Hab 2 | TyvTUV | STEP | Доскуулдап туруп алгаш , суургадан хайгаарап көрүп, Дээрги-Чаяакчының меңээ чүү дээрин, мээң хомудалымга Ооң канчаар харыылаарын билип ап көрейн.

‏ Habakkuk 2

1 Доскуулдап туруп алгаш ^a, суургадан хайгаарап көрүп, Дээрги-Чаяакчының меңээ чүү дээрин,
мээң хомудалымга Ооң канчаар харыылаарын ^{▼▼ Өске бурунгу сөзүглелдерде «Мээң канчаар харыылаарымны» деп бижээн.} билип ап көрейн.

Бурганның харыызы

2 Дээрги-Чаяакчы меңээ мынча деп харыылаан:

«Мээң чорутканым көстүүшкүннү бижип каг –
номчуп турар кижиге билдингир болзун дээш ^{▼▼ Азы: «Ону номчаан кижи маңнап ыңай болзун дээш».},
самбыраларга тода кылдыр шыйып бижип каг ^d.
3 Ол көстүүшкүн бир-ле доктааткан үеге хамааржыр ^e,
боттаныышкынынче чүткүп бар чыдар база черле мегелевес;
ук көстүүшкүн дораан боттанмас-даа болза, шыдажып мана ^f,
чүге дээрге албан чогуп бүдер, үр үеде саадавас ^g.

4 Көрүңер даан, туразы улуг кижиниң сагыш-сеткили арыг эвес,
а актыг-шынныг кижи бүзүрелиниң ачызында амылыг артар ^h.
5 Турамык улусту байлакшылы сотка олуртур ^{▼▼ Бо домактың утказы эки билдинмес. Өске бурунгу сөзүглелде «Байлакшыл» эвес, а «Арага» деп бижээн.}, оларга оожургал бербес,
ынчангаш боттарының ишти-хырнын тамы ышкаш алгыг кылып аар,
ол улус, өлүм-даа дег, пөгери чок ^j;
шупту чоннарны чаалап ап, шупту аймактарны чагырып туруп бээр ^k.

6 Ынчалза-даа ол чоннар шупту оларны кочулап ^l:
„Боттарынга хамаарышпас чүве-биле хөлүн эрттир байып алган улус ат болур!
Долаалар төлевири чыып, чүдүртүнүп алган улус
чежеге дээр ынчап кээрил?“– деп ойзу чугаалажыр.

7 Сеңээ өрелиг улус хенертен тура халышпас бе,
олар оттуп келгеш, сени сириледиппес бе,
оларга үптеттирип албас сен бе?
8 Хөй чоннарны үптеп-тонаан болгай сен;
кижи ханы төккениң дээш,
чурттарга, хоорайларга, ында чурттаан бүгү улуска күчүлел көргүскениң дээш,
арткан бүгү аймактар сени база үптеп-тонап кааптар ^m.

9 Уязын бедик черге тудуп ап ⁿ,
озалдыг байдалдардан бодун айыыл чок болдурар дээш,
аал-оранынга былаап алганы олча чыып алыксап турар улус ат болур!
10 Сээң кара бодалдарың бодуңнуң аал-ораныңны бак атка киирер,
хөй чоннарны узуткап тура, бодуңга хора чедиргениң ол-дур.
11 Ханаларда даштар безин сеңээ удур алгыржы бээр ^o,
оларның сөстерин бажың-балгаттың ыяш ооргалары бадыткаар.

12 Өлүрүүшкүн-биле хоорай таваа салып,
кемниг үүлгедиг-биле орду тудуп турар улус ат болур! ^p
13 Чоннарның ажыл-ижин от чиир деп,
аймактар хей черге хинчектенип ажылдаар деп
Аг-шериглиг Дээрги-Чаяакчы тодарадып кагбаан чүве бе? ^q
14 Чүге дээрге Дээрги-Чаяакчының алдарының дугайында билиг чер-делегей кырынга,
далайны долдур аккан суг дег, нептерей бээр ^r.

15 Өске кижиге килеңин куткан дашка сунуп,
ооң шалдаң-чанагажын көөр дээш,
эзиртир ижиртип турар улус ат болур! ^s
16 Алдар орнунга кочулал-биле пөгер сен,
ам бодуң иш-ле, бужар шалдаңыңны көргүс-ле! ^t
Дээрги-Чаяакчының күчүлүг холунуң сунган дашказы сээң ижер үлүүң апаар ^u,
ат-алдарыңны баксырадыр сен.
17 Ливан чуртту каржы-бак чаңнап турганың дег,
сени база каржы-бак чаңнаар.
Мал-маган кыргып-хыдып турганың дег,
сени база узуткап каар.
Кижи ханы төккениң дээш,
чурттарга, хоорайларга, ында чурттаан бүгү улуска күчүлел көргүскениң дээш,
сени база бак аажылаар.

18 Үнү чок дүрзүлер кылып турар шуткукчу кижи
оозунга идегээр-даа болза,
ол уран-шевер кижиниң кылып кааны дүрзү-бурган –
шуткуп каан меге башкы ^v
ол шевер кижиге кандыг ачы-дуза көргүзерил? ^w
19 Ыяш дүрзүге: „Тынгарлып кел!“,
а чугаа-сөзү чок дашка: „Оттуп кел!“– деп турар улус ат болур!
Ол дүрзү кандыг-бир чүвеге өөредип каап шыдаар бе?
Көрүңер даан, ону алдын, мөңгүн-биле шап каан-даа болза,
амыдыралдың тыныжы ында чок-тур ^x.
20 А Дээрги-Чаяакчы – Бодунуң ыдыктыг өргээзинде ^y,
бүгү чер-делегей Ооң мурнунга ыыт чок турзун! ^z»