Isaiah 11
Амыр-тайбың хайырлаар Хаан
1Иессейниң төжээнден Будук өзер, ооң дазыл-дамырындан Өзүм үнер ▼▼ Иессей дээрге Давид хаанның ачазы. Бо оюскан уткалыг домак Давид хаанның үре-салгалынче айтып турар (Иер. 23:5; 33:15; Зах. 3:8; 6:12 көр).
.2Дээрги-Чаяакчының Сүлдези – мерген угаан биле угаан-сарыыл бээр Сүлде,
арга-сүме биле күш-шыдал бээр Сүлде,
билиг биле Дээрги-Чаяакчыдан коргуушкун бээр Сүлде – Ону бүргей аптар b.
3Дээрги-Чаяакчыдан коргары Аңаа өөрүнчүг болур.
Ол даштыкы хевир барымдаалап шиитпес,
дамчыыр чугаа ёзугаар херектер шиитпирлевес.
4Ядыыларны Ол шынныы-биле шиидер,
черниң түреңги улузунуң чаргы-чаалызын чөптүү-биле шиитпирлээр c.
Ооң чугаалаан сөзү, мерге дег, чер-делегейни кезедип согар,
Ол Бодунуң аксындан үнген тыныжы-биле бузуттуг улусту өлүрүп каар d.
5Ол чөптүг чорукту куржанып аар, шынчы чорук Ооң белинде куру болур.
6Ынчан бөрү хураган-биле кады чурттаар,
ирбиш анай-биле кады чыдар,
бызаа, арзылаң болгаш бугажык кады оъттап-чемненир e,
бичии оол оларны одарже сүрүп аппаар.
7Инек адыг-биле кады оъттаар,
оларның төлдери кады чыдар,
арзылаң, буга ышкаш, сиген чиир.
8Чаш төл чылан үңгүрүнүң аксынга ойнап болур,
бичии уруг шагар чылан чурттап турар үтче холун салып болур.
9Бурганның бүгү ыдыктыг даанга
бузут үүлгедир, хора халдадыр чорук турбас апаар f,
чүге дээрге, далайны сугларның долары дег,
чер-делегей Дээрги-Чаяакчыны билип аары-биле долдунар g.
Чоннарга тук
10Ол хүн кээрге, Иессейниң Дазылы бүгү чоннарга тук дег апаар h,шупту аймактар Ооң чанынга чыглып кээр i,
Ооң чурттап турар чери алдаржыыр.
11Ол хүн кээрге, Дээрги холун катап база сунгаш,
Бодунуң чонунуң артынчызын Ассириядан, Египеттиң девискээрлеринден,
Эфиопиядан, Эламдан, Сеннаардан, Хамат хоорайдан болгаш
далайда ортулуктардан дедир эгидип аар j.
12Дээрги бүгү чоннарга тук көдүргеш,
Израильдиң үндүр сывыртаткан улузун чыып эккээр,
Иудеяның тоо быдараан чонун чер-делегейниң дөрт чүгүнден бөлүп эккээр k.
13Израильдиң адааргалы соксаар, Иудея аңаа өжээргевейн баар;
Израиль Иудеяга адааргавастай бээр, Иудея база Израиль-биле өжээннешпес l.
14Олар барыын чүкке филистимнерниң черлеринче шүүргедей ужуп, халдаар,
чөөн чүкте чурттаан аймактарны кады үптээр m;
Эдом биле Моавка удур холун көдүрер, аммон чон оларга чагыртыр.
15Дээрги-Чаяакчы Египеттиң далайының мугулдурун кургадып каар,
күштүг хат хадыдып, Бодунуң холун Евфрат хемниң кырынче сунар n.
Ол хем чеди адырык кылдыр чарлы бээрге,
улус ону идик ужулбайн кежип шыдаар апаар.
16Ынчан Ооң чонунуң артынчызынга, израиль чон Египеттен үнүп турган үеде дег o,
Ассириядан үнер делгем орук ажыттынар p.
Copyright information for
TyvTUV