиң девискээрин Бурган делгемчидер болзун ▼
▼ Еврей дылда «Иафет» деп ат «делгемчидер» деп сөске дөмейлешкек.
.Иафеттиң салгалы Симниң майгыннарынга чурттаар болзун.
А Ханаан Иафеттиң кулу болзун!»
28Суг халавы болганының соонда Ной 350 чыл чурттаан. 29Ной 950 харлыында мөчээн.
Copyright information for
TyvTUV