Hos 13 | TyvTUV | STEP | «Эфрем чүве чугаалаарга, улус сүрээдеп, сирилээр турган; ол Израильге бедик турушту ээлеп алган, ынчалза-даа Ваал бурган дээш буруудап , өлүп калган.

‏ Hosea 13

Дээрги-Чаяакчы Израильди үзерлеп кааптар

1 «Эфрем чүве чугаалаарга, улус сүрээдеп, сирилээр турган; ол Израильге бедик турушту ээлеп алган,
ынчалза-даа Ваал бурган дээш буруудап ^a, өлүп калган.
2 Ам израильчилерниң бачыт үүлгедири дам барган-дыр:
ус-шевер улус оларга дүрзү-бурганнарны мөңгүнден шуткуп,
чогаадып кылып берип турар-дыр;
израильчилер оон дүрзү-бурганнар-биле чугаалажып,
оларга өргүлдер салып турар-дыр;
кижилер шуткумал бугажыктарны ^b ошкап турар-дыр!
3 Ол чоруу дээш, израильчилер эртенги туман ышкаш дүрген эстип чиде бээр,
олар эрип каар шалың дег ^c, шаңдан хадаан тараа саваңы дег,
хоолайдан үнген ыш дег апаар ^d.

4 А Мен – египет черге турган үеңден бээр,
сээң Дээрги-Чаяакчы Бурганың болгай мен,
сен Менден өске Бурган билбес сен,
Менден өске Камгалакчы-даа чок ^e.
5 Ээн кургаг ховуга, кадып калган черге
сенче сагыш салып турган мен ^f.
6 Одар-белчиирлиг апаргаш, израильчилер тодуг-догаа болу берди,
а тода бергеш, туразы улгадып, Мени уттупту ^g.

7 Мен оларга арзылаң дег болур мен,
пар дег, орук чанынга кедээр мен ^h.
8 Оларже оолдарын оскунган кыс адыг дег халдааш ⁱ,
хөрек-чүрээн үзерлээр мен; арзылаң ышкаш чиир мен;
черлик аң-араатан оларны үзерлеп кааптар.

9 Израиль, сээң узуткаттырар үең келди,
чүгле Мен сеңээ дузалап боор мен.
10 Сээң хааның ам кайдал?
Ол сени бүгү хоорайларыңга камгалап алзын че!
Баштыңнарың кайдал? Сен: „Биске хаандан, нояннардан берем!“– деп
дилеп турдуң чоп ^j.
11 Мен килеңней бергеш, сеңээ хаан бердим,
хорадай бергеш, ону хунаап алдым ^k.
12 Эфремниң кем-буруузун доңнай баглап каан,
ооң бачыдын шыгжап каан – Мен ону утпас мен.
13 Эфрем угаан чок оол-дур,
херээжен кижи ону божуп чыдырда дег,
ол хилинчектенип турар,
ынчалза-даа хырындан үнер хөңнү чок-тур ^l.
14 Мен израильчилерни өлүглер оранының эрге-чагыргазындан
адырар мен бе? ^m
Чок, оларга кээргел көргүспес мен! ⁿ
Өлүм, сээң хамчык аарыың кайыл? ^o
Алдыы оран, сээң халдавырлыг аарыың кайыл? ^{▼▼ Бо домактың болгу дег өске утказы мындыг: «Израильчилер, силерге Мен өлүмнүг хамчык аарыг дег болур мен, алдыы оранче аппаар халдавырлыг аарыг дег болур мен».}

15 Эфрем акы-дуңмазынга бодаарга, өзүген-даа болза,
өрттендир чиир хат чедип кээр –
ээн кургаг ховудан Дээрги-Чаяакчының хады көдүрлүр,
ынчан ол хат Эфремниң суунуң бажын соолдуруп каар,
булаан кадырып каар ^q;
ол хат Израильдиң эртине-байлаан үптээр,
ооң бүгү үнелиг чүүлдериниң шыгжамырын куругладыр.