Hos 10 | TyvTUV | STEP | Израиль – чечектелген виноград сывы , ол хөй чимис берип турар; ооң чимизи көвүдээн тудум, улам хөй өргүл бедигээштери тудуп аар, ооң чери эки болган тудум, даш көжээлерин каастаары дам баар.

‏ Hosea 10

Хаанның база дүрзү-бугажыктың төнчүзү

1 Израиль – чечектелген виноград сывы ^a, ол хөй чимис берип турар; ооң чимизи көвүдээн тудум, улам хөй өргүл бедигээштери тудуп аар,
ооң чери эки болган тудум, даш көжээлерин каастаары дам баар.
2 Израильчилерниң сеткил-чүрээ Дээрги-Чаяакчыга шынчы эвес,
ол кем-буруузу дээш, олар кеземче алыр:
Дээрги-Чаяакчы оларның өргүл бедигээштерин үреп кааптар,
даш көжээлерин чуура шавар.

3 Израильчилер ынчан: «Бисте ам хаан чок-тур,
Дээрги-Чаяакчыдан-даа кортпайн турган болгай бис.
Хаан турар-даа болза, ол биске кандыг ажык-дузалыгыл?!» – дижир.
4 Олар хоозун сөстер чугаалап, меге даңгырак берип,
өске чоннар-биле эвилелдежип турарлар,
андазын чарган черде үнген хоран оът дег,
чөптүг шииткелди хажыдып турарлар ^{▼▼ Азы: «Ынчангаш Бурганның шииткели болур».}.

5 Самарияның чурттакчылары Бет-Авенде дүрзү-бугажыкка ^c мөгеер дээш барып турар;
ол дүрзүге мөгеер чон-даа, ооң өөрүп турган бараалгакчылары-даа
ол дээш кажыыдап, ыглажыр.
Чүге дээрге дүрзүнүң каас-чаражын чок кылып каар,
6 ооң бодун Ассирияже – өндүр улуг хаанга ^{▼▼ Азы: «Иарев хаанга» (Ос. 5:13 көр).} белек кылдыр – алгаш баар;
Эфрем бак атка кирер,
бодунуң кара сагыштыг бодалының ужун
Израильдиң ады баксыраар.
7 Самарияның хааны, сугда салдаан чарты дег, чиде бээр.

8 Бет-Авенде мөгейиишкин кылыр бедик черлерни –
израиль чоннуң бачыт үүлгедип турар черлерин үреп бузуп кааптар.
Израильчилерниң өргүл бедигээштеринге
тенниг үнүштер биле бок сиген үнүп кээр;
олар дагларга: «Бисти дуглай дүжүңер!» – деп,
тейлерге: «Бисче кээп дүжүңер!» – деп чанныр ^e.

9 «Израиль, Гиваның үезинден бээр ^f бачыт үүлгедип келген сен;
израильчилер ол хевээр артып калган;
Гивага шак ол бак сагыштыг улусту дайын таварбас бе?
10 Израильчилерни күзээним ёзугаар кезедир мен,
өске чоннар оларга удур чыглып кээр,
ынчан ийи кемниг херээ дээш, олар хүлүттүрүп аар.

11 Эфрем – өөредип каан, тараа бастырарынга ынак инек-тир ^g,
ооң быжыг мойнунга хомутту Мен Бодум кедирер мен;
Эфремни мунар мен, Иудея – чер аңдарар, Израиль – чер илииртээр.
12 Чөптүг-шынныг чорукту бодуңарга тарып алыңар ^h –
энерелди ажаап аар силер; кур черни аңдарыңар ⁱ,
чүге дээрге Дээрги-Чаяакчыже чүткүүр үе келген-дир –
Ол чедип келгеш, шын шииткелди силерже чагдырар.

13 Бузутту болбаазыраттыңар, оон кем-буруу ажаап алгаш,
мегениң дүжүдүн чип алдыңар ^j,
чүге дээрге бодуңарның орууңарга, эңдерик аг-шерииңерге идегеп турдуңар.
14 Сээң чонуңга удур чаа-дайын үнер,
Салманның ^k Бет-Арбел хоорайны тулчуушкун үезинде үреп бускаш,
аваларны ажы-төлү-биле катай чылча октап-шывадап турганы дег ^l,
сээң бүгү шивээлериңни үреп бузуп каар!
15 Үүлгеткен кедергей бузудуңар дээш,
Вефилдиң чурттакчылары силерни ынчаар бак аажылаар».