‏ Isaiah 32

Чөптүглерниң чагыргазы

1Хаан шынныы-биле хааннай бээр, чагырыкчылар чөптүү-биле чагырар ^a.
2Оларның кайызы-даа хаттан хоргадаар чер, шуургандан чаглак,
суг чок черде аккан суг, кагып-суксаан черде улуг хая хөлегези дег болур ^b.
3Карактыг улустуң карактары ам-на тода көре бээр,
кулактыг улустуң кулактары ам-на дыңнап каар ^c.
4Будулчак угаан орталаны бээр,
келдир улус дүрген, тода чугаалап эгелээр.
5Ам мугулай кижини хүндүткелдиг кижи дивес,
дүржок кижини ат-алдарлыг кижи дивес.
6Чүге дээрге мугулай кижи мелегей чүве чугаалаар,
ооң угааны бузуттуг үүлгедиг бодаар;
ооң ажыл-херээ чүдек-бужар болур,
Дээрги-Чаяакчының дугайында ол шын эвес чүве чугаалаар.
Аштаан кижиге ол аъш-чем бербес,
суксаан кижиге суг ижиртпес ^d.
7Дүржок кижи хоралыг үүлгедиглер кылыр, ооң бодалы кара сагыштыг –
ядыы кижи шииткел черинге шынын чугаалап-даа турза,
ону меге-биле чок кылып каар.
8А хүндүткелдиг кижиниң сагыжы ак,
ол чаагай сеткилдиг херектер кылганда, туруштуг.

Иудей херээженнерге сагындырыг

9Сагыш амыр херээженнер ^e, ам мени дыңнаңар!
Тоор чүвези чок кыстар, чугаа-сөзүмче кичээнгейден салыңар!
10Тоор чүвези чок херээженнер, бир чыл бичии ажарга, сириңейни бээр силер,
чүге дээрге виноград чимизи чыыр үе эрте бээр, а ажаар дүжүт чок боор.
11Сагыш амыр херээженнер, сүрээдеңер,
тоор чүвези чок кыстар, сирилеңер!
Хевиңер уштуп октапкаш, качыгдал хевин орааттынып алыңар.
12Хөрээңер шаштынып, үнүш үнүүчел шөлдер дээш
база элбек чимистиг виноград сыптары дээш кажыыдаңар;
13мээң чонумнуң чери дээш кажыыдаңар,
аңаа ам чүгле тенниг бок үнүш өзер ^f.
Хөглүг чораан бүгү бажыңнар дээш,
өөрүп-байырлап турган хоорай ^g дээш кажыыдаңар.
14Чүге дээрге орду кагдынар, шимээнниг хоорай ээнзирээр;
дагда шивээ биле доскуул турар суурга кезээ шагда ээн чер апаар –
аңаа черлик элчигеннер амыр-шөлээн турар,
сүрүг мал ону одар-белчиир кылып аар.

15Оон Бурганның Сүлдези чонувусту өрүтен бүргээр ^h,
ээн кургаг хову сесерлик апаар, а сесерлик арга-эзим ышкаш көстүр.
16Ээн кургаг ховуга шынныг шииткел турумчуур,
чимистиг сесерликке чөптүг чорук туруп аар.
17Чөптүг чоруктуң үре-түңнели амыр-тайбың болур,
шынныг чорук оожургал биле айыыл чок чорукту кезээ мөңгеде доктаадыр.
18Мээң чонум тайбың суурларга, айыыл чок оран-саваларга,
дүвүрээзин чок черлерге чурттаар.
19(Арга-эзимни долу чылча согар ⁱ,
а хоорайны ол таваанга чедир буза шаап каар!)
20Амыр-чыргалдыг боор силер: бүгү суглуг черлерге үрезин чажар силер,
бода малыңарны база элчигеннериңерни каяа-даа кадарып болур силер.