Heb 10 | TyvTUV | STEP | Ыдыктыг хоойлу – келир үеде кээр ачылыг чүүлдерниң алыс шын хевири эвес, а чүгле хөлегези боор . Ынчангаш ол хоойлу Бурганга мөгейип кээп, чаңгыс-ла ол өргүлдерни чылдың-на доктаамал салып турар улусту кажан-даа болбаазыраңгай кылып каап шыдавас .

‏ Hebrews 10

Баштайгы чагыг-керээниң өргүлдериниң кошкаа

1 Ыдыктыг хоойлу – келир үеде кээр ачылыг чүүлдерниң алыс шын хевири эвес, а чүгле хөлегези боор ^a. Ынчангаш ол хоойлу Бурганга мөгейип кээп, чаңгыс-ла ол өргүлдерни чылдың-на доктаамал салып турар улусту кажан-даа болбаазыраңгай кылып каап шыдавас ^b. 2 Ыдыктыг хоойлу ону кылып шыдаптар турган болза, улус өргүлдер салырын соксап каарлар ийик. Ындыг турган болза, Бурганга мөгейген улус чаңгыс катап боорда, кажан кезээде арыгланып, моон соңгаар кажан-даа бачыттарын медереп билбестер ийик. 3 Ынчалза-даа шак ол өргүлдер чылдың-на бачыттар дугайында сагындырып кээр ^c. 4 Чүге дээрге инек база өшкү малдың ханы бачыттарны чайладып шыдавас.

5 Ынчангаш бо делегейге чедип келгеш, Христос Бурганга мынча дээн ^d:

«Сен өргүлдерим биле белектеримни күзеведиң ^e,
харын мага-ботту Меңээ белеткеп кагдың.
6 Бүрүн өрттедир өргүлдер-даа, бачыт дээш өргүлдер-даа
Сээң хөңнүңге кирбес-тир ^f.
7 Ынчан мынча деп чугааладым: „Бо-дур мен, кел чыдыр мен,
ыдыктыг дүрүг-номда чүнү кылырымны бижээн болгай.
Бурганым, тура-сорууңну күүседир күзелдиг мен“».

8 Эгезинде Ол мынча дээн: «Сен өргүлдерим биле белектеримни күзеведиң, бүрүн өрттедир өргүлдер-даа, бачыт дээш өргүлдер-даа Сээң хөңнүңге кирбес-тир». (Ол бүгү өргүлдерни ыдыктыг хоойлу ёзугаар доктаадып каан.) 9 А оон Ол немеп каан: «Бо-дур мен, тура-сорууңну күүседир күзелдиг кел чыдыр мен». Ол бирги өргүл салыр чурумну күш чок болдургаш, ийигизин доктааткан. 10 Бис Бурганның күзел-соруу-биле Иисус Христостуң чаңгыс катап боорда, кажан кезээде өргүлге салган мага-бодун дамчыштыр ыдыктаткан бис ^g.

11 Бурганның бараалгакчызы бүрүзү хүннүң-не бараан болуушкунун күүседири-биле бут кырынга туруп, кижиниң бачыттарын кажан-даа чайладып күш четпес чаңгыс-ла ол өргүлдерин хөй катап салып турар ^h. 12 А Христос улустуң бачыттары дээш чаңгыс өргүл салгаш, кажан кезээде Бурганның оң талазынга барып олурупкан ⁱ. 13 Оон бээр Ол Ооң дайзыннарын буттарының адаанга эккеп салыптар өйнү ^j манап эгелээн. 14 Ынчангаш Ол ыдыктыг апарып турар кижилерни чаңгыс өргүл-биле кажан кезээде болбаазыраңгай улус кылып каан.

15 Ыдыктыг Сүлде база биске ол дугайында херечилеп турар. 16 «Мен ол хүннерде израиль чон-биле мындыг чагыг-керээ чарар мен» – деп чугаалаан соонда, Дээрги-Чаяакчы мынча дээн:

«Бодумнуң дүрүм-хоойлумну оларның угаан-медерелинче киирер мен,
оларның чүректеринге бижип каар мен.
17 Оларның бачыттары болгаш кем-буруузунуң дугайында оон ыңай сагынмас мен» ^k.

18 А ол бачыттарны өршээген соонда, олар дээш оон ыңай өргүл салган херээ чок.

Христостуң өргүлүнден ойталаары озалдыг

19 Ынчангаш, ха-дуңма, Иисустуң ханының ачызында ам ыдыктыг черже коргуш чок кире берип болур бис ^l. 20 Чаа болгаш дириг орук-биле ^m, көжеге өттүр (азы Ооң мага-бодун өттүр) Ооң биске изеп кааны орук-биле кире берип болур бис ⁿ. 21 Бурганның өг-бүлезин баштап турар Ооң өндүр улуг бараалгакчызы бисте бар-дыр. 22 Ындыг болганда, ажыт-чажыт чок чүректерлиг; бүзүрелинге бүргедипкен; чүректеривисти кем-буруулуг арын-нүүрден бызай чажып туруп арыглап алган ^o база мага-бодувусту арыг суг-биле чуп алган бооп ^p, Бурганче чоокшулап көрээлиңер. 23 Ажыы-биле хүлээп көөрүвүс идегелден салдынмайн туттунаалы ^q, чүге дээрге биске аазаашкын берген Бурган Бодунуң сөзүнге шынчы болгай ^r. 24 Бот-боттарывыска сагыш човангыр бооп, ынакшылче база буянныг херектерже бот-боттарывысты ыдалап көрээлиңер. 25 Чыглып, аралажырындан ойталаваалы ^s (чамдык улус аңгыланып чаңчыга берген болгай), харын бот-боттарывысты деткип көрээли, сөөлгү хүннүң чоокшулап орарын көргеш ^t, улам күштүг деткижээлиңер.

26 Алыс шынны билип алгаш, бачыт үүлгедирин өжегээр уламчылаар болзувусса ^u, ол бачыттарны чайладыптар кандыг-даа өргүл артпас ^v. 27 А ынчан чүгле шииткелди база Бурганга удурланган улусту өрттендир чиптер отту коргуп-сүртеп манаары артар ^w. 28 Моисейниң хоойлузун хажыткан кижини кээргел чокка ийи азы үш херечиниң өчүү-биле өлүмге онаар турган ^x. 29 Ынчаарга Бурганның Оглун таптай баскан, Ооң чагыг-керээзин ыдыктаан ханны ^{▼▼ Азы: «Ол кижини ыдыктаан чагыг-керээниң ханы».} ыдыктыг деп санаваан база Бурганның авыралдыг Сүлдезин дорамчылаан кижиниң кеземчези оон кайы хире коргунчугул?! ^z 30 Кымның: «Менде улустан өжээн негеп, кезедир арга бар» – дээнин, а оон ыңай: «Дээрги-Чаяакчы Бодунуң чонун шиидер» ^aa – дээнин билир бис. 31 Дириг Бурганның кезедир холунче кирери эң коргунчуг! ^ab

32 Алыс шынның чырыын көрүп каан үеңер – биеэги хүннерни сактып келиңер, силер ынчан хилинчекти эң маадырлыы-биле шыдажып эрттиңер. 33 Силерни ынчан бүгү улустуң мурнунга кочулап-шоодуп, хилинчекке онаап турган, шак-ла ындыг байдалды көрүп эрткен улус-биле чаңгыс үүлени деңге үлештиңер. 34 Хоругдаттырган улус-биле безин кады хилинчек көрүп ^ac, эт-хөреңгиңер хунаадып алгаш, өөрүп турдуңар ^ad, чүге дээрге дээрде шыгжаан эки болгаш элеп төнмес эт-хөреңгиңер барын билир турдуңар ^ae.

35 Ынчаар-ла чүреккириңерден ойталаваңар, ол дээш, өндүр улуг шаңнал силернии боор. 36 Бурганның күзел-соруун күүсеткеш, аазаан чүүлүн алыр дизиңерзе, шыдамык боору силерге эргежок чугула.

37 «Ам үр болбайн, чедип кээр ужурлуг Кижи саадал чокка чедип кээр.
38 Бүзүрелиниң ачызында Мээң мурнумга актыг-шынныг кижи амылыг артар,
а оозундан ойталаар болза, Мен ол кижиже ээ көрүнмес мен» ^af.

39 А бис дээрге бүзүрелинден ойталааш, өлүп читпес, харын бүзүрелин кадагалааш, камгалал ап турар улус-тур бис.