‏ Isaiah 2

Дээрги-Чаяакчының даа

(Мих. 4:1-3)

1Амоцтуң оглу Исайяга Бурганның чорутканы, Иудея биле Иерусалим дугайында ажыдыышкын бо-дур.

2Сөөлгү хүннер кээрге,
Дээрги-Чаяакчының өргээзи турар дагны
Ол өске бүгү тейлер, даглардан бедидир тургузуп каар.
Бүгү чоннар ол дагга чедип кээр,
3эңдерик аймактар аңаа чыглып кээр ^a.
Олар бот-боттарынга: «Барып, Дээрги-Чаяакчының даанче,
Иаковтуң Бурганының өргээзинче үне берээли ^b.
Бурган бисти Бодунуң оруктары-биле чоруурунга өөредип каар,
бис Ону эдерер бис» – дижир.
Сиондан ыдыктыг хоойлу дүжүп кээр,
Иерусалимден Дээрги-Чаяакчының сөзү тараар.
4Чоннарның херээн Ол шиитпирлээр,
эңдерик аймактарның чаргы-чаалызын Ол үзер.
Олар боттарының хылыштарын андазыннарже,
чыдаларын – хол кадыырларынче эде соп кылып аар ^c.
Бир чон өске чонга удур хылыш көдүрбес,
олар моон соңгаар дайын чорударынга өөренмес ^d.

5О, израиль чон, Дээрги-Чаяакчының чырыынга бүргедип чурттаалы че! ^e

Израильдиң турамыын буруу шапканы

6Сен Бодуңнуң израиль чонуңдан ойталаан сен.
Чүге дээрге оларның хары чоннар-биле харылзаазы ханылап,
Чөөн чүк улузундан өттүнүп алган чаңчылдары эңдерик-тир,
филистим чонда дег, төлгечилери-даа бар-дыр.
7Оларның черин алдын, мөңгүн долган, эртине-байлаа эмге-тикчок ^f.
Оларның черин аъттар долган ^g, дайынчы тергелери эмгежок!
8Оларның черин дүрзү-бурганнар долган ^h.
Олар холу-биле бүдүрген, салаалары-биле кылган чүүлдеринге мөгейип турар ⁱ.
9Кижилер боттарын бакка суп, куду көрдүрген-дир.
Сен оларны өршээвейн көр!

10Израиль чон, Дээрги-Чаяакчыдан корткаш,
Ооң өндүр чырыының чайыннаажындан сүрээдээш,
хаяларже ажытталы бер, куйларже чаштына бер! ^j
11Турамык кижи бажын халайтыптар, улустуң улуургак чоруу куду көрдүрер,
ол хүн чүгле Дээрги-Чаяакчы өндүр бедик болур ^k.
12Бүгү улуургаар, туразы улгадыр улусту, бодун өрү көрдүнер бүгү улусту
Аг-шериглиг Дээрги-Чаяакчының кезедир хүнү кээр,
ол бүгү улус куду көрдүрер.
13Ливанның бедип үнген пөштери, Васанның улуг дубтары ^l,
14бүгү бедик даглар, бүгү кадыр тейлер,
15бедик суурга бүрүзү, быжыглаттынган хана бүрүзү,
16Фарсистиң бүгү улуг корабльдары ^m, оларның бүгү күзенчиг каасталгалары
кеземче хүнүн көөр.
17Кижиниң улуургак чоруу куду көрдүрер, турамык кижи бүрүзү томаарыыр,
ол хүн чүгле Дээрги-Чаяакчы өндүр бедик болур,
18дүрзү-бурганнар шуут чиде бээр.

19Кажан Дээрги-Чаяакчы чер-делегейни сириледир силгиптерге ⁿ,
Оон корткаш, Ооң өндүр чырыының чайынындан сүрээдээш,
улус хаялар чарыктарынче, черде хооргалдарже кире бээр ^o.
20Ол хүн улус мөгеер дээш кылып алганы алдын-мөңгүн дүрзү-бурганнарын
дедир-даваннарга, часкыларга октап бериптер ^p.
21Дээрги-Чаяакчы чер-делегейни сириледир силгиптерге,
Оон корткаш база Ооң өндүр чырыының чайынындан сүрээдээш,
олар хаялар чарыктарынче, даглар кызааларынче кире бээр.

22Кижи амытанны херекке алба, ол өлүр тынныг болгай ^q.
Ол чүзү-биле чугулал?