Hos 2 | TyvTUV | STEP | Акы-дуңмаңарны: „Бурганның чону“– деп, угба-дуңмаңарны: „Ээ-хайыра алган“

‏ Hosea 2

1 Акы-дуңмаңарны: „Бурганның чону“– деп, угба-дуңмаңарны: „Ээ-хайыра алган“– деп адап аар силер ^a».

Дээрги-Чаяакчы израиль чонну буруудаткаш, кезедир

2 «Аваңар-биле ^b чаргылдажыңар-ла, чаргылдажыңар,
чүге дээрге ол – Мээң кадайым эвес-тир,
а Мен – ооң ашаа эвес-тир мен;
аваңар бодунуң самыын чоруун – арнындан,
өскерликчи чоруун – эмиглеринден ап каапсын.
3 Оон башка Мен ооң хевин уштуп, шалдаңнааш,
чаа төрүттүнгенинде дег көзүлдүр тургузуп каар мен ^c:
ону ээн кургаг хову ышкаш кылып,
када берген чер кылдыр хуулдурар мен,
кагыдып-суксадып өлүрүп каар мен.
4 Ооң ажы-төлүнге-даа ээ-хайыра көргүспес мен ^d,
чүге дээрге олар самыын харылзаадан тывылган төлдер-дир ^e;
5 оларның авазы самыын-садып турган,
төрээн иези бодунуң адын баксырадып:
„Хандыкшааннарымга барайн, олар мени аъш-чем, суг, дүк, лён,
олива үзү болгаш суксуннар-биле хандырып турар болгай“– деп турган.

6 Ол бүгү дээш, Мен ооң оруун теннер-биле моондактаар мен,
херим-биле долгандыр кажаалаар мен,
ол ынчан оруундан аза бээр.
7 Ол херээжен бодунуң хандыкшааннарын сүрүп чоруткаш, четпейн баар,
оларны дилээш, тыппайн баар;
оон ол: „Барып, баштайгы өөм ээзинче ^f эгли берейн,
чүге дээрге ынчан меңээ амгызындан эки турган-дыр“– дээр.

8 Ол херээжен далган-тараа, арага болгаш олива үзүн
Мээң аңаа берип турганымны ^g,
Ваал бурганның дүрзүзүн шуткаан алдын, мөңгүннү
Мээң аңаа көвүдедип бергенимни билбес-тир.
9 Ол дээш, Мен Бодумнуң далган-тараамны – ажаалда үези кээрге,
арагамны – виноград быжар үе кээрге, дедир ап аар мен,
ооң шалдаңын чажырган Бодумнуң дүк, лёнумну хунаап аар мен.
10 Мен ам ооң бужарын хандыкшааннарының мурнунга ажыдар мен ^h,
ынчан ону кым-даа Мээң холумдан камгалап шыдавас.
11 Ооң кандыг-даа хөглүг байырлалдарын:
ай чаазы биле амыр-дыш хүннери демдеглээр байырлалдарын ⁱ,
бүгү-ле байырлалдыг чыыштарын соксадыр мен ^j.
12 Ооң: „Хандыкшааннарымның берген төлевири бо-дур“ ^k –
деп турганы виноград сыптарын, фига ыяштарын куругладыр мен;
оларның үнген сесерлиин арга-эзим кылдыр хуулдуруптарымга,
черлик аң-мең чимистерни чип кааптар.
13 Ваал бурганның дүрзүлеринге бараан болуп,
айдызап турганы дээш ^l, ону кезедир мен;
ол херээжен сыргалар болгаш каасталгалар-биле каастангаш,
хандыкшааннарын сүрүп ^m, Мени уттупкан турган болгай» – деп,
Дээрги-Чаяакчы медеглээн.

Эштежилге хүнү

14 «Ынчангаш Мен ону хандыкшыдып, ээн кургаг ховуга эккелгеш ⁿ,
эргеледип чугаалажыр мен ^o.
15 Ооң соонда Мен аңаа чимистиг шөлдерни бээр мен,
а Хай-халап шынаазын ^{▼▼ Хай-халап шынаазы – еврей сөзүглелде «Ахор шынаазы» дээн. Израильчилер Ханаанны эжелеп эгелээш, ол черге айыыл-халапка таварышкан (Иис. 7:24-26 көр).} идегелдиң кирер эжии кылдыр бээр мен;
ол аңаа бодунуң аныяк үезинде дег,
египет черден үнүп турган хүнүнде дег, Меңээ харыылаар ^{▼▼ Бо сөстерниң болгу дег өске уткалары мындыг: «Ырлай бээр», «Томаарый бээр».}.

16 Ол хүн кээрге, сен Мени „Ашаам!“деп адаар сен – деп,
Дээрги-Чаяакчы медеглээн, –
оон ыңай „Ваалым! ^{▼▼ Ваал – хананей бурганның ады, «дээрги» азы «ээ» дээн уткалыг.}“деп адавас сен.
17 Ол дүрзү-бурганнарның аттарын сээң аксыңдан чайладып кааптар мен,
оларның аттарын улус оон ыңай сагынмастай бээр ^s.

18 Ол хүн кээрге, Мен израиль чон-биле
черлик аң-меңниң, дээрниң куштарының,
черде соястаан амытаннарның аразынга
эп-найырал керээзин чарар мен ^t;
ча-согунну сыйып, сээң чериңге чаа-дайынны узуткап кааш ^u,
айыыл чок чуртталганы сеңээ бээр мен.
19 Сени Бодум-биле кезээ мөңгеде дүгдеп аар мен,
чөптүг-шынныг чорук болгаш шын шииткелди,
энерел болгаш ээ-хайыраны илереткеш,
сени Бодум-биле дүгдеп аар мен ^v.
20 Бердингенимни көргүзүп, сени Бодум-биле дүгдеп аар мен,
Дээрги-Чаяакчыны билген турар сен ^w.

21 Ол хүн кээрге, Мен сеңээ харыы бээр мен – деп,
Дээрги-Чаяакчы медеглээн. –
Мен дээрге дужаарымга, ол черже чаъс чагдырар,
22 чер далган-тараа, виноград, оливаны өстүрер,
а ол аъш-чем Изреелди ^{▼▼ Изреел – мында бүгү Израильге хамааржыр ойзу адаан ат. 1:11-ге немелде тайылбырны көр.} чемгерер.
23 Мен черге Бодумнуң чонумну үнүш дег тарып аар мен ^y,
„Ээ-хайыра албаан“деп аттыг чонга ^z ээ-хайыра көргүзер мен ^aa;
„Мээңии эвес“деп аттыг чонга ^ab: „Сен – Мээң чонум сен“– дээр мен ^ac,
а ол: „Сен – мээң Бурганым сен“– деп харыылаар».