Isa 3 | TyvTUV | STEP | Аг-шериглиг Дээрги-Бурган-Чаяакчы Иерусалим биле Иудеядан аъш-чем биле ижер сугнуң бүгү курлавырын хунаап аппаар ;

‏ Isaiah 3

Иерусалим биле Иудеяның буураар хүнү кээр

1 Аг-шериглиг Дээрги-Бурган-Чаяакчы Иерусалим биле Иудеядан аъш-чем биле ижер сугнуң бүгү курлавырын хунаап аппаар ^a;
2 дидим маадырлар база дайынчылар, шииткекчилер база Бурганның медээчилери,
бүдүү билирлер база чагырыкчылар бо черге артпас;
3 шериг баштыңнары база ызыгууртаннар;
чөвүлекчилер, шевер усчулар болгаш билди-билиглиг илбичилер бо черге артпас.
4 «Мен аныяк оолдарны оларга баштыңчылар кылып каар мен,
чаш төлдер оларны чагырар!»
5 Улус бот-боттарын – кижи бүрүзү өске кижини дарлаар ^b.
Аныяктар – кырганнарга, карачалдар – ызыгууртаннарга
турамык чаңын көргүзер.
6 Кым-бир кижи ачазының аалынга бодунуң төрелинден салдынмайн:
«Сен тоннуг-дур сен, ынчангаш биске баштыңчы бооп көр,
бо бузундуларны ээлеп чагырып көр!» – дээр.
7 А демгизи: «Силерни экиртип шыдавас мен.
Аалымда аъш-чем-даа, хеп-даа чок,
мени чоннуң баштыңы кылбаңар» – деп харыылаар.

8 Иерусалим буураар, Иудея кээп дүжер,
чүге дээрге оларның сөстери биле ажыл-херектери
Дээрги-Чаяакчыга удурланышкак, өндүр бедик Ону дорамчылап турар болган.
9 Оларның арыннарының аян-шинчизи боттарынга удур херечилеп турар;
олар боттарының бачыдын Содомнуң чурттакчылары ышкаш ^c
чарлаттынып, чажырбайн турар.
Олар ат болур – боттарын бакка суп алган улус-тур!

10 Чөптүг-шынныг улуска: «Ачы-буян алыр силер» – деп чугаалаңар,
чүге дээрге олар боттарының ажыл-херээниң үре-түңнелин четтирер ^d.
11 Кем-буруулуг улус ат болур!
Олар холу-биле кылган ажыл-херээ дээш кеземче көөр.

12 Мээң чонумну бичии уруглар безин кызып-кыйып турар,
херээженнер чагырып турар.
Мээң чонум! Сени башкарыкчыларың өскээр эдертип,
алыс шын оруктан астыктырып тур.

Дээрги-Чаяакчының Бодунуң чонун шииткени

13 Дээрги-Чаяакчы шииткел үндүреринге белен,
бүгү чоннарны ^{▼▼ Өске бурунгу сөзүглелде «бүгү чоннарны» эвес, а «Бодунуң чонун» деп бижээн.} шиидер дээш туруп келген ^f.
14 Дээрги-Чаяакчы Бодунуң чонунуң баштыңнары болгаш нояннары-биле
чаргызын чарып эгелээн ^g: «Силер Мээң виноградым шөлүн хоозураткан силер,
ядыы улустан үптеп алган эт-хөреңгиңер – бажыңнарыңарда ^h.
15 Чүү дээш Мээң чонумну кызып-кыйып, ядыы улусту дарлап турар силер? ⁱ»
Аг-шериглиг Дээрги-Бурган-Чаяакчының медеглээн чүвези ол-дур.

16 Дээрги-Чаяакчы: «Сионнуң херээженнери турамык, мойну чооннаан,
көрүжү-биле эрлер дуурайлаар, чаяңнадыр кылаштаар,
кажыктарында каасталгалары дагжаар улус-тур ^j» – дээн.
17 Ынчангаш Дээрги Сионнуң херээженнериниң баштарын тазартып каар,
Ол оларның тейин дөңгүрертир чүлүп каар!
18 Ол хүн Дээрги оларның каасталгаларын хунаап аар:
буттуң кажыктарынга кедер чараш илчирбежигештерин,
хүн база чартык ай хевирлиг каасталгаларын ^k,
19 сыргаларын, билектээштерин, баш шывыгларын болгаш шарыгларын,
илчирбежигештерин, курларын, чаагай чыттыг чүүлдерлиг саважыгаштарын, чавагаларын,
20 билзектерин, думчукка азар дээрбектерин,
21 аянныг хевин, каъттангыларын, тоннарын, акша хаптарын,
22 көрүнчүктерин, каас-коя иштики хептерин,
бөрттерин болгаш баш аржыылдарын хунаап аар.
23 Оларга чаагай чыттыг чүүл орнунга бак чыт турар,
кур орнунга – хендир, каас-коя хеп орнунга – качыгдалдың самдар хеви,
чараш арын-шырай орнунга – дорамчылал демдээ турар ^{▼▼ Бо домактың утказы эки билдинмес. Ооң болгу дег өске утказы мындыг: «Кул кижиниң демдээ турар».}.

24 Иерусалим, сээң эр улузуң хылышка шаштырып аар,
эрес-маадыр улузуң дайын-чаага кырлып каар.
25 Хоорайның хаалгалары ыглап-сыктап, хомудаар ^m,
Иерусалим-кыс хоозурап, черге олуруп аар ⁿ.