Isaiah 22
Иерусалим дугайында
1Көстүүшкүн шынаазының дугайында өттүр билген медеглел бо-дур. Сээң-биле чүү болуп тур?Чүге сээң чурттакчыларың шупту бажыңнарының кырында чыглып келди?
2Шимээргеп хөлзеп, өөрүп-байырлап турган хоорай a,
сээң кырлып калган улузуң хылышка шаштырбаан-дыр b,
тулчуушкун үезинде өлбээн-дир.
3Сээң хамык баштыңнарың кады дезе берген, чаларын октапкаш, туттуруп алган.
Хоорайга турган бүгү улус ырадыр дезип маңнааш-даа, туттуруп алган-дыр.
4Ынчангаш: «Менче көрбеңер, качыгдап, ыглап алыйн c.
Хөңнүм чазаарын оралдашпаңар, мээң күжүр чонум когаралды көрген болгай» – деп чугаалаан мен.
5Аг-шериглиг Дээрги-Бурган-Чаяакчының кеземче хүнү –
Көстүүшкүн шынаазында девидээшкин, чылча шавыышкын, мөгүдээшкин хүнү!
Хананы үрей үстүрүп-ле тур – качыгдалдың кышкызы даг бажында дыңналы берди.
6Эламның шериглери d саадактарын белеткеп алган,
дайынчы тергелер, аъттыг шеригжилер дайылдажырынга белен;
Кир e чурттуг шериглер дозуг-камгалалдарын көдүрүп тур.
7Сээң кайгамчык эки шынааларыңны дайынчы тергелер долган,
аъттыг шеригжилер хаалга чанында чыскаалыпкан.
8Иудеяның быжыглалдарын бузуп каапкан.
Силер ол хүн Ыяш ордуда ▼
▼ Ыяш орду – Соломоннуң туттуруп каан ордузу (3 Хаан. 7:2-5; 10:17-21 көр).
шыгжаан ок-чепсекче көрүжүңер шиглээн силер. 9Давидтиң Хоорайының g ханазында дежик черлерниң хөйүн көрүп каан силер. Сугну Адаккы хөөлбекти долдур курлавырлап узуп алган силер. 10Иерусалимде бажыңнарны хынап көргеш, хананы быжыглаары-биле оларның чамдыызын бузуп каапкан силер. 11Ийи хана аразынга Эрги хөөлбектиң суун курлавырлаар суг шыгжамыры тудуп алган силер. Ынчалза-даа ол айыыл-халаптың боорун баш бурунгаар шиитпирлээн Бурганче көрүнмээн силер, ол бүгүнү шаг шаанда-ла бодап алган Бурганче кичээнгей салбаан силер. 12Аг-шериглиг Дээрги-Бурган-Чаяакчы силерге ол хүн ыглап-сыктаарын,качыгдалдан бажыңарны дөңгүрертир чүлүп h, самдар хепти кедерин сүмелээн i.
13Ооң орнунга өөрүп-хөглеп, байырлап, шарылар соп, хойлар дөгерип, эът чип, арага ижип j:
«Даарта өлүп каар бис – ам дойлап, ижип-чип аалы!» – деп турар-дыр силер k.
14Аг-шериглиг Дээрги-Чаяакчы меңээ: «Ол бачыдыңар өршээттинмес, өлүп каар силер!» – деп дыңнаткан.
Аг-шериглиг Дээрги-Бурган-Чаяакчының чугаалаан чүвези ол-дур.
Дээди дүжүмет дугайында
15Аг-шериглиг Дээрги-Бурган-Чаяакчы мынча дээн: «Барып, хаанның дүжүмеди, орду башкарыкчызы Севнага l мону дамчыт: 16„Сен кым сен? Мында кандыг улузуң барыл?Канчап маңаа бодуңга чевег-куй оюп ап диттигиптиң? m
Чевег-куйну бедик черге оюп алган-дыр сен,
чыдар чериңни хаяга кылып алган-дыр сен.
17Көөр сен, күш-шыдалдыг кижи,
Дээрги-Чаяакчы сени дыңзыг туткаш, дүжүр октаптар!
18Ол сени борбайтыр дүргеш, улуг делгем чуртче шывадаптар.
Сен аңаа өлүп каар сен, каас-коя чуузаларың аңаа артып каар, о, сен хөөкүй,
бодуңнуң дээргиңниң ордузунуң бужар-багы!
19Мен сени эрге-дужаалыңдан халаар мен, ажыл-албаныңдан дүжүртүр сен!“
20Ол хүн кээрге, Мен Хелкияның оглу Элиакимни n –
Бодумнуң чалчамны кыйгырып аар мен.
21Аңаа сээң хевиңни кедиргеш, сээң куруң-биле куржаар мен,
сээң эрге-чагыргаңны аңаа хүлээдип бээр мен.
Ол Иерусалимниң чурттакчыларынга, иудей чонга ада дег болур.
22Мен ооң холунга Давидтиң ордузунуң дүлгүүрүн o тутсуп каар мен,
ооң ажыткан чүвезин кым-даа хаап шыдавас,
ооң хаап каан чүвезин кым-даа ажыдып шыдавас p.
23Мен ону кадыг-быжыг черже, кадаг ышкаш, киир кагар мен;
ол бодунуң төрел бөлүүнге алдарлыг дүжүлге апаар.
24Ооң төрел бөлүүнүң бүгү алдар-ады: бүгү салгакчылар, ажы-төл,
кадагда азып каан аяк-сава дег, доңгалар дег, кадагдан хамаарылгалыг болур.
25Ол хүн кээрге, демги кадаг, кадыг-быжыг черже кадап каан-даа болза,
божаңнай бээр – деп, Аг-шериглиг Дээрги-Чаяакчы медеглээн. –
Ол кадагны ушта шааптарга, кээп дүжер,
аңаа азып каан турган бүгү чүък чок апаар».
Дээрги-Чаяакчының чугаалаан чүвези ол-дур.
Copyright information for
TyvTUV