‏ Isaiah 40

Израиль чонга аргалал сөстери

1«Мээң чонумну аргалаңар-ла, аргалаңар! ^a – деп, Бурганыңар чугаалап тур. –
2Иерусалим-биле эрге-чассыг чугаалажыңар ^b,
ооң аар-берге албан-ажылы төнгенин,
кем-буруузу дээш кеземчези четчир болганын аңаа медеглеңер;
ол бодунуң бүгү бачыды дээш
Дээрги-Чаяакчының холундан ийи дакпыр кеземче алган-дыр ^c».

3Бир-ле үн дыңналды: «Ээн кургаг ховуга
Дээрги-Чаяакчыга оруктан белеткеңер! ^d
Бурганывыска делгем оруктан ховуга дорттап бериңер! ^e
4Бүгү ыйгылааш черлер оргу апарзын,
бүгү даглар, тейлер чавызай берзин.
Дески эвес чер дескилежи берзин,
дөңнелчек черлер оргу апарзын.
5Дээрги-Чаяакчының өндүр чырыы ажыттынып кээр,
бүгү улус ону көрүп каар! ^f
Дээрги-Чаяакчы Боду ынча дээн болгай».

6Үн: «Медегле!» – диди.
Мен: «Чүнү медеглээр мен?» – деп айтырдым.
«Бүгү улус оът-сигенге дөмей,
оларның чараш-каазы ▼

▼ Өске бурунгу сөзүглелде «Доктаамал чоруу» деп бижээн.

шөлде чечектер дег.
7Дээрги-Чаяакчының тыныжы үрерге,
оът-сиген кургап каар, чечек оңа бээр.
Шынап-ла, чон дээрге оът-сиген-дир.
8Оът-сиген кадып каар, чечек тоглай бээр,
а Бурганывыстың аазаан сөзү кезээ мөңгеде турар! ^h»

9 Буянныг медээлиг медээчи Сион, бедик даг кырынче үне бер!
Буянныг медээлиг медээчи Иерусалим, дыңзыдыр алгырып чугаала!
Иудеяның хоорайларынга: «Бурганыңар бо-дур!» – деп
коргуш чок дыңзыдыр медегле.
10Көрүңер! Күчү-күштүг Дээрги-Бурган-Чаяакчы кел чыдыр.
Чагырга Ооң холунда-дыр.
Көрүңер, Ооң хайырлаар шаңналы Бодунда-дыр ⁱ.
11Ол Бодунуң сүрүг малын, кадарчы кижи ышкаш, кадарып турар ^j:
хураганнарны холунга тудуп, кужактап алгаш,
төрүүр хойларны сүрүп бар чыдар.

Дээрги-Чаяакчы деңнээр чүве чок кайгамчык

12Кым адыжы-биле далайның суун узуп хемчээгенил
азы холу-биле дээрни хемчээгенил?
Кым черниң бүгү довураан чүве хемчээр саваже сыңырганыл
азы даглар, тейлерни деңзи таваанга салып, деңзилээнил? ^k
13Кым Дээрги-Чаяакчының угаанын билип ап,
Аңаа арга-сүме берип шыдааныл? ^l
14Кымдан Ол сүме айтырганыл,
кым Аңаа угаан киир тайылбыр берип,
шын орукче киирер сургаал кылганыл?
Кым Ону билигге өөредип,
чүве билип аарының оруун Аңаа айытканыл? ^m

15Бүгү чоннар кочалда дамды дег,
деңзи таваанда доозун ышкаш!
Бурган далайның ортулуктарын безин,
борбак элезин дег, чииги-биле көдүрүп турар.
16Аңаа Ливанның эзим-аргазы өргүл салыр от кыпсыр шаа четпес,
а ында турар дириг амытаннар –
бүрүн өрттедир өргүл кылыр шаа четпес ⁿ.
17Бүгү чоннар Ооң мурнунга чүү-даа эвес ^o,
оларны Ол хоозун, чөгенчиг чүүл деп санаар.

18Ынчангаш Бурганга кымны дөмейлештирер силер?
Аңаа дөмейлепки дег кандыг чүүл тып шыдаар силер? ^p
19 Дүрзү-бурган бе? А ону шевер кижи шуткуп кылып каан,
ус-шевер кижи алдыннааш,
мөңгүн илчирбелер-биле каастап каан болур.
20А ындыг аар өртектиг чүүлдер ажыглап шыдавас ядыы кижи
иривес ыяш шилип тыпкаш,
кээп дүшпес дүрзү-бурган кылып бээр
билдилиг ус-шевер кижи тып аар ^q.

21Таанда-ла билбес силер бе? Дыңнаваан силер бе?
Эң эгезинде-ле силерге чугаалап кагбаан чүве бе?
Чер-делегейни канчаар чаяап каанын билип албааныңар ол бе?
22Дээрги-Чаяакчы чер-делегейниң дээрбээниң кырында саадап турар,
а чер-делегейниң чурттакчылары имилеме шартылаа дег ^r.
Бурган дээрни, чуга пөс ышкаш, чада салгаш,
чурттаар майгын дег, хере тыртып каан ^s.
23Бурган черниң чагырыкчыларын чүү-даа эвес апаар кылып,
баштыңчыларын бар-чогу дөмей кылып турар ^t.
24Оларны чаа-ла олуртуп, тарып каары билек,
олар чаа-ла черге дазылданы бээри билек,
Ол оларже тыныптарга, кургап каарлар,
казыргы оларны, тараа саваңы дег, хадып аппаар.

25«Мени кымга дөмейлештирер силер?
Мээң-биле кым деңнежирил?» – деп,
ыдыктыг Бурган айтырып тур.
26Карактарыңар дээрже шиглей көрүңер:
ында бар бүгү чүвени кым чаяаганыл?
Ол – сылдыстарның аг-шериин санап, көскү кылып турар,
оларның шуптузунга ат тыпсып турар Бурган-дыр ^u.
Ооң күчү-күжү кызыгаар чок,
эрге-чагыргазы өндүр улуг болгаш,
сылдыстарның чаңгызы-даа чыдып калбас.

27Иаков, сен чүге: «Мээң орук-чолум Дээрги-Чаяакчыдан чажыртынган,
Бурганым мээң чаргымны уттупкан ^v» – дээр сен,
Израиль, сен чүге ындыг чүве чугаалаар сен?
28Таанда-ла билбес сен бе? Таанда-ла дыңнаваан сен бе?
Дээрги-Чаяакчы – чер-делегейниң бүгү кыдыгларын чаяаган мөңге Бурган-дыр.
Ол могавас, шаа төнмес,
Ооң угаан-бодалын билип аары болдунмас ^w.
29Ол могап турупкан улусту күштүг кылып каар,
шаа төнген улусту быжыктырар ^x.
30Аныяк оолдар безин могай берип, шаа төне бээр,
чалыылар шылаанындан кээп дүжер,
31а Дээрги-Чаяакчыга идегээр улус чаа күш кирип алыр:
олар, эзир ышкаш, чалгынын херип-чайып, ужар ^y;
маңнашкаш, могавас, кылашташкаш, шагзыравас.