Isa 14 | TyvTUV | STEP | Вавилоннуң кеземче көөр үези чоокшулаан, ооң өлүр хүнү кээр четкен. А Иаковту Дээрги-Чаяакчы өршээр, Израильди база катап шилип аар – израильчилерни боттарының черинге чурттадып каар – даштыкы улус олар-биле каттыжып, Иаковтуң салгалы-биле тудуш апаар .

‏ Isaiah 14

Израильдиң дедир чанып кээри

1 Вавилоннуң кеземче көөр үези чоокшулаан, ооң өлүр хүнү кээр четкен.
А Иаковту Дээрги-Чаяакчы өршээр, Израильди база катап шилип аар ^a –
израильчилерни боттарының черинге чурттадып каар –
даштыкы улус олар-биле каттыжып, Иаковтуң салгалы-биле тудуш апаар ^b.
2 Өске чоннар израиль чонну эдертип алгаш, ооң төрээн черинче дедир эккээр ^c.
Израиль чон Дээрги-Чаяакчының черинге
ол чоннарны бодунуң эр, кыс кулдары кылып аар
база ону тудуп аппарган улусту тудуп аар,
ону кызып-кыйып турган улусту чагырар.

Вавилоннуң хаанын кочулаан ыр

3 Ол хүн, кажан Дээрги-Чаяакчы сени качыгдал, хөлзээзин болгаш каржы-дошкун кулданыгдан адырып каарга, 4 Вавилоннуң хаанын кочулаан бо ырны ырлаар сен ^d:

«Хилинчектекчи чок апарды, ооң кызагдалы төндү!
5 Дээрги-Чаяакчы бузуттугларның мергезин,
чагырыкчыларның кымчызын сыйып кагды.
6 Хаан килеңней бергеш, чоннарны соксаал чок эттеп-соп,
хорадай бергеш, кээргел чок кызагдал-биле истеп-сүрүп турду.
7 Бүгү чер-делегей ам дыштанып, амыр-чыргал көрүп чыдыр,
хөглүг ырлар дыңналып тур!
8 Хадылар, Ливанның пөштери безин сээң бастырганың дээш байырлап:
„Сен мөңге уйгуң удуй бээриңге, бисти кым-даа кезедип келбестеди“– дижип тур ^e.

9 Өлүглер оранынче кирип туруңда,
сени уткуп аар дээш, ол оран хөлзеп эгелээн;
сени уткузун дээш, ол оран өлүг улустуң сүнезиннерин –
чер кырынга баштыңчылар бооп чораан бүгү улусту оттуруп,
өске чоннарның өлген хааннарын дүжүлгелерден сеңээ алдар кылдыр тургузуп турар.
10 Олар шупту сеңээ: „Сен база, бис ышкаш, кошкак апарып,
биске дөмейлежи берген-дир сен“– дээр.
11 Сээң өндүр-чаагайың, чадаганнарың үнү –
ол бүгү өлүглер оранынче дүже берген.
Сеңээ сээктер дөжек болур, курттар – шуглак болур.

12 Шолбан сылдыс, даң хаяазының төлү, канчап дээрден кээп дүштүң?!
Чоннарның дарлакчызы, сени черже дүжүр октапкан-дыр! ^f
13 А сен бодуңнуң сеткил-чүрээңде: „Дээрже көдүрлү берейн ^g,
дүжүлгемни Бурганның сылдыстарындан өрү көдүрүп,
бурганнарның чөвүлежип чыглыр чери – Цафон дагның ийлеринге саадаайн ^{▼▼ «Цафон даг» – еврейлер аразынга чурттап турган хананей чоннуң чүдүлгезин ёзугаар бурганнар чурттап турар даг.}.
14 Үстүкү булуттардан өрү көдүрлүп, Дээди Өрүкү Бурганга дөмейлежийн“– деп бодадың ⁱ.
15 Ынчалза-даа тамыже, өлүглер оранының дүвүнче дүжүр октаткан сен! ^j

