Isa 10 | TyvTUV | STEP | Чөптүг эвес хоойлулар үндүрүп, кээргел чок доктаалдар бижип турар улус ат болур!

‏ Isaiah 10

1 Чөптүг эвес хоойлулар үндүрүп, кээргел чок доктаалдар бижип турар улус ат болур! ^a
2 Силер мээң чонум иштинде ядыыларның эргезин казып турар,
түреңги улуска шын шииткел көргүспес ^b
база дулгуяк херээженнерниң кошкулун былаап аар,
өскүстерни үптеп турар улус-тур силер ^c.
3 Кеземче хүнүнде, кажан ырактан келген айыыл-халап таварыырга, канчаар силер?
Дуза дилеп, кымче баар силер?
Эртине-байлааңарны каяа арттырып каар силер?
4 Силер туттурган улус аразынга харыксырап олура дүжер
азы өлүрткен улус аразынга чыда дүжер силер.
Ынчан безин Дээрги-Чаяакчының килеңи чайлаттынмас,
Ооң холу ам-даа силерни кезедип, көдүрлүр ^d.

Бурганның турамык Ассирияны шииткени

5 «Ассирия ат болур!
Ассирия дээрге Мээң килеңимниң шыкпыыжы-дыр,
ооң холунда – Мээң хорадаан сагыжымның кымчызы! ^e
6 Мен Ассирияны Менден ойталаан чонга удур,
Мээң килеңнеп турарым чонга ^f удур ыдар мен –
ону үптеп-тоназын, куругладыр олчалап алзын,
кудумчуда бок-хир дег, таптай бассын».

7 Ынчалза-даа Ассирияның хааны Бурганның ону ыдып турарын билбес ^g,
ол бодунуң сеткил-чүрээнге өске чүве бодаар –
чер-делегейниң хөй күрүнелерин эжелеп, узуткаар деп бодаар.
8 Ол хаан: «Бүгү хааннар чүгле мээң нояннарымга деңнежир эвес чүве бе?
9 Калне хоорай ^h – Кархемис ышкаш,
Хамат – Арпад ышкаш, Самария – Дамаск ышкаш эжелеттирбээн чүве бе?
10 Мен өске күрүнелерни – Иерусалим биле Самарияның дүрзү-бурганнарындан артык күштүг
дүрзү-бурганнарлыг күрүнелерни эжелеп алган болганымда,
11 Самарияны база ооң дүрзү-бурганнарын базып кааным дег,
Иерусалимни база ооң дүрзү-бурганнарын базып кагбас мен бе?» – деп бодап турар ⁱ.

12 Дээрги Сион даг биле Иерусалимге удур кылып турар херээн төндүргеш,
Ассирияның хаанының улуургак, турамык сагыш-хөңнүн болгаш
ооң туразы улуг, өрү көрдүнер чоруун кезедир ^j.
13 Ол хаан: «Мен ол бүгүнү күштүг холум-биле
база мерген угааным-биле кылдым,
билиим ол хире-дир! ^k
Чоннарның кызыгаарларын эде тургустум,
оларның курлавырларын үптеп алдым;
буга ышкаш, оларның хааннарын дүжүлгезинден дүжүр үстүм.
14 Куш уязы тыпкан дег, Мээң холум чоннарның эртине-байлаан эжелеп алды;
кагдынган чуургалар чыып аары дег, мен бүгү чурттарны чыып алдым.
Кым-даа чалгынын далбаш кылбады, аксын ажыдып, сыйылавады» – дээн болгай.

15 Ыяш кезип турар кижиден ооң балдызы өрү көрдүнер деп бе?
Ыяш хирээлеп турар кижиниң хирээзи ооң мурнунга хоолуургаар деп бе?
Мерге ону көдүрүп турар кижини көдүрүп шыдаар деп бе
азы ыяштан чазаан моң ыяштан бүтпээн ээзи кижини чайып шыдаар деп бе?
16 Ынчангаш Аг-шериглиг Дээрги-Бурган-Чаяакчы
ол хаанның семис-шыырак улузунче арып-дорар аарыг-човалаң ыдар ^l,
ооң ат-алдарлыг улузунуң аразынга чалбырааштыг от ышкаш чалбыыш өөскүдер.
17 Израильдиң Чырыы ынчан от апаар,
Ооң ыдыктыг Бурганы чалбыыш апаар:
ол от чаңгыс хүн дургузунда тенниг бок үнүштү чиптер ^m.
18 Ассирияның алдарлыг арга-арыын, дүжүткүр шөлдерин
ол от бүрүнү-биле узуткаар ^{▼▼ Арга-арыг болгаш шөлдер ассирий аг-шеригни ойзу көргүскен чадавас.},
олар шупту өлүг-диригниң аразында аарыг кижи дег апаар.
19 Ооң арга-арыының ыяжының артынчызы аажок эвээш санныг апаар,
ону чаш уруг безин санап шыдаптар.

Израильдиң артынчызы Бурганче эглир

20 Ол хүн кээрге, Израильдиң артынчызы –
Иаковтуң салгалындан артып калган улус
боттарының дарлакчыларынга оон ыңай ынанмастай бээр,
а Дээрги-Чаяакчыга, Израильдиң ыдыктыг Бурганынга шыны-биле ынаныр.
21 Израильдиң артынчызы мөге-шыырак Бурганче эглир.
22 Израиль, сээң чонуң далай элезини ышкаш хөй санныг-даа болза ^o,
чүгле артынчы чон эглип кээр.
Бурган чөптүг узуткаашкын биле бажын ажыр кеземчени тодараткан.
23 Аг-шериглиг Дээрги-Бурган-Чаяакчы
тодаратканын ёзугаар бүгү чуртка узуткаашкын чорудар ^p.

24 Ынчангаш Аг-шериглиг Дээрги-Бурган-Чаяакчы:
«Мээң Сионда чурттаан чонум, сени шыкпыыш-биле улдап,
биеэде Египет ышкаш, моң арнып турар Ассириядан кортпа ^q.
25 Удавас Мээң сеңээ хорадаан сагыжым часкарлы бээр,
Мээң килеңим кыптыгып, ассирийлерни узуткаар» – дээн.

26 Аг-шериглиг Дээрги-Чаяакчы Цур-Орив чанынга
мадиан чонну чылча шапканы ^r дег
азы Египетке Бодунуң даянгыыжын далай суунче көдүргени дег ^s,
Ассирияже кымчызын көдүрер.
27 Ол хүн кээрге, Ассирияның чүдүрген чүъгүн
сээң оорга-мойнуңдан дүжүрер,
хилинчектээн дөңгүзүн – мойнуңдан уштур,
ол дөңгү, күжениптериңге, буступ дүжер ^t.

28 Дайзыннар Айатта чедип келген,
Мигронну ^u таварып эрте берген,
Михмаска кошта чүъгүн арттырып каан ^{▼▼ Бо шүлүктерде айыткан черлер Иерусалимден ырак эвеске турган. Ол черлер халдап кел чыдар аг-шеригниң Иерусалимче соңгу чүктен кээр оруунга турган чадапчок.}.
29 Олар кежигни ^w эрте берген, Гевада хонуп чыдар.
Рама хоорай ^x сирилээн, Саулдуң Гивазындан ^y чурттакчылары дезипкен.
30 Галлим суур ^z, өөледир ыгла!
Лаис, ону дыңна, Анатот ^aa, аңаа харыыла!
31 Мадмена чурттакчы чок арткан, Гевимниң чурттакчылары дезип, чаштына берген.
32 Ол-ла хүн дайзыннар Новка доктаагаш ^ab,
Сион дагда турар Иерусалимче чудуруу-биле кыжанган.

33 Көрүңер! Аг-шериглиг Дээрги-Бурган-Чаяакчы
коргунчуг күчү-күжү-биле ыяштарның будуктарын сыйып кааптар ^ac.
Ыяштарның баштарын кезип кааптар,
бедик черлерни чавызадып каар.
34 Дээрги-Чаяакчы шыргай арга-эзимни балды-биле кыргый кезер,
өндүр улуг Бурганның мурнунга Ливанның арга-эзими калбаш кээп дүжер!