Heb 1 | TyvTUV | STEP | Эрткен үеде Бурган бистиң ада-өгбевиске Бодунуң медээчилерин дамчыштыр хөй катап, хөй янзы аргалар-биле чугаа кылып келген.

‏ Hebrews 1

Бурганның Бодунуң Оглун дамчыштыр чугаалааны

1 Эрткен үеде Бурган бистиң ада-өгбевиске Бодунуң медээчилерин дамчыштыр хөй катап, хөй янзы аргалар-биле чугаа кылып келген. 2 А бо сөөлгү хүннерде Бурган Бодунуң Оглун дамчыштыр бис-биле чугаалажып турган ^a. Ол Ону бүгүдени чагырар салгакчызы кылдыр томуйлааш ^b, Ону дамчыштыр өртемчейни чаяаган ^c. 3 Оглу дээрге өндүр чырык Бурганның овур-хевири-дир ^d база Ооң алыс бүдүжүнүң кара чаңгыс дөмей овур-дүрзүзү-дүр. Ол Бодунуң күчүлүг сөзү-биле бүгүдени тудуп турар. Ол бисти бачыттарывыстан арыглааш, дээрлерге кымдан-даа бедикке, Дээди Өрүкүнүң оң талазынга барып олурупкан ^e. 4 Бурганның Оглу дээрниң төлээлеринден кайы хире өндүр бедигил, Ооң салгап алган ады оларның аттарындан ол хире алдарлыг ^f.

Оглу дээрниң төлээлеринден өндүр бедик

5 Дээрниң шупту төлээлериниң кайызынга бир шагда Бурган:

«Сен – Мээң Оглум сен, Мен бөгүн Сээң Адаң апардым» – деп чугаалааныл? ^g

Азы: «Мен Ооң Адазы болур мен, а Ол Мээң Оглум болур» – дээнил? ^h

6 Улуг Оглун өртемчейже эккеп тура, Ол:

«Бурганның бүгү төлээлери Аңаа мөгейзиннер» – деп база чугаалаан ⁱ.

7 Бижилгеде дээрниң төлээлеринге хамаарыштыр:

«Ол Бодунуң төлээлерин – хаттар кылып каан,
а бараан болукчуларын – оттуң чалбыыштары кылып каан» деп бижээн ^j.

8 А Оглунга хамаарыштыр:

«О Бурган, Сээң дүжүлгең кезээ мөңгеде турар,
чөптүг чорукту демдеглээн мерге – Сээң чагыргаңның мергези.
9 Сен чөптүг чорукка ынак, а бузутту көөр хөңнүң чок сен.
Ынчангаш Бурган – Сээң Бурганың эш-өөрүң аразындан сени шилип ап,
өөрүшкү-биле чаап кагды» деп бижээн ^k.

10 А оон ыңай:

«Дээрги-Чаяакчы, Сен үе-дүпте чер-делегейни үндезилеп тургустуң,
дээрлер база Сээң холуңнуң чаяалгазы.
11 Чер биле дээр чиде-даа бээрге, Сен артып каар сен.
Олар шупту хеп ышкаш элеп каар;
12 оларны Сен тон ышкаш дүрүп каар сен,
олар, хеп ышкаш, солуттунуп, чиде бээрлер.
А Сен биеэги хевээр сен, Сээң назының төнчү чок» деп бижээн ^l.

13 Дээрниң төлээлериниң кайызынга кажан-бир шагда Бурган:

«Дайзыннарыңны буттарың адаанга эккеп салбаан шаамда,
Мээң оң таламга олур» – деп чугаалааныл? ^m

14 Дээрниң шупту төлээлери кымнар ийик? Камгалалды салгап алыр улуска дузалазыннар дээш чоруткан бараан болукчу сүлделер эвес чүве бе? ⁿ