16 Сени эскерип каан улус топтап көрүп, салым-чолуңну кайгап-харап турар:
„Черни шимчедир чайгап, күрүнелерни сириледип турган кижи бо бе?
17 Делегейни ээнзиреткен, бүгү хоорайларны үреп бускан,
тудуп аппарган улузун бажыңынче чандырбайн турган кижи бо бе? ^k“

18 Чоннарның хааннары шупту хүндүлүү-биле мөңге уйгузун удуп,
кижи бүрүзү бодунуң чевег-куюнда чыдар.
19 Чүгле сени, чүдек-бужар сек дег ^{▼▼ Азы: «Ирик ыяш будуу дег».},
чевег-куйга ажаавайн, үндүр октапкан;
хылышка шаштырткан, тамының даштарынче октаттырган өлүглер сени шып алган.
Улус буду таптай баскан мөчү-сөөк дег,
20 сен ол хааннар-биле дөмей кылдыр хөөржүттүрбес сен,
чүге дээрге чуртуңну хоозурадып, чонуңну узуткап алган-дыр сен.

Бузуттугларның үре-салгалын улус мөңге шагда адап сагынмас ^m.
21 Адазының кем-буруузу дээш, ооң оолдарын чок кылыры-биле белеткеңер.
Олар чер-делегейни эжелеп аар дээш көдүрүлбезин
база бүгү делегейни боттарының хоорайлары-биле дуглай тутпазын».

22 «Оларга удур көдүрлүр мен – деп,
Аг-шериглиг Дээрги-Чаяакчы медеглээн. –
Вавилоннуң адын, дириг арткан чонун,
келир салгалын узуткап каар мен – деп,
Дээрги-Чаяакчы медеглээн. –
23 Мен ону чараа-чеченнер девискээри ⁿ,
тулааланчак хөөлбектер кылып каар мен;
узуткаашкын ширбиижи-биле ону үндүр ширбиир мен».

Аг-шериглиг Дээрги-Чаяакчының медеглээн чүвези ол-дур.

Ассирия дугайында

24 Аг-шериглиг Дээрги-Чаяакчы: «Мен канчаар бодап алган мен, ынчаар болур,
Мен канчаар баш бурунгаар тодараткан мен, ынчаар боттаныр;
25 Бодумнуң черимге ассирий аг-шеригни чылча шавар мен ^o,
Бодумнуң дагларымга оларны таптай базар мен.
Оларның дөңгүзү Мээң чонумдан уштунуп кээп дүжер,
оларның дарлалы ооң оорга-мойнундан адырлы бээр ^p.
26 Бүгү чер-делегейге хамаарыштыр бодалым бо-дур,
бүгү чоннарны кезедир дээш көдүрүлген холум бо-дур.
27 Аг-шериглиг Дээрги-Чаяакчы бодал бодап аарга,
кым ону күш чок болдуруп шыдаарыл?
Ооң холу көдүрлүрге, кым ону чайладып шыдаарыл?» – деп даңгыраглап чугаалаан ^q.

Филистим чон дугайында

28 Ахаз хаанның өлген чылында ^r мындыг өттүр билген медеглел болган:

29 «Филистимнер оларны чылча шаап турган шыкпыыштың сыйылганы дээш өөрүвезин;
чылан үре-салгалындан шагар чылан үнүп кээр,
ооң үре-төлү ок-чылан апаар.
30 Ынчан эң ядыы улус тодар, түреңги улус айыыл чок черге дыштаныр.
Филистим чоннуң дазылын аш-биле узуткаар мен,
артып калган улузу өлүртүп каар.

31 Ыглаңар, хаалгалар! Алгырып ыгла, хоорай!
Филистимнер, кортканыңардан дөгере көжүй бериңер!
Чүге дээрге соңгу чүктен ыш диргелип кел чыдыр,
ол аг-шеригде чыскаалдан чыдып калган кижи чок-тур.
32 Ол чоннуң элчиннеринге чүү деп харыылаарыл?
„Дээрги-Чаяакчы Сионну доктааткан,
Ооң чонунуң түреңги улузу аңаа хоргадал тып аар“ ^s деп харыылаар ужурлуг».