Isa 24 | TyvTUV | STEP | Дээрги-Чаяакчы чер-делегейни хоозурадып, куругладып каар – ооң хевир-дүрзүзүн үреп, ында чурттап турар улусту тарадыр сывыртаптар.

‏ Isaiah 24

Бурганның чер-делегейни кезедири

1 Дээрги-Чаяакчы чер-делегейни хоозурадып, куругладып каар ^a – ооң хевир-дүрзүзүн үреп, ында чурттап турар улусту тарадыр сывыртаптар.
2 Карачал улусту база Бурганның бараалгакчыларын,
эр, херээжен чалчаларны база оларның дээргилерин,
чегдинген кижини база чээли берикчизин,
чиижең хөөчү кижини база өрелиг кижини –
шуптузун чаңгыс салым-хуу манап турар ^b.
3 Чер шуут-ла хоозурап, үптеттирер.
Дээрги-Чаяакчының чугаалаан сөзү ол-дур.

4 Чер качыгдап, харыксыраар ^c,
бүгү делегей хилинчек көрүп, харыксыраар,
бедик дээр биле чер харыксыраар! ^{▼▼ Азы: «Черниң күш-шыдалдыг кижилери харыксыраар».}
5 Черни ооң чурттакчылары бужартаткан ^e:
олар хоойлуларны херекке албаан, дүрүмнерни тооваан,
мөңге чагыг-керээни үрээн.
6 Ынчангаш черни каргыш чиир ^f –
ооң чурттакчылары бачыт дээш кеземчеге онаашкан!
Ынчангаш черниң чурттакчылары өрттенип каар ^g, чүгле эвээш кижи артар.

7 Виноград чулуу соглуп ^h, сыптар кадып каар,
сеткил-чүрээнден хөглеп турган улус аар тынар.
8 Хөглүг дамбыралар ыыт чок баар, өөрүп-байырлаан үннер дыңналбастаар,
хөглүг чадаганнар ыыды чидер ⁱ.
9 Улус арага ижип, ырлашпас апаар –
эзиртир суксун ижерге, ажыы кончуг апаар.

10 Ээнзирээн хоорайны үреп бузуп кааптар,
хамык бажыңнар хааглыг боор – кирер арга чок.
11 Арага чок боорга, кудумчуларга алгы-кышкы дыңналыр.
Хөглээшкин өжүп каар, өөрүшкү черни каапкаш баар ^j.
12 Хоорайга чүгле хоозурал артар,
ооң хаалгаларын буза шаап кааптар.
13 Чер кырынга, чоннар аразынга ындыг болур.
Олива чимизи азы виноград чыып турда ышкаш,
ажаалда адакталган үеде чүгле каш борбак кат артканда ышкаш болур ^k.

14 Дыңзыг үннер, өөрүшкүлүг алгы-кышкы дыңналыр –
Дээрги-Чаяакчының өндүр бедиин барыын чүкке алгап ырлаар!
15 Дээрги-Чаяакчыны чөөн чүкке база алгап-мактаңар!
Дээрги-Чаяакчының, Израильдиң Бурганының адын
далай эриин дургаар алдаржыдыңар!
16 Чер-делегейниң ужу-кыдыындан: «Чөптүг Бурганга алдар!» – деп
ырлажырын дыңнаар бис.

А мен: «Өлдүм-читтим, өлдүм-читтим! Ат болдум!
Өскерликчилер өскерлип тур! ^l Олар өскерликчи ёзу-биле өскерлип тур!» – дидим.
17 Черниң чурттакчылары, коргунчуг байдал,
оңгар болгаш какпа-дузак силерни манап турар ^m.
18 Коргуушкуннуң алгы-кышкызын дыңнааш, дескен кижи
оңгарже кээп дүжер;
оңгардан үнүп келген кижи дузакка туттуна бээр ⁿ.
Дээрниң эжиктери ажыттынар, черниң үндезиннери сирилээр ^o.
19 Чер буступ каар, ол чайганып, сириңейни бээр.
20 Чер, эзирик кижи дег, тендириир ^p,
майгын дег, чайганыр;
ооң бузут-багы, аар чүък бооп, ону базып аар,
ол кээп дүшкеш, туруп чадап каар!

21 Ол хүн кээрге, Дээрги-Чаяакчы дээрлерге – дээрниң аг-шериин,
черге – чер-делегейниң хааннарын кезедир.
22 Оларны, хоругдаткан улусту дег, оңгарга чыып каар;
оларны кара-бажыңнааш, элээн үе эртерге, оларга кеземче онаар.
23 Аг-шериглиг Дээрги-Чаяакчы
Сион дагда турар Иерусалимге хааннай бээрге ^q
база Бодунуң өндүр чырыын улустуң баштыңнарынга көргүзерге,
айның арны кызар, хүн ыяды бээр ^r.