Isaiah 17
Дамаск болгаш Израиль дугайында
1Дамаск дугайында өттүр билген медеглел бо-дур a.«Дыңнаңар, Дамаск моон соңгаар хоорайлар санындан казыттырар,бузундулар оваазы апаар.
2Ароерниң хоорайлары ээн кагдынып,
чүгле мал сүрүг аңаа дыштанып чыдып, одарлаар,
ол мал-маганны хойзур кижи артпас b.
3Израильге быжыглалдыг хоорай, Дамаскыга – хаанныг чагырга турбас апаар;
арамейлерниң артынчызынга израиль чоннуң алдар-адының салымы онаажыр».
Аг-шериглиг Дээрги-Чаяакчының медеглээн чүвези ол-дур.
4«Ол хүн кээрге, Израильдиң алдар-ады кудулаар,
семис мага-боду арып-доруптар.
5Ол чүүл болза, кажан Рефаим шынаазында c шөлден тараа кезикчизи
дүжүт ажаап ап, ооң холу тараа бажын кезип,
куругладыр чыып каапканда дег болур.
6Олива чимизин ажаап ап турда,
ооң шыпшык бажынга ийи-үш оливканың,
чимистелген будуктарга дөрт-беш каттың артып каары дег,
чүгле каш израиль кижи менди артар d».
Израильдиң Бурганы Дээрги-Чаяакчының медеглээн чүвези ол-дур.
7Ол хүн улус боттарының Чаяакчызынче көөр,
Израильдиң ыдыктыг Бурганынче көрүжүн шиглээр.
8Олар ооң соонда өргүл салыр черлерже,
боттарының холу, салаалары-биле кылган чүүлүнче көрбес апаар,
ыдыктыг ыяштар, адагаштарга идегевестей бээр e.
9Израиль, ол хүн сээң быжыглалдыг хоорайларың –
өске чоннарның израильчилерге арттырып кааны, кагдынган хоорайлар –
дуй үнген ыяштар биле чадаң үнүштерге шыва алзыр. Ол чер ээнзиреп каар f.
10Чүге дээрге сен бодуңну камгалап турар Бурганны уттупкан-дыр сен,
бодуңну хоргададып турар Хаяны сагынмаан-дыр сен g.
Каас сесерликтер тарып, өске бурганга тураскааткан сыптар олуртуп алган-дыр сен.
11Оларны олурткан хүнүңде-ле өстүрүп ап шыдадың,
тарып каарыңга, даартазында-ла чечектели бээр кылып алдың,
ынчалза-даа дүжүт албас сен,
ол хүн аарыг-човалаң биле улуг качыгдал ажаап аар сен.
12Аа халак, хөй чоннарның аг-шерии чалгып хөлзээн далай ышкаш шимээргеп тур! h
Аймак-чоннар шапкын агым суглар каалаан ышкаш алгы-кышкы үндүрүп тур!
13Чоннар шапкын агым суглар каалаан дег мөөредир алгыржып тур,
ынчалза-даа Дээрги-Чаяакчыга сойгалаткаш, олар ырадыр дезип маңнажы бээр;
дагларда хат доюлдурган доозун дег, казыргыга бөөлдеткен довурак дег,
сывыртадып чоруп бээр.
14Кежээ када көөрүңерге, коргунчуг дайзыннар бар болур,
а эртен олар чиде бээр.
Бисти үптеп, хоозурадып турган улустуң хуу-салымы,
үлүг-хуузу ол-дур.
Copyright information for
TyvTUV