‏ Isaiah 1

1Иудеяның хааннары Озия, Иоафам, Ахаз болгаш Эзекия оларның чагырып турган чылдарында ^a Амоцтуң оглу Исайяга Бурганның чорутканы, Иудея биле Иерусалим дугайында ажыдыышкын бо-дур.

Чоннуң бачыды

2Дээр, дыңна! Чер, кичээнгейге ал! ^b Дээрги-Чаяакчы чугаалап тур:
«Мен оолдарымны кижизидип, өстүрүп кагдым,
а олар Меңээ удур тура халышты.
3Шары – бодунуң ээзин, элчиген – турар черин билир,
а Израиль Мени билбес-тир,
Мээң чонум чүнү-даа угаап билип шыдавас-тыр! ^c
4О, бачыттыг аймак, кем-буруузу аартаан чон,
о, бузуттуг үре-салгал, будулган оолдар!
Олар Дээрги-Чаяакчыдан ойталаан,
Израильдиң ыдыктыг Бурганын тооваан –
Оон хая көрнү берген.
5Үргүлчү үймээн үндүрер улус,
чүге силер ам база катап эттедип-соктурарын күзеп тур силер?
Бажыңарда балыгланмаан чер чок,
чүрээңер шуут харыксырап калган-дыр.
6Таваңгайыңардан тейиңерге чедир кадык чер артпаан ^d:
кайнаар-даа көөрге, балыг-бышкын черлер, экирбээн оюлганнар –
аштап-чугбаан, шарываан, эм үс чаап, чымчатпаан балыглар ^e.
7Чуртуңар хоозураан, хоорайларыңар хуюкталдыр өрттенип калган,
хары улус, силер көрүп туруңарда-ла,
чериңерни үптеп-чип турар;
хары улус эжелеп алган соонда дег, хамык чүве ээнзирээн! ^f
8 Сион-кыс, виноград шөлүнде майгын ышкаш,
огородта чадыржыгаш ышкаш, бүзээлелде хоорай ышкаш,
чааскаан арткан».

9Аг-шериглиг Дээрги-Чаяакчы бистиң улуг эвес артынчывысты кадагалаваан болза,
Содомга дөмейлежип, Гоморра ышкаш апаар турган бис ^g.
10Дээрги-Чаяакчының сөзүн дыңнаңар, Содомнуң чагырыкчылары!
Бурганывыстың хоойлузун кичээнгейге ал, Гоморраның чону! ^h

11«Эңдерик өргүлдериңерниң Меңээ херээ чүл? – деп, Дээрги-Чаяакчы чугаалап тур. –
Бүрүн өрттеткен кошкарлар өргүлдеринге, семис мал чаанга пөге бердим;
бугажыктар, хураганнар, хуналар ханы күзевейн тур мен ⁱ.
12Мээң мурнумга мөгейип кээп ^j, Мээң өргээм иштин таптай базарын
силерден кым негеп турар чүвел? ^k
13Моон соңгаар хоозун өргүл белектери эккелбеңер ^l.
Айдызаар чүүлдериңер меңээ бужар-багай-дыр.
Ай чаазының байырлалдары, амыр-дыш хүннери болгаш байырлыг чыыштарыңар ^m...
Ол бүгү байырлалдарны кылбышаан, бузут үүлгедип турарыңар-биле эптежир аргам чогул.
14Ай чаазында чыыштарыңарны, байырлалдарыңарны көөр хөңнүм чок.
Олар Меңээ үүрге-чүък апарган, ону чеже көдүрер мен – шаам төне берди.
15Холуңарны мөргүл кылып өрү сунарыңарга ⁿ, Мен силерже көрүнмес мен.
Чеже-даа хөй катап мөргүүрүңерге, Мен силерни дыңнавас мен ^o.
Холуңар ханда кончуу сүргей борашкан-дыр! ^p
16Чунуп, арыгланып алыңар ^q.
Бузуттуг ажыл-херээңерни Мээң көрүжүмден чайладыңар!
Бузут үүлгедирин соксадып,
17буян кылып өөренип алыңар.
Чөптүг-шынныг чорукче чүткүп, дарлакчыларны сойгалап,
өскүстерни камгалап, дулгуяк херээженнерге болчуңар ^r.
18Чедип келиңер, бо бүгүнү кады үзе шиитпирлеп көрээли – деп,
Дээрги-Чаяакчы чугаалап тур. –
Силерниң бачыттарыңар кып-кызыл өңнүг-даа болза,
хар ышкаш ак апаар;
бачыттарыңар хүрең-кызыл будук дег-даа болза,
ак хой дүгү дег апаар! ^s
19Бир эвес эки тураңар-биле Мени тооп дыңнаар болзуңарза,
черниң кежиктерин четтирер силер ^t,
20а бир эвес Менден ойталап, чөрүүленир болзуңарза,
хылыш чемижи боор силер ^u».
Дээрги-Чаяакчының аксындан үнген сөстер ол-дур.

Бурган Иерусалимни арыглаар

21Бурганга шынчы турган найысылал,
сен канчап самыын-садар херээжен дег апардың?! ^v
Сен шын шииткелге бүргеттирген турдуң,
чөптүг-шынныг чорук сеңээ чурттап турду,
а ам сенде өлүрүкчүлер чурттап турар-дыр.
22Сээң мөңгүнүң багай холуксаалыг апарган ^w,
сээң арагаңда суг холуп каан.
23Сээң нояннарың Менден ойталаан-дыр
база оорлар-биле бир баг болган-дыр;
олар шупту хээли чииринге ынак, белектер негеп ап турар ^x,
чаргы-чаалы үезинде өскүстерни камгалавас,
дулгуяк херээженниң херээн сайгарып көрбес улус-тур ^y.

24Ынчангаш Дээрги, Аг-шериглиг Дээрги-Чаяакчы,
Израильдиң күштүг Бурганы: «Өжээтеннеримни канчаар кезедир эвес мен!
Дайзыннарымдан өжээним негеп аар мен! ^z
25Холумну сенче көдүрер мен; саваң-биле дег, холуксааңны арыглаар мен,
сенден бүгү холуксааларны аңгылаар мен! ^aa
26Биеэги үеде дег, сеңээ баштыңнарны, эгезинде турганы дег,
сеңээ чөвүлекчилерни эгидер мен.
Ынчан сени „Чөптүг-шынныг хоорай,
шынчы найысылал“ ^ab деп адап каар» – деп медеглээн.

27Сион чөптүг шииткел-биле, ооң Бурганче ээлген ажы-төлү –
чөптүг чоруу-биле камгалал алыр.
28А Бурганга удур тура халаан улус
бачыттыглар-биле кады узуткаттырар.
Дээрги-Чаяакчыдан ойталаан улус өлүп каар ^ac.
29Таалал алыр ыдыктыг ыяштарыңар дээш бак атка кирер силер,
боттарыңарга шилип алган ыдыктыг дээн сесерликтериңер дээш ^ad адыңар баксыраар.
30Бүрүзү оңган ыяш дег, суггат чок сесерлик дег апаар силер ^ae.
31Күштүглер – хендир дырандызы дег,
а оларның үүлгедиглери – от чаштанчызы дег апаар:
олар кады кыва бээрге, ол отту кым-даа өжүрүп шыдавас ^af.