Isa 38 | TyvTUV | STEP | Ол үеде Эзекия аарый берген, өлүрүнүң кырында келген. Амоцтуң оглу Исайя медээчи аңаа келгеш, Дээрги-Чаяакчының сөзүн дамчыдып: «Ажыл-херээңни аайлап-башкарып ал, ам өлүр-дүр сен, назының төнген-дир»

‏ Isaiah 38

Эзекияның аарааны база ооң мактал ыры

(4 Хаан. 20:1-11; 2 Чыл. 32:24-26)

1 Ол үеде Эзекия аарый берген, өлүрүнүң кырында келген. Амоцтуң оглу Исайя медээчи аңаа келгеш, Дээрги-Чаяакчының сөзүн дамчыдып: «Ажыл-херээңни аайлап-башкарып ал, ам өлүр-дүр сен, назының төнген-дир» – деп чугаалаан. 2 Эзекия ханаже хая көрнүп алгаш, Дээрги-Чаяакчыга мөргүп эгелээн: 3 «О, Дээрги-Чаяакчы, сактып кээп көрем! Мен Сээң мурнуңга шынчы чурттап, сеткилимден бердинип келдим, Сеңээ таарымчалыг чүүлдү кылып чордум!» ^a Оон Эзекия ишкирнип ыглай берген.

4 Дээрги-Чаяакчы Исайяга Бодунуң сөзүн ажыдып, мынча деп чугаалаан: 5 «Барып, Эзекияга ооң ада-өгбези Давидтиң Бурганы Дээрги-Чаяакчының бо сөстерин дамчыт: Мен сээң дилег-мөргүлүңнү дыңнадым, карааң чажын көрдүм ^b – ынчангаш Мен сээң назыныңга он беш чылды немеп берип тур мен. 6 Ол ышкаш Ассирияның хаанының холундан сени база бо хоорайны адырып каар мен – бо хоорайга болчур мен ^c. 7 Сеңээ Бодумнуң аазаан аксы-сөзүмнү күүседирим дугайында бадыткал демдээ бо-дур: 8 Ахазтың чадазының тепкииштеринче бадып келген хөлегени дедир, он тепкииш өрү, чылзыдыптар мен».

Хүн дедир чыла берген: хөлеге бадып келгени тепкииштерни өрү алзы көдүрлү берген ^d.

9 Аарааш, экирий берген соонда, Иудеяның хааны Эзекияның бижээн чүүлү бо-дур:

10 «Мен „Назынымның ортузунда
өлүглер оранының хаалгазын ажыдып кирерим ол-дур,
назынымның арткан кезээн казыдып алган-дыр мен“деп бодадым.
11 Мен „Дээрги-Чаяакчыны дириглер оранынга көрбезим ол-дур ^e;
өлүглер оранынга баргаш, моон соңгаар кижи амытанны көрбезим ол-дур“деп бодадым.
12 Мээң оран-савамны, кадарчы кижиниң чадыры ышкаш,
турган черинден дүжүргеш, аппарган ^{▼▼ Кижиниң мага-бодунуң өлүмүн ойзу чугаалап турар (2 Кор. 5:1 көр).}.
Мен бодумнуң амы-тынымны, аргыкчы кижи пөзүн дүрери дег,
дүрүп ап тур мен.
Дээрги-Чаяакчы мени, аргыыр херекселден пөстү кезери дег,
үзе кезип кааптар ^g.
Дүне, хүндүс Сен мени өлүмче аппар чыдыр сен!
13 Мен эртенге чедир томаанныг манап келдим,
а Бурган, арзылаң ышкаш, мээң бүгү сөөк-даяамны сыйып турду ^h.
Дүне-даа, хүндүс-даа болза Сен мени өлүмче аппаар-дыр сен.
14 Мен хараачыгай азы дуруяа ышкаш эдер-дир мен,
көге-буга ышкаш човууртаар-дыр мен ⁱ.
Үргүлчү өрү көөр дээш, карактарым шылап калды ^j.
Меңээ бергезин! Дээрги-Чаяакчы, меңээ дузалап көр!

15 Мен бодум чүнү чугаалап шыдаар мен?!
Ол меңээ чугаалады, Ол Боду-ла кылып кагды.
Качыгдалга алыскан болгаш, назынымның шупту чылдарын
оожум төндүр чурттаар мен.
16 Мээң Дээргим, улус мынчаар чурттап турар-дыр!
Бо бүгү дээрге мээң чуртталгам ышкажыл!
Сен мени экиртип, амы-тынны хайырлап көр!
17 Ийе, ындыг хилинчек меңээ ачылыг болган-дыр.
А Сен мээң амы-тынымны чевег-хөөрден чайладып ^k,
мээң бүгү бачыттарымны Бодуңнуң ооргаң артынче октап көрем ^l.
18 Өлүглер оранында Сени алдаржытпайн турар,
өлүг улус Сени алгап-мактавайн турар болгай ^m.
Чевег-хөөрже кире берген улус Сээң шынчыңга идегеп шыдаар эвес.
19 Дириг, чүгле дириг кижи Сени бөгүн мен ышкаш алгап-мактаар.
Адазы оолдарынга Сээң шынчың дугайында чугаалаар ⁿ.

20 Дээрги-Чаяакчы мени камгалаар!
Бис Дээрги-Чаяакчының өргээзинге,
мээң хылдыг хөгжүм херекселдеримге үдедип,
Ону амыдыралывыс дургузунда алгап ырлап кээр бис!»

21 (Исайя: «Фига чимизинден кылган эмден эккелгеш, ириңниг балыгга чыпшыр салыпсын, ынчан хаан экирий бээр» – дээн. 22 А Эзекия: «Меңээ Дээрги-Чаяакчының өргээзинче ам-даа баарымның бадыткал демдээ кандыг боорул?» – деп айтырган.) ^{▼▼ Бо шүлүктерни 6-гы шүлүктүң соонче киирер турган чадавас (4 Хаан. 20:7-8 көр).}