‏ Isaiah 33

Узуткакчы боду узуткаттырар

1Узуткаашкынга таварышпаан узуткакчы, ат болур сен! Өскерлиишкинге таварышпаан өскерликчи, ат болур сен!
Узуткаашкын кылганың соонда, сени база узуткап каар;
өскерлиишкин кылганың соонда, улус сеңээ база өскерлир ^a.

2О, Дээрги-Чаяакчы, бисче ээ көрнүп көрем, Сеңээ идегээр болгай бис!
Эртенниң-не бисти деткип көрем, аар-берге үеде камгалап көрем.
3Сээң түрлүг шимээниң дыңнааш, чоннар дезип тур;
Сен көдүрлүп кээриңге, аймактар тарай маңнажып тур.
4Чоннар, дайзын силерниң араңарга олча-тывышты шартылаа ышкаш чыыр,
шерги ышкаш, олче хөме шурай бээр! ^b
5Дээрги-Чаяакчы өрү көдүрткен ^c, Ол дээрлерниң эң бедиинде чурттап турар.
Ол шынныг шииткел биле чөптүг чорукту Сионга доктаадыр.
6Чонунуң назынының дургузунда Ол аңаа быжыг үндезин болур.
Мерген угаан, билиг болгаш камгалалды Ол элбээ-биле хайырлап турар!
Дээрги-Чаяакчыдан коргуушкун – чоннуң эртине-байлаа-дыр.

7Көр даан, эрес-маадыр улус кудумчуларда качыгдалдан алгыржып тур,
тайбың дилеп чоруткан элчиннер ыглап-сыктап тур ^d.
8Оруктар ээнзирээн ^e, чорук кылган улус көзүлбестээн.
Дугуржулгалар үреттинген, даңгырактар ▼

▼ Өске бурунгу сөзүглелде «Хоорайлар» деп бижээн.

уттундурган,
кижилер чүү-даа эвес апарган.
9Чер качыгдап, харыксырап чыдар ^g,
Ливан дагларының ады баксырап, кадып калган.
Шарон оргулаажы ээн кургаг ховуга дөмейлежип,
Васан биле Кармил девискээрлери сириңейнип турар ^h.

10«Мен ам туруп кээр мен ⁱ – деп, Дээрги-Чаяакчы чугаалап тур, –
ам көдүрлүр мен, өрү бедиир мен!
11Чоннар, силер кургаг сиген-биле саатталгаш, тараа саваңы божуп тур силер.
Боттарыңарның-на тыныжыңар боттарыңарны от дег чиптер!
12Чоннар хүлдендир өрттенип каар, одура кескеш,
отта өрттеткен тенниг чадаң үнүш дег апаар ^j.
13Ыракта улус, Мээң чүнү кылыр деп турарымны дыңнаңар,
чоокта улус, силер база Мээң күчү-күжүмнү билип алыңар!»

14Сионда турар бачыттыглар корга берген,
бужар-бак улус сүрээделге алзыпкан:
«Хөме ап турар от чанынга бистиң кайывыс чурттап шыдаарыл?
Өшпейн хып турар өрт чанынга бистиң кайывыс чурттап шыдаарыл?» ^k
15Чүгле мындыг кижи ^l: ажыл-херээнге чөптүг-шынныг база шынын чугаалаар;
кызагдал-биле чедип алган ажык-кончаа алырындан ойталаар;
хээли алыр дээш, холун сунмас;
өлүрүүшкүнге киржилге дугайында чугаалар дыңнавас дээш, кулаан бөөшкүннеп аар;
бузут үүлгедиишкини көрбес дээш, караан шийип аар кижи ынчап шыдаар.
16Ындыг кижи бедиктерге чурттаар: ооң хоргадалы – чагдаар аргажок хаялар;
ол аъш-чемниг боор, ооң суу база төнмес.

17Сээң карактарың бодуңнуң хааныңны чайынналчак кылдыр көрүп каар,
ыракта чаттылган черни база көрүп каар.
18Биеэги коргуушкунуңну сактып келгеш, кайгап-хараар сен:
«Үндүрүг санап база деңзилеп турган дүжүметтер кайыл?
Суургалар хынап көрүп турган шериглер кайыл?»
19Ол турамык, тода чугаалай албас, элдептиг база билдинмес дылдыг чонну
оон ыңай көрбес сен ^m.

20Бистиң байырлалдарывыс болуп турар Сион хоорайже көрүп көр,
карактарыңны Иерусалимче шиглей көр!
Оожум оран-сава, туружундан шимчевес майгын бо-дур;
ооң өргеннери ушта тырттынмас быжыг,
хендирлериниң чаңгызы-даа үстүр ужур чок.
21Аңаа өндүр улуг Дээрги-Чаяакчы бис-биле кады болур –
ол чер болза аккан суглар, калбак хемнерниң чурту болур,
аңаа эшкииштиг чаңгыс-даа улуг хеме көзүлбес,
чаңгыс-даа улуг-чаагай корабль олап эжиндирип эртпес.
22Дээрги-Чаяакчы – бистиң Баштыңчывыс,
Дээрги-Чаяакчы – бистиң Чагырыкчывыс,
Дээрги-Чаяакчы – бистиң Хаанывыс, Ол бисти камгалаар.
23Корабльдарның хендирлери кошкай берген,
мачтаны тудуп, парусту хере тыртып шыдавас апарган.

Ынчан арбын олча-тывыш үлешке кирер,
аскак кижилер безин үп сүрүп чоруптар.
24Черивистиң чурттакчыларындан кым-даа: «Мен аарып тур мен» – дивес;
ында чурттап турар чоннуң бачыттары өршээттинер.