Hag 2 | TyvTUV | STEP | Чеди айның чээрби бирде Дээрги-Чаяакчы Аггей медээчини дамчыштыр Бодунуң сөзүн ажыткан:

‏ Haggai 2

Чаа өргээниң келир үедеги өндүр-чаагайы

1 Чеди айның чээрби бирде ^a Дээрги-Чаяакчы Аггей медээчини дамчыштыр Бодунуң сөзүн ажыткан: 2 «Салафиилдиң оглу, Иудеяның чагырыкчызы Зоровавелге ^b, Иоседектиң оглу, дээди бараалгакчы Иисуска база арткан чонга мынча деп чугаала. 3 Силерниң араңарда бо өргээниң биеэги өндүр-чаагай хевирин көрген кижи арткан бе, ам ону көөрүңерге, кандыг-дыр? Чөгенчиг чүве бооп сагындырбас-тыр бе? ^c 4 Ынчалза-даа ам сорук кирип көр, Зоровавел – деп, Дээрги-Чаяакчы медеглээн. – Иоседектиң оглу, дээди бараалгакчы Иисус, сен база сорук кирип көр; черниң бүгү чону, сорук кирип, ажылдап эгелеңер, Мен, Аг-шериглиг Дээрги-Чаяакчы, силер-биле кады болгай мен ^d. 5 Египеттен үнүп чоруп туруңарда, силер-биле чарган Мээң чагыг-керээмни күүседиңер, Мээң Сүлдем араңарда бар хевээр-дир ^e, ынчангаш кортпаңар!»

6 Аг-шериглиг Дээрги-Чаяакчы мынча деп чугаалаан: «Үр болбайн, Мен ам бир удаа дээр биле черни, далай биле кургаг черни силгиир деп тур мен ^f. 7 Бүгү чоннарны база силгиир мен, ынчан олар үнелиг белектерин эккээр, бо өргээни чаагай байлак-биле долдурар мен!» Аг-шериглиг Дээрги-Чаяакчының чугаалаан чүвези ол-дур. 8 «Бүгү мөңгүн – Мээңии, бүгү алдын – Мээңии! ^g – деп, Аг-шериглиг Дээрги-Чаяакчы медеглээн. – 9 Бо өргээниң өндүр-чаагайы биеэги өргээниң өндүр-чаагайындан улгады бээр. Мен бо черге амыр-тайбыңны доктаадыр мен». Аг-шериглиг Дээрги-Чаяакчының медеглээн чүвези ол-дур.

Бурганның ачы-буян хайырлаары чоннуң арыындан хамааржыр

10 Дарийниң чагыргазының ийиги чылында, тос айның чээрби дөртте Дээрги-Чаяакчы Аггей медээчиге Бодунуң сөзүн ажыдыпкан: 11 «Аг-шериглиг Дээрги-Чаяакчы ыдыктыг хоойлуга хамааржыр дараазында чүүлдү бараалгакчылардан айтырып көр деп тур: 12 „Бир эвес кандыг-бир кижи ыдыктап каан эътти ^{▼▼ Ыдыктап каан эът – Бурганга өргүл кылдыр салган малдың эъдиниң кезээ (Лев. 6:24-28 көр).} хевиниң эдээнге ораап алгаш чорааш, эдээ-биле далган-тараага, быдаага, арагага, үске азы өске-бир аъш-чемге дээпкен болза, ол аъш-чем база ыдыктыг апаар бе?“»

Аггей ону айтырарга, Бурганның бараалгакчылары: «Чок» – деп харыылаан.

13 Аггей оон: «Бир эвес кандыг-бир кижи өлүг кижиге дегген соонда, арыг эвес апаргаш, ол бүгү аъш-чемге дээптер болза, аъш-чем база арыг эвес апаар бе?» – деп айтырган. А бараалгакчылар: «Арыг эвес апаар» – деп харыылаан ⁱ. 14 Аггей ынчан Дээрги-Чаяакчының бо медеглелин дамчыткан: «Бо чон ындыг-дыр, бо улус Мээң мурнумга ындыг-дыр, оларның ажаап ап турар дүжүдү ындыг-дыр. Ол улустуң эккеп салып турар өргүлдери шупту арыг эвес-тир ^j.

15 Ынчангаш амдыгааштан эгелээш, бо чүүлдү утпайн көрүңер. Дээрги-Чаяакчының өргээзиниң таваанга чаңгыс-даа даш салдынмаан турда, байдалыңар кандыг турган ийик? 16 Бир хөпээнден чээрби хемчээл хире тараа чыып аар бодап чедип келген улус чүгле он хемчээл хирени чыып ап турду; арага дозар савадан бежен хемчээл хирени узуп аар бодап чедип кээрге, чүгле чээрби хемчээл хире арага бар боор турду. 17 Чүге дээрге Мен үнүш-дүжүдүңерже өрттендир чиир изиг хат биле дүдүк салып, тарып алган дүжүдүңерже долу чагдырып, силерни кезедип турдум ^k. Ынчалза-даа силер Менче эглип келбедиңер ^l – деп, Дээрги-Чаяакчы медеглээн. – 18 Амдыгааштан эгелээш, Дээрги-Чаяакчының өргээзиниң таваан салганыңар хүн ^m – тос айның чээрби дөрттен ыңай бо чүүлдү утпайн чоруңар. 19 Аңмаарларда үрезин ам-даа бар-дыр бе? Бо өйге чедир виноград сывы, фига биле гранат ыяжы, олива-даа дүжүт бербейн келди чоп. А бо хүнден эгелээш, Мен силерге ачы-буянны хайырлаар мен ⁿ».

Бурганның Зоровавелге аазаашкыны

20 Дээрги-Чаяакчы Аггейге ол-ла айның чээрби дөртте Бодунуң сөзүн база катап ажыдып чугаалаан: 21 «Иудеяның чагырыкчызы Зоровавелге ^o мону дамчыт. Мен дээр биле черни силгиир деп тур мен; 22 дүжүлгелерде саадаан хааннарны дүжүрер мен, өске чоннар күрүнелериниң күчү-күжүн узуткап каар мен ^p, дайынчы тергелерни башкарган улузу-биле катай ойтур октаптар мен, аъттарны-даа, мунукчуларын-даа чок кылып каар мен ^q, ха-дуңма-даа кижилер бирээзи өскезин хылыш-биле шанчып каар ^r». 23 Аг-шериглиг Дээрги-Чаяакчы мынча дээн: «Салафиилдиң оглу Зоровавел, Мээң чалчам, ол хүн Мен сени Бодумнуң таңмалыг билзээм ^{▼▼ Таңмалыг билзек – кандыг-даа дужаалга ол таңманы базып каарга, күштүг болур. Бурган Зоровавелге Бодунуң дужаалдарын күүседир эрге-чагырганы хайырлаар бооп турары ол (Эсф. 8:8, 10 көр).} дег кылып аар мен ^t, чүге дээрге Мен сени шилип алган болгай мен». Аг-шериглиг Дээрги-Чаяакчының медеглээн чүвези ол-дур.