Isa 41 | TyvTUV | STEP | «Ырак ортулуктарның чурттакчылары, Мээң мурнумга ыыт чок барыңар! Бүгү чоннар чаа күштен немеп алзын; олар чоокшулап келгеш, бодунуң сөзүн чугаалазын. Чаргы үзер дээш кады чыглыылыңар .

‏ Isaiah 41

Дээрги-Чаяакчы – Израильдиң Дузалакчызы

1 «Ырак ортулуктарның чурттакчылары, Мээң мурнумга ыыт чок барыңар!
Бүгү чоннар чаа күштен немеп алзын;
олар чоокшулап келгеш, бодунуң сөзүн чугаалазын.
Чаргы үзер дээш кады чыглыылыңар ^a.

2 Кым чөөн чүктен тиилекчини ^{▼▼ Азы: «Чөптүг кижини», «эжелекчини». Персияның хааны Кирни ынча деп турар чадавас.} үндүрүп эккелгеш,
бодунга бараан боор кылдыр кыйгырып алганыл?
Кым аңаа чоннарны хүлээдип берип, хааннарны чагыртканыл? ^c
Ол кижи бодунуң хылыжы-биле оларны доозун-довуракче хуулдуруп,
бодунуң ча-согуну-биле, тараа саваңы дег, эстедир хадыдып турар.
3 Ол кижи мурнунда кажан-даа чоруп көрбээни орук-биле айыыл чок чоруп,
чоннарны истеп-сүрүп бар чыдар.

4 Кым ол бүгүнү кылып, боттандырганыл?
Эң эгезинден кижи төрелгетенниң бүгү салгалдарын
башкарып турар Бурган!
Мен, Дээрги-Чаяакчы – эгезинде турган мен,
сөөлгү салгал-биле база Мен ^d –
ол-ла Бодум кады турар мен!

5 Ырак ортулуктарның чурттакчылары ол кижини көрүп кааш,
коргуушкунга алзыпкан,
чер-делегейниң ужу-кыдыы сүрээдей берген.
Олар чоокшулажып, чыылганнар.
6 Бот-боттарынга дузалажып, бирээзи өскезинге:
„О, эрес-дидим бол!“– деп турганнар.
7 Ус-шевер кижи эзилдирикчи шеверниң сеткилин сергедип турар,
маска-биле хевилээр кижи дөжүде дарганнаан кижиниң сеткилин сергедип,
тудуштур каңнап каан черин „Эки-дир, быжыг-дыр!“деп,
дүрзү-бурган божаңнавазын дээш, өрген-биле быжыглап турар ^e.

8 О, Мээң чалчам Израиль ^f,
Мээң шилип алганым Иаков,
Мээң өңнүүм Авраамның ^g салгалы!
9 Мен сени чер-делегейниң ужу-кыдыындан эдерткеш,
эң ырак черлерден үндүр кыйгырып алгаш:
„Сен – Мээң чалчам сен“– деп чугаалаан мен.
Сени шилип алган мен, сенден ойталавас мен.
10 Кортпа, чүге дээрге Мен – сээң Бурганың-дыр мен,
сүрээдеве, чүге дээрге Мен сээң-биле кады мен.
Сени быжыктырып, сеңээ дузалаар мен.
Мээң тиилелгелиг холум сеңээ деткимче көргүзер.
11 Сеңээ килеңнээн бүгү улус бак атка кирип, бужартаар,
сеңээ удурланган улус чүү-даа эвес апаар, өлүп чидер.
12 Сээң-биле демисежип турган улусту дилээш, тыппас сен;
сээң-биле дайылдажып турган улус чүү-даа эвес апаар, шуут чиде бээр.
13 Мен – Дээрги-Чаяакчы, сээң Бурганың-дыр мен,
холуңдан тудуп алгаш:
„Кортпа, Мен сеңээ дузалаар мен“– деп аазап тур мен.
14 Кортпа, курт ышкаш ^h чөгенчиг Иаков, эвээш чоннуг Израиль,
Мен сеңээ дузалаар мен! – деп, Дээрги-Чаяакчы, сээң Камгалакчың,
Израильдиң ыдыктыг Бурганы медеглээн. –
15 Мен сени чаа, чидиг диштерлиг тараа бастырар херексел кылып каар мен,
сен дагларны бастырып, чуура дүрбүүр сен,
тейлерни тараа тогланчызы дег кылып каар сен.
16 Сен оларны челбиириңге, хат хадып аппаар,
шуурган тарадыр шаап кааптар.
А сен бодуң Дээрги-Чаяакчы дээш өөрүүр сен,
Израильдиң ыдыктыг Бурганы дээш мактаныр сен.

17 Ядыы-түреңги улус суг дилээш, тыппайн турар,
олар кагып-суксааш, аксы кургап калган.
Мен, Дээрги-Чаяакчы, оларга харыы бээр мен;
Мен, Израильдиң Бурганы, оларны кагбас мен!
18 Тас тейлерден суглар агып бадар,
оргу черлерге суг баштары аттыгып үнер.
Ээн кургаг ховуну хөл кылып каар мен,
кургап калган черни суг баштары шыва аптар ⁱ.
19 Мен ээн кургаг ховуга пөш, акация,
мирт болгаш олива ыяштарын тарыыр мен;
ыяш чок турган черге шиви, чойган болгаш хады
кады өзүп үнер ^j.
20 Улус ол бүгүнү көргеш, Дээрги-Чаяакчының холу ону кылган деп,
Израильдиң ыдыктыг Бурганы ону чаяаган деп билип каар,
ол бүгүнү эскергеш, угаап билип каар.

Дүрзү-бурганнарның ажык чогу

21 Дүрзү-бурганнар, боттарыңарның херээңерни илередип чугаалаңар – деп,
Дээрги-Чаяакчы чугаалап тур.
– Боттарыңарның барымдааларыңарны көргүзүңер – деп,
Израильдиң Хааны чугаалап тур. –
22 Барымдаа кылдыр ам болур ужурлуг чүвени чугаалаңар.
Азы эрткен үеде чүү болуп турганын чугаалаңар,
а бис угаап бодап көргеш, ол бүгүнүң канчаар төнгенин билип аар бис.
Азы келир үе дугайында биске боттарыңар чугаалап бериңер.
23 Келир үеде чүү болурун чугаалаңар,
ынчан силерни бурганнар деп билип аар бис.
Бир-ле чүведен – буян-даа болза, айыыл-халап-даа болза – кылыңар,
ону көргеш, бис шупту коргуушкунга бүргедип аар бис.
24 Че чүл? Силер чүү-даа эвес-тир силер,
чүнү-даа кылыр харыыңар чок-тур ^k.
Силерни шилип алган кижи чүдек-бужар-дыр.

25 Мен демги тиилекчини ^l соңгу чүктен кыйгырган мен,
ол кел чыдар! ^m Хүн үнер чүкке ол Мээң адымны адап, алдаржыдар.
Ол чагырыкчыларