Heb 2 | TyvTUV | STEP | Ындыг болганда, агым бисти өскээр алгаш барбазын дээш, дыңнаан чүүлүвүске улам кичээнгейлиг болуулу.

‏ Hebrews 2

Өндүр улуг камгалалдан ойталаарының озалдыы

1 Ындыг болганда, агым бисти өскээр алгаш барбазын дээш, дыңнаан чүүлүвүске улам кичээнгейлиг болуулу. 2 Чүге дээрге дээрниң төлээлерин дамчыштыр медеглээн сөс ^{▼▼ Ыдыктыг хоойлуну бодап турар (Ы. х. к. 33:2; Аж.-ч. 7:53; Гал. 3:19 көр).} ылап күштүг бооп, ону хажыткан база дыңнаваан чорук бүрүзү чөптүг кеземчеге онаажыр болганда, 3 бис база, бодувустуң ээлчээвисте, ол хире өндүр улуг камгалалды тоовайн барзывысса, кеземчеден чайлаар харыывыс кайдал? Ол камгалал дугайында улуска эң баштай Дээрги Иисус медеглээн, а ооң соонда Ону дыңнаан улус биске шынзыдып чугаалаан болгай. 4 Ол медээни Бурган Бодунуң күзел-соруун ёзугаар кайгамчык демдектер, янзы-бүрү күштер-биле база Ыдыктыг Сүлдениң улуска үлээн белектери-биле бадыткаан ^b.

Бурганның Оглу улуска дөмей бооп чедип келген

5 Ооң дугайында чугаалап турарывыс ам кээр өртемчейни ^c Бурган дээрниң төлээлеринге чагырар кылдыр бербээн-не болгай. 6 Бир-ле кижи бир-ле Номда мынча деп херечилеп чугаалаан:

«Кижи деп кымыл ол, Сен ону чүге бодап чоруур сен?
Кижи амытан оглу деп кымыл ол, Сен ол дээш чүге сагыш човаар сен?
7 Сен ону дээрниң төлээлеринден чүгле хензиг-ле куду деңнелдиг ^{▼▼ «Куду деңнелдиг», «кезек өйде» – цитатаны оон алган 8-ки Ыдыктыг ырның чиңгине сөзүглелинде бо сөстер кижи төрелгетенниң делегейде туружунга хамааржып турар. «Еврейлерге чагааның» автору ол сөстерниң аңгы уткалары-биле ойнап, «Иисус кезек өйде дээрниң төлээлеринден куду деңнелдиг апарган» дээн, үеге хамаарышкан утказын ажыглап турар.}
кылып каан сен.
Сен ону ат-алдар болгаш мактал-хүндү-биле демдектедиң,
8 бүгү чүүлдү ооң буттарының адаанга чагырттың» ^e.

Бурган Оглунга бүгү чүүлдү чагырткаш, Ооң чагыргазының адаанга кирбес чүү-даа турбас кылып каан. Ынчалза-даа бүгү чүүлдүң Аңаа чагыртканын ам дээрезинде көрбейн турар бис ^f. 9 Иисусту кезек өйде* дээрниң төлээлеринден куду деңнелче бадырганын бис ам көрүп тур бис. Ол Бурганның авыралы-биле өлүмнүң хилинчээн бүгү кижи төрелгетен дээш, шыдажып эрткен. Ол дээш, Бурган алдар болгаш мактал-хүндү-биле Ону шаңнаан ^g.

10 Бүгү чүүлдерниң Ол дээш база Ооң ачызында бар бооп турары Бурган ^h Бодунуң хөй оолдарының камгалалының Баштакчызын хилинчек дамчыштыр болбаазыраңгай ⁱ кылып каар ужурлуг турган. Бурган хөй оолдарын өндүр бедик байдалга чедирер дээш, ынчаар кылган. 11 Улусту ыдыктыг кылып турар Кижи база ыдыктаттырган улус ^j шупту чаңгыс Бургандан укталган болгай. Ынчангаш Иисуска оларны «ха-дуңма» дээри ыянчыг эвес болган ^k. 12 Ол мынча дээн:

«Сээң адыңны ха-дуңмамга медээлээр мен,
чыыш мурнунга Сени алгап-мактаар мен» ^l.

13 А оон ыңай:

«Мен Дээрги-Чаяакчыга идегээр мен».

А ол ышкаш:

«Мен база Дээрги-Чаяакчының меңээ бергени ажы-төл – бо-дур бис» ^m.

14 – 15 А ол ажы-төл дээрге эът-боттан, хандан бүткен улус болганда, Иисус база улуска бүрүнү-биле дөмей эът-боттуг кижи болу бергеш ⁿ, Бодунуң өлүмүн дамчыштыр өлүмнүң күжүн эдилээн эрликти күш чок болдурган ^o база бүгү назынында өлүмден коргуушкуннуң кулданыынга чораан улусту хостаан ^p. 16 Иисус дээрниң төлээлери дээш эвес, а Авраамның үре-салгалы дээш сагыш човаар болгай. 17 Ынчангаш улус-чоннуң бачыттарын чайладыры-биле Бурганның мурнунга өршээлдиг болгаш шынчы дээди бараалгакчы боор дээш, Иисус бүгү чүүлдерге Бодунуң ха-дуңмазынга дөмей апаар ужурлуг турган ^q. 18 Чүге дээрге Ол, шенелдени Боду шыдап эртип ^r, хилинчекти көрген болгаш, шенелделерни шыдап эртип турар улуска дузалап шыдаар.