Hos 12 | TyvTUV | STEP | Эфрем хат кадарып, өрттендир чиир хатты сүрүп турар , хүннү бадыр мегени, хоозураашкынны көвүдедип турар. Израильчилер Ассирия-биле-даа эвилелдежип, Египетче-даа белек кылдыр олива үзү чорудуп берип турар .

‏ Hosea 12

1 Эфрем хат кадарып, өрттендир чиир хатты сүрүп турар ^a, хүннү бадыр мегени, хоозураашкынны көвүдедип турар.
Израильчилер Ассирия-биле-даа эвилелдежип,
Египетче-даа белек кылдыр олива үзү чорудуп берип турар ^b.

2 Дээрги-Чаяакчы Иудея-биле база чаргылдажып турар,
Ол Иаковтуң үре-салгалынга ооң оруктары дээш,
үүлгеткен херектерин барымдаалап, кеземче онаар.
3 Иаков иезиниң иштинге-ле бодунуң акызын ажып эрткен ^{▼▼ «Ажып эрткен» деп кылыг сөзү еврей дылда Иаков деп атка дөмей дыңналыр (Э. д. 25:26; 27:36 көр).},
а күш-шыдалы четчи бергеш, Бурган-биле сегиржип алган ^d.
4 Ол Бурганның төлээзи-биле хүрешкеш, тиилеп кааш,
Бургандан ачы-буян дилеп, ыглап турган;
Вефилге Бурган аңаа ^{▼▼ Өске бурунгу сөзүглелде «аңаа» эвес, а «биске» деп бижээн.} ужуражып, чугаалашкан ^f.

5 Дээрги-Чаяакчы – Аг-шериглиг Бурган-дыр,
Ооң ат-дужаалы – Дээрги-Чаяакчы ^g.
6 Сен бодуңнуң Бурганыңче эглип кел,
ээ-хайыралыг база чөптүг бол ^h, Аңаа кезээде идеге.

7 Хананей садыгжылар шын эвес деңзилээр деңзи тудуп алгаш,
улустан чүве мегелеп чииринге ынак ⁱ.
8 Эфрем: „Мен-даа олар ышкаш байыдым ^j, эт-хөреңги чыып алдым.
Мээң бүгү ажыл-херээмден улус хоойлуга удурланышкак,
бачыт деп санадыр чүү-даа чүве тыппас“– деп чугаалаан.

9 А Мен Египетке чурттап турган үеңден бээр
сээң Дээрги-Чаяакчы Бурганың болгай мен;
байырлалдар хүннеринде дег ^{▼▼ Чадырлар байырлалының дугайында чугаалап турар (Лев. 23:39-43 көр).},
сени база катап чадырларга чурттадып каар мен.
10 Мен Бодумнуң медээчилерим-биле чугаалажып,
оларже чоруткан көстүүшкүннеримни көвүдедип,
медээчилерни дамчыштыр чонну сагындырып турган мен ^{▼▼ Еврей сөзүглелде бо сөстерниң утказы эки билдинмес. Болгу дег өске утказы мындыг: «Медээчилерни дамчыштыр угаадыглыг чугаалар-биле чугаалап турган мен».}.
11 А Галаад бузутка бердинген-дир ^m, ооң чону чөгенчиг улус апарган-дыр.
Олар Галгалга өргүл кылдыр бугажыктар салып турган-дыр ⁿ,
оларның өргүл бедигээштери аңдарган шөлде оваалай чыгган даштар дег-дир.

12 Иаков Арам дээр чуртче дезе берген;
Израиль аңаа күдээлеп, кадайы дээш ажылдап берип,
өгленир дээш хой кадарып турган ^o.
13 Дээрги-Чаяакчы израиль чонну Египеттен медээчизин дамчыштыр үндүре бергеш,
база-ла медээчизин дамчыштыр кадагалап турган ^p.
14 Эфрем Дээргизин дыка-ла хорадаткан ^q,
өлүрүкчү чоруу дээш буруузун ол боду чүктээр,
ол Дээргизин куду көрген дээш,
Дээрги ооң бодун куду көрдүрер.