Hos 8 | TyvTUV | STEP | «Трубадан эдис! Израильчилер Мээң чагыг-керээмни үрээн, Мээң хоойлумга чагыртпаан боорга, Дээрги-Чаяакчының черинче эзир шүүргедеп келген дег-дир .

‏ Hosea 8

Израиль политиктиг база шажынчы бачыттары дээш кеземче алыр

1 «Трубадан эдис! ^a Израильчилер Мээң чагыг-керээмни үрээн, Мээң хоойлумга чагыртпаан боорга,
Дээрги-Чаяакчының черинче ^{▼▼ Азы: «Дээрги-Чаяакчының өргээзинче».} эзир шүүргедеп келген дег-дир ^c.
2 Олар Менден дуза дилеп: „Бурганывыс!
Израильчилер бис Сени билип алдывыс!“– деп кыйгырар ^d.
3 Израиль чон буяндан ойталады;
дайзын ам ону истеп-сүрер.
4 Израильчилер хааннарны Мээң дужаалым чокка
боттары дүжүлгеге олуртуп турган ^e,
нояннарны Мээң чөпшээрелим чокка шилип ап турган.
Боттарының алдын-мөңгүнүнден дүрзү-бурганнар шуткуп ап турганнар,
ынчангаш узуткаттырып аарлар.
5 Самария, сээң дүрзү-бугажыыңны ^f хүлээп көрбедим! ^{▼▼ Азы: «Самария, сээң дүрзү-бугажыың сени каапкаш баар».}
Мээң килеңим израильчилерже кыптыкты:
кажанга чедир арыгланып ап шыдавастарыл?!
6 Ол бугажыкты Израиль боду кылган болгай.
Ону шевер кижи шуткаан, ынчангаш ол бурган эвес-тир;
Самарияның бугажыы буступ каар!

7 Израильчилер салгын тарып алгаш, шуурган ажаап аар ^h;
үрезин бербес сыптан далган-тараа ажаап алдынмас,
далган-тараа ажааттынар-даа болза, ону хары улус чиир.
8 Израиль чон сыыртырып алган,
ол ам өске чоннар аразында ажык чок чүүл дег ⁱ.
9 Олар Ассирияже дуза дилеп чорупкан ^j,
чааскаан улчуп чоруур черлик элчиген ышкаш
Эфрем хары улустуң ынакшылын төлевир берип тургаш, садып алган ^k.
10 Израильчилер өске чоннарга төлевир үлеп берип турган-даа болза,
Мен оларны бөле сүрүп эккээр мен,
ынчан олар удавайн хары нояннарның база хаанның дарлалындан
хинчек көрүп эгелээрлер.

11 Эфрем бачыт дээш өргүл салыры-биле хөй-ле бедигээштер тудуп алган,
а оон оларны бачыт үүлгедири-биле ажыглап турган.
12 Мен израильчилерге Бодумнуң хөй хоойлуларымны бижип-даа берген болзумза,
олар боттарынга хамааржыр кылдыр хүлээп көрбес ийик.
13 Олар Дээрги-Чаяакчыга өргүл кылдыр эът эккеп салгаш, чип аар ^l.
Оларның өргүлдери Меңээ таарымчалыг эвес;
Мен ам оларның бузудун бодап келгеш, бачыттары дээш кезедир мен ^m:
олар Египетче эглип кээр ⁿ.
14 Израиль бодунуң Чаяакчызын уттупкаш ^o, ордулар тудуп алган-дыр;
Иудея хөй быжыглалдыг хоорайлар тудуп турар-дыр,
ынчалза-даа Мен ол хоорайларже отту ыдыптар мен,
от ордуларны чиптер ^p».