Isa 23 | TyvTUV | STEP | Тир хоорай дугайында өттүр билген медеглел бо-дур . Ыглап-сыктаңар, Фарсистен ээп келген корабльдар! Тир хоорай үрелип бузулган-дыр, бүдүн бажың артпаан-дыр. Ол медээ оларга китт черден чеде берген .

‏ Isaiah 23

Финикия дугайында

1 Тир хоорай дугайында өттүр билген медеглел бо-дур ^a.

Ыглап-сыктаңар, Фарсистен ээп келген корабльдар! ^b
Тир хоорай үрелип бузулган-дыр, бүдүн бажың артпаан-дыр.
Ол медээ оларга китт черден чеде берген ^{▼▼ Китт чер – израильчилер ол үеде Чер ортузу далайның ортулуктары биле чартык ортулуктарын ынча деп адап турган (Э. д. 10:4; Сан. 24:24 көр).}.

2 Ыыт чок барыңар, далай эрииниң чурттакчылары, Сидон ^d хоорайның садыгжылары!
Далайга эжиндирип, байып турган силер;
3 Египеттен тарааны, Шихор болгаш Нилдиң эриктеринден дүжүттү
улуг делгем суглар кыры-биле сөөртүп турган силер.
Хоорайыңар хөй чоннарның садыг кылыр чери турган ^e.

4 Сидон, далай эриинде шивээ, ам бак атка кирген-дир сен!
Далай: «Эъдим аарып, божуп көрбедим.
Оолдар өстүрүп, кыстар кижизитпедим!» – деп турар.

5 Кажан Тир дугайында бо медээ Египетке чеде бээрге,
египетчилер сириңейни бээр.

6 Далай эрииниң чурттакчылары, Фарсисче көже бериңер, ыглап-сыктаңар!
7 Тир хоорайның чурттакчыларының буттары
оларны ырак черлерге турумчуп чурттаар кылдыр алгаш барып турган болгай.
Шаандакы үеде үндезилеттинген, өөрүп-хөглээн хоорайыңар ам канчап барганы ол?
8 Тирге – хааннарны дүжүлгеге олуртуп турган,
садыгжылары чагырыкчылар бооп келген,
садыг кылыр улузу чер-делегейде алдаржаан хоорайга –
ындыг хуу-салымны кым онааганыл?
9 Ону Аг-шериглиг Дээрги-Чаяакчы онааган:
турамык, хүндүткелге ынак бүгү улустуң адын баксырадыр дээш
база чер кырында бүгү алдар-аттыг улусту куду көөр дээш Ол ынчанган.

10 Фарсистиң чурттакчылары, чуртуңарже эжиндирип чоруй барыңар,
силерге мында өртээл чок-тур!
11 Дээрги-Чаяакчы Бодунуң холун далай кырынче сунарга ^f,
күрүнелер сириңейни берген.
Ол Ханаанның шивээлерин бузар деп дужаал үндүрген.
12 Дээрги-Чаяакчы: «Чазарлаттырган уруг, күжүр Сидон-кыс,
моон соңгаар өөрүшкү көрбес сен!
Доп-дораан китт черже ^{▼▼ 23:1-де немелде тайылбырны көр.} чоруй баар-даа болзуңза,
аңаа безин амыр-дыш көрбес сен» – дээн.
13 Халдейлер чуртунче көрүңер ^h, ол чон ам чок-тур!
Ассирия ооң черин черлик аң-меңге берипкен.
Ассирийлер бүзээлел суургалары тудуп алгаш,
халдейлерниң бүгү шивээлерин үрегдеп бузуп,
бүгү чүвени бузундулар кылып каапкан.

14 Ыглап-сыктаңар, Фарсистен ээп келген корабльдар!
Силерниң шивээңер үрелип бузулган-дыр.

15 Хүнү кээрге, Тир хоорай бир хаанның назыны хире хуусаада –
чеден чыл дургузунда ⁱ уттундура бээр.
Ынчалза-даа ол чеден чыл эрте бээрге,
бир ырда кирген самыын-садар херээжен-биле болган чүве Тир-биле болур:
16 «Чадаганың туткаш, хоорайны эргий кези,
хамык улуска кагдырган самыын-садар кыс!
Кызып-кызып аянныг кылдыр ойна,
хөй ырдан улай-улай ырла – улус сени сактып кээр чадавас».

17 Чеден чыл эрте бээрге, Дээрги-Чаяакчы Тирже сагыш салыр.
Тир база катап бодунуң садыг ажылын кылып,
чер кырында бар бүгү күрүнелер-биле будалып эгелээр ^j.
18 Ындыг-даа болза, ооң орулгазы, ажык-кончаазын
Дээрги-Чаяакчыга аңгылап каан болур – ону чыып, шыгжавас –
ол орулганы Дээрги-Чаяакчының күзээн аайы-биле чурттап турар улусту
тоттур чемгереринге база шынарлыг хепкереринге ажыглаар.