Heb 5 | TyvTUV | STEP | Бурганның дээди бараалгакчызы бүрүзүн улус аразындан шилип алыр. Ол Бурганның мурнунга чонга бараан боор төлээ бооп, улустуң бачыттары дээш өргүл белектерин салыр хүлээлгелиг .

‏ Hebrews 5

1 Бурганның дээди бараалгакчызы бүрүзүн улус аразындан шилип алыр. Ол Бурганның мурнунга чонга бараан боор төлээ бооп, улустуң бачыттары дээш өргүл белектерин салыр хүлээлгелиг ^a. 2 Шак ындыг Бурганның дээди бараалгакчызы боду база кошкак кижи болгаш ^b, бүдүүлүк-дүмбей, будулган улусче ээ көрнүүчел боор ужурлуг. 3 Ол кошкак кижи болган ужурунда, чүгле чоннуң бачыттары дээш эвес, а бодунуң бачыттары дээш база өргүл кылыр ужурлуг ^c. 4 Кым-даа ындыг мактал-хүндүнү бодунуң туразы-биле хүлээп албас, а Аароннуң кыйгыртканы ышкаш, Бурганга кыйгырткан турар ужурлуг ^d.

5 Христос база Бурганның дээди бараалгакчызы боорунуң алдар-хүндүзүн Бодунга Боду хүлээп албаан ^e. А Бурган Аңаа мынча дээн:

«Сен – Мээң Оглум сен,
Мен бөгүн Сээң Адаң апардым» ^f.

6 Бижилгениң өске-бир черинде Ол:

«Мелхиседек ышкаш, Сен кезээ мөңгеде Бурганның бараалгакчызы сен» – деп база чугаалаан ^g.

7 Бодунуң чер кырынга амыдыралының үезинде Иисус Ону өлүмден камгалап шыдаар Бурганга мөргүп, ыыткыр човууртап база карааның чажын төп, чалбарган ^h. Иисусту Бурган Ону хүндүлээни дээш дыңнап каан-даа болза ⁱ, 8 Иисус Оглу-даа турган болза, Ол көрүп эрткен хилинчээн дамчыштыр дыңнангыр чорукка өөренип алган ^j. 9 Иисус болбаазыраңгай апаргаш ^k, Ону тооп дыңнаар бүгү улуска мөңге камгалалдың үнер дөзү болу берген, 10 чүге дээрге Бурган Ону, Мелхиседекти ышкаш, Бодунуң дээди бараалгакчызы кылдыр чарлаан.

Бүзүрелден ойталаваңар

11 Ол бүгүнүң дугайында оон-даа хөйнү чугаалап боор мен, ынчалза-даа силерге тайылбырлаары берге-дир, чүге дээрге дыңнааш, угааптар шааңар чок-тур ^l. 12 Шагда-ла башкылар болу бээр ужурлуг улус-тур силер, ынчалза-даа Бурганның сөстериниң кол үндезининиң эге билиглеринге база катап бир-ле кижиге башкыладыры силерге чугула-дыр. Силерге кадыг чем эвес, а сүт херек-тир! ^m 13 Ынчаарга сүт-биле чемненип турар кижи шын өөредигге дуржулга чок боор, чүге дээрге ол чаш төл хевээр-дир. 14 А кадыг чем чедишкен улуг улуска хамааржыр ⁿ. Дуржулгага даянгаш, оларның угаан-медерели буянны бузуттан ылгап чаңчыккан-дыр.