Hos 1 | TyvTUV | STEP | Озия, Иоафам, Ахаз болгаш Эзекия оларның Иудеяны чагырып турганы база Иоастың оглу Иеровоамның Израильди чагырып турганы чылдарда Дээрги-Чаяакчының Беериниң оглу Осияга ажыдып чугаалаан сөзү бо-дур.

‏ Hosea 1

1 Озия, Иоафам, Ахаз болгаш Эзекия оларның Иудеяны чагырып турганы база Иоастың оглу Иеровоамның Израильди чагырып турганы чылдарда ^a Дээрги-Чаяакчының Беериниң оглу Осияга ажыдып чугаалаан сөзү бо-дур.

Осияның кадайы болгаш ажы-төлү

2 Дээрги-Чаяакчы Осия-биле мынчаар чугаалажып эгелээн. Ол аңаа: «Барып, самыын-садар кадайдан ап ал, ооң самыын харылзаазындан тывылган ажы-төлдүг бол ^b, ол чорук бо черниң улузу Дээрги-Чаяакчыдан ойталап, аажок самыырап турарынче айтыр ^c» – дээн. 3 Ынчангаш Осия Дивлаимниң уруу Гомерни кадай кылдыр ап алган. Демгизи саатталгаш, аңаа оол уруг божуп берген чүве-дир. 4 Дээрги-Чаяакчы Осияга: «Бо чаш төлдү Изреел деп адап аар сен, ол ат удавайн Иеху хаанның салгалын Изреел хоорайга төгүлген хан ^d дээш кезедиримче, Израильдиң салгалының күрүнези турарын соксадырымче айтыр. 5 Шииткелим хүнү кээрге, Мен Изреел шынаазынга ^e Израильдиң чазын сыйып каар мен» – дээн.

6 Гомер база катап саатталгаш, кыс уруг божуп алган. Дээрги-Чаяакчы Осияга: «Бо чаш төлдү Ло-рухама ^{▼▼ Ло-рухама – «Ээ-хайыра албаан» дээн уткалыг ат.} деп адап аар сен, ол ат израиль чонну моон соңгаар өршээвезимче, аңаа ээ-хайыра көргүспезимче айтыр ^g. 7 А Иудеяның чонунга ээ-хайыра көргүзерин уламчылап, оларны чаа-дайын: ча-согун, хылыш болгаш дайынчы аъттарлыг шериглер-биле эвес, а ооң Дээрги-Чаяакчы Бурганының ачызы-биле камгалаар мен ^h» – дээн.

8 Ло-рухаманы эмзирип доруктурган соонда, Гомер база катап саатталгаш, оол уруг божуп алган. 9 Дээрги-Чаяакчы ынчан: «Бо чаш төлдү Ло-амми ^{▼▼ Ло-амми – «Мээң чонум эвес» дээн уткалыг ат.} деп адап аар сен, ол ат силер – Мээң чонум болбазыңарже, Мээң силер-биле харылзаа тутпазымче айтыр» – дээн.

Дээрги-Чаяакчының израиль чонну катап тургузарын аазааны

10 «Ынчалза-даа алызында израиль чоннуң саны далайның санап четпес элезини ышкаш көвүдей бээр ^j. Израильчилерге улустуң: „Ооң чону эвес силер“– деп турган черинге: „Дириг Бурганның ажы-төлү силер“– деп, оларга улус чугаалай бээр ^k. 11 Иудеяның, Израильдиң чону ынчан каттыжып чыылгаш ^l, боттарын чагырар чаңгыс баштыңчы олуртуп алгаш, боттарының черинге үнүш дег өзүп үнүп кээр ^{▼▼ Азы: «Үндүр сывыртадып алган черинден дедир чанып кээр».}. Изреелдиң ^{▼▼ Изреел – «Бурган тарып турар» дээн уткалыг ат. Израильдиң өзүп-көвүдээринче, ооң чериниң дүжүткүр болурунче айтып турар.} хүнү өндүр улуг болур!