Heb 3 | TyvTUV | STEP | Ынчангаш, Бурганның дээрже кый деп алганы ыдыктыг чон боор ха-дуңма, Бурганның Төлээлекчизи болгаш шуптувустуң хүлээп көөрүвүс дээди бараалгакчызынче

‏ Hebrews 3

Бурганның Оглунуң бүзүрелдии

1 Ынчангаш, Бурганның дээрже кый деп алганы ыдыктыг чон боор ха-дуңма, Бурганның Төлээлекчизи болгаш шуптувустуң хүлээп көөрүвүс дээди бараалгакчызынче – Иисусче кичээнгейден салып көрүңер. 2 Иисус Ону дээди бараалгакчы кылдыр салып каан Бурганга, Моисейниң Бурганның бүгү өг-бүлезиниң аразында ^{▼▼ «Өг-бүле», «оран-сава» – грек сөзүглелде чаңгыс сөс боор. А цитаталаан сөзүглелде (Сан. 12:7) еврей сөс «чон, аймак» деп база уткалыг. Автор мында сөстүң янзы-бүрү уткаларын ажыглап турар.} бүзүрелдии ^b дег, бүзүрелдиг бараан бооп келген. 3 Ындыг-даа болза, оран-савага* көөрде, ооң тудукчузунуң мактал-хүндүзү артык боору дег, Иисус Моисейден артык алдар-хүндүге төлептиг. 4 Оран-сава бүрүзүн бир-ле кижи туткан, а бүгү бар чүүлдү Бурган туткан болгай. 5 Моисей Бурганның бүгү өг-бүлезиниң аразынга бүзүрелдиг бараан болукчу дег болган ^c, ооң бараан болуушкуну келир үеде медеглээр ужурлуг чүүлдү айтып турган ^d. 6 А Христос Бурганның өг-бүлезин башкарган Оглу дег бүзүрелдиг! Чоргаараарывыс идегелди эчизинге чедир коргуш чок сагыыр болзувусса, Бурганның ол өг-бүлези – бис бис.

Бурганга шынчы чорукче кыйгырыг

7 Ынчангаш Ыдыктыг Сүлдениң чугаалап турары дег:

«Бөгүн, Бурганның үнүн дыңнап каан болзуңарза,
8 ээн ховуга шенелде хүнүнде үймээн үндүрген үеңерде дег,
чүректериңер дашталдырбаңар.
9 Аңаа силерниң ада-өгбеңер Мени шенеп, хынап турганнар,
дөртен чыл дургузунда Мээң ажыл-херээм көрүп келгеннер.
10 Ынчангаш Мен ол салгалга килеңней бергеш:
„Бо дээрге чүректери үргүлчү будулуп чоруур,
Мээң оруктарымны билип албаан улус-тур“– деп чугаалаан мен.
11 Ынчангаш Мен килеңнээштиң:
„Олар Мээң амыр-дыжым черинче кирбестер“– деп даңгыраглаан мен» ^e.

12 Ха-дуңма, силерниң кайыңар-даа дириг Бургандан хая көрүнген, бачыттыг, бүзүревес чүректиг болбазын дээш, кичээниңер. 13 Харын «бөгүн» деп үе ам-даа барда, бачытка дуурайлатканындан кайыңарның-даа чүрээ дашталбазын дээш, бот-бодуңарны хүннүң-не деткип, сургаңар. 14 Эгезинде бар турган бүзүреливисти эчизинге чедир сагыыр болзувусса, Христос-биле кады чаңгыс баг апарганывыс ол-дур. 15 Ол дугайында Бижилгеде мынча дээн болгай: «Бөгүн, Бурганның үнүн дыңнап кагзыңарза, үймээн үндүрген үеңерде дег, чүректериңер дашталдырбаңар» ^f.

16 Бурганның үнүн дыңнааш, Аңаа удур үймээн үндүрген кымнарыл ол? Моисейниң Египеттен үндүрүп эккелген улузу шупту эвес ийикпе? ^g 17 Дөртен чыл дургузунда Бурган кымга килеңнеп келгенил? ^h Бачыт үүлгеткени дээш, ээн ховуга мөчү-сөөгүн салган улуска эвес ийикпе? ⁱ 18 Олар Ооң амыр-дыжының черинче кажан-даа кирбес деп, Бурган кымга даңгыраглааныл? ^j Ону дыңнавайн барган улуска эвес ийикпе? 19 Ынчангаш Аңаа бүзүревээн болгаш ^k, олар Ооң амыр-дыжының черинче кирип шыдаваанын көрүп тур бис.