Isaiah 20
Египет биле Эфиопия дугайында
1Ассирияның хааны Саргоннуң чорудупканы кол шериг баштыңы Азот хоорайга a чедип келгеш, аңаа удур чаалажып, эжелеп алганы чылда – 2ол үеде Дээрги-Чаяакчы Амоцтуң оглу Исайяга: «Белиңде ораап алганың качыгдал хевин база будуңда идииңни уштуп каавыт» – дээн. Исайя ынчаар кылгаш, чанагаш, кызыл-даван чоруп турган b. 3Дээрги-Чаяакчы ынчан мынча дээн: «Мээң чалчам Исайяның Египет биле Эфиопияның келир үезинче айыткан демдек бооп c, үш чыл дургузунда чанагаш, кызыл-даван чоруп турганы дег, 4Египеттиң база Эфиопияның туттурган улузун Ассирияның хааны кырган-чалыы дивейн, чанагаш, кызыл-даван, чаяазы көстүп чоруур кылдыр, Египеттиң шалдаңын көргүзүп, тудуп алгаш баар d. 5Эфиопияга идегеп, Египет-биле мактанып турган улус коргуп-сүртеп, бак атка кирер. 6Ол хүн кээрге, далай эрииниң чурттакчылары: „Көрүңер, бистиң идегеп турганывыс, олардан дуза дилеп, Ассирияның хаанындан адырлып аар дээш, хоргадап барып турганывыс улус канчап барган-дыр! Бис ам канчап камгалал алыр улус боор бис?!“– деп чугаалажыр».
Copyright information for
TyvTUV