‏ Isaiah 26

Иудеяның мактал ырызы

1Ол хүн иудей черге мындыг ыр ырлажыр: Бистиң хоорайывыс быжыглалдыг! Бурган биске камгалалды –
ханалар биле камгаланыр чалды тургузуп турар.
2Эжик-хаалганы ажыдыңар,
Бурганга шынчы, чөптүг-шынныг чон кирип келзин ^a.
3Чайгылыш чок туруштуг кижиге чаагай чорукту чорудуп бээр сен,
ол кижи Сеңээ идегеп турган болгай.
4Дээрги-Чаяакчыга кезээ мөңгеде идегеңер,
чүге дээрге Дээрги-Бурган-Чаяакчы – мөңге Хая-дыр! ^b
5Ол бедик черге чурттап турган улусту дүжүр октаан,
оларның бедикте турар хоорайын үреп бускан –
черже, довуракче дүжүр октаан.
6Ам ол хоорайны таптай базып турар –
ядыыларның буттары, түреңгилерниң таваңгайлары
ону кырлап эртип турар.

7Чөптүг-шынныг кижиниң оруу дорт –
Сен аңаа оргу-дески орукту ажыдып бээр сен ^c.
8Бис Сээң айтыышкыннарың оруу-биле чоруп ор бис,
о, Дээрги-Чаяакчы, Сеңээ идегээр бис!
Сээң адыңче, Сээң алдарыңче сеткил-сагыжывыс чүткүп турар.

9Дүне када мээң сеткил-сагыжым Сенче чүткүп турар,
эртен мээң ишти-хөңнүм Сен дээш сагышсырап турар ^d.
Чер кырынга Сээң шынныг шииткелдериң илереп турда ^e,
чер-делегейниң чурттакчылары чөптүг-шынныг чорук деп чүл ол дээрзин билип аар.
10Бир эвес бузуттуг кижини өршээр болза, бодун шынныы-биле алдынмайн баар –
чөптүг улустуң чуртунга ол биеэги хевээр бузут үүлгедир,
а Дээрги-Чаяакчының өндүр бедиинче көрүнмес-даа.

11О, Дээрги-Чаяакчы! Сээң холуң өндүр бедик-тир, а бузуттуглар ону көрбейн тур.
Сээң чонуңну көөр хөңнү чок улус ону көрүп кааш, ыядып човай бээр ^f.
Сээң дайзыннарыңга доктаадып кааның от оларны чиптер ^g.
12О, Дээрги-Чаяакчы! Сен биске амыр-тайбыңны хайырлап тур сен! ^h
Чедип алган бүгү чүвевисти биске Сен кылып берген сен.
13О, Дээрги-Чаяакчы Бурганывыс! Сенден аңгы, өске дээргилер бисти башкарып турду ⁱ,
ынчалза-даа бис чүгле Сээң адыңны сактып, алгап-мактап турдувус.
14Ол дээргилер өлүп калган, ам дирилбес, өлүглер оранындан туруп келбес.
Сен оларны кезедип, узуткап каан сен,
олар дугайында сактыышкын-даа турбас кылып каан сен ^j.
15А чонувусту өстүрүп-көвүдеткен сен, о, Дээрги-Чаяакчы!
Сен чонну көвүдеткен сен ^k,
Бодуңну алдаржыдып, чурттуң кызыгаарын делгемчиткен сен.

16О, Дээрги-Чаяакчы! Чонувус кызагдаткаш, холун Сенче сунуп турду.
Сен ону кезедип туруңда, арай деп-ле сымыранып мөргүп турду.
17Иштиг херээженниң божуур бетинде хилинчектенип, алгырып чыдары дег ^l,
бис база Сээң мурнуңга ындыг-дыр бис, Дээрги-Чаяакчы.
18Бис иштиг турган бис, хилинчектенип турган бис,
ынчалза-даа чүгле хат божаан бис.
Чер-делегей кырынга тиилелге чедип албаан бис,
ооң чурттакчылары бистиң мурнувуска кээп дүшпээн.

19Сээң өлүг улузуң дирлип кээр,
өлүглерниң мөчү-сөөгү амыдыралче эглип кээр!
Довуракка хөмдүрген улус, оттуп келиңер, өөрүшкүлүг ырлажыңар!
Сен оларны, эртенги шалың ышкаш, сериидедир сен.
Өлүглер ораны бодунуң улузун үндүрүп салыр ^m.

20Мээң чонум, бар че, бажыңыңче кирип, эжииң хаап ал!
Бурганның килеңи чавырылгыжеге чедир, түр када чаштына бер ⁿ.
21Чүге дээрге Дээрги-Чаяакчы черниң чурттакчыларын кем-буруузу дээш кезедири-биле
Бодунуң турар черинден үнүп кел чыдыр ^o.
Чер ооң кырынга төпкен бүгү ханны көргүзүптер,
өлүрткен улусту оон ыңай чажырбайн баар.