Hos 4 | TyvTUV | STEP | Израиль чон, Дээрги-Чаяакчының сөстерин дыңна! Дээрги-Чаяакчы бо черниң чурттакчылары-биле чаргылдажып турар-дыр , бо черде чөптүг-шынныг чорук, энерел, Бурганны билип аарынче чүткүл чок-тур.

‏ Hosea 4

Дээрги-Чаяакчының Израиль-биле чаргылдашканы

1 Израиль чон, Дээрги-Чаяакчының сөстерин дыңна! Дээрги-Чаяакчы бо черниң чурттакчылары-биле чаргылдажып турар-дыр ^a,
бо черде чөптүг-шынныг чорук, энерел,
Бурганны билип аарынче чүткүл чок-тур.
2 Каргыш салыры болгаш мегелээр чорук,
кижи өлүрер, оорланыр болгаш самыыраар чорук хөлчок нептерээн-дир,
хан төгүүшкүнү даады-ла болуп турар-дыр.
3 Ол бүгү дээш, бо чер ыглап-сыктаар ^b,
ооң чурттакчылары черлик аң-мең болгаш дээрниң куштары-биле кады кырлып каар,
далайның балыктары безин өлүп каар ^c.

4 «Кым-даа өске кижи-биле маргышпазын,
кым-даа өске кижини сойгалавазын.
Бурганның бараалгакчызы, Мен сээң-биле чаргылдажыр мен! ^{▼▼ Еврей сөзүглелде бо домактың утказы эки билдинмес. Болгу дег өске утказы мындыг: «А сээң чонуң Бурганның бараалгакчызы-биле маргыжып турар ышкаш-тыр».}
5 Хүндүс-даа буураар сен, Бурганның медээчизи дүне-даа сээң-биле кады буураар.
Сээң иеңни ^{▼▼ Сээң иең – израиль күрүнени албаты чоннуң иези кылдыр ойзу адап көргүскен бооп чадавас.} база узуткап каар мен.
6 Мээң чонум билииниң четпезинден кырдырып аар ^f;
билигни хүлээп көрбээн бооруңга,
Мен база сени Меңээ бараалгаар кылдыр хүлээп көрбес мен,
Бурганыңның хоойлузун уттупкан бооруңга,
Мен база сээң ажы-төлүңнү уттуптар мен.

7 Бараалгакчылар өзүп-көвүдээн тудум-на,
Меңээ удур бачыт үүлгедири дам баар-дыр;
оларның ат-алдарын бак атче хуулдурар мен.
8 Олар Мээң чонумнуң бачыт дээш өргүлдеринден аштанып-чемненир-дир ^g,
ынчангаш оларның сеткил-сагыжынга чоннуң бачыттыг болуру тааржыр-дыр.
9 Чон-биле болур чүве бараалгакчыларны оюп эртпес,
оруктары дээш, Мен оларны кезедир мен,
үүлгедиглерин ёзугаар оларга кеземче онаар мен ^h.
10 Олар чигеш, тотпас ⁱ, самыырааш, өзүп-көвүдевес,
чүге дээрге Дээрги-Чаяакчыга бараан болуушкунун сагывас апаргаш,
11 самыыраан-дыр.

Мээң чонум арагага, эзиртир суксуннарга алзып алган-дыр ^j.
12 Ол кылып алган ыяш дүрзүзүнден айтыртынып турар-дыр ^k,
даянгыыжы аңаа харыы бээр-дир.
Самыыраашкынның сүлдези оларны астырып каапкан боорга ^l,
олар Бурганындан ойталаан-дыр.
13 Олар даглар баштарынга өргүлдерин эккеп салып,
тейлер кырынга бүгү улуг хөлегелиг ыяштар адаанга
айдызаашкын кылып турар ^m.

Ынчангаш силерниң кыстарыңар самыырап,
кенээттериңер ашактарынга өскерлип турар.
14 Ол кыстарыңарны, кенээттериңерни кезетпес мен,
чүге дээрге эр улузуңар боттары
самыын-садар херээженнер-биле хойгажыр-дыр,
дүрзү-бурганнар өргээлеринге самыын-саткан улус-биле кады
өргүлдер салыр-дыр силер ⁿ,
а чүве билбес чон узуткаттырып турар-дыр.

15 Израильчилер, силер бодуңар самыырап-даа турар болзуңарза,
оода-ла Иудеяны бачытче киирбеңер;
Галгал хоорайже барбаңар ^o, Бет-Авенче ^{▼▼ Бет-Авен – еврей дылдан очулдурарга, «Бузуттуң бажыңы» азы «Дүрзү-бурган бажыңы» дээн уткалыг, мында оон ыңай Вефил хоорайны ойзу адап көргүскен ат (Ос. 5:8; 10:5 көр).} көдүрүлбеңер,
дириг Дээрги-Чаяакчының ады-биле даңгыраглаваңар.
16 Израиль чөрүү бызаа дег дедир апарган-дыр,
таанда-ла Дээрги-Чаяакчы ам ол чонну, хураганнарын дег,
чаагай одарга оъткарар бе?

17 Эфрем дүрзү-бурганнарга хандыкшаан-дыр,
сен ам ооң-биле үрелдешпе.
18 Оларның арагалаары кедерээн-дир,
самыыраашкыны хемчээл чок-тур,
ол чоннуң чагырыкчылары ыянчыг чүүлге ынак-тыр.
19 Эфремни шуурган чалгыннарынга ужудуп аппаар ^q,
израильчилер өргүлдериниң хайындан адын баксырадып аар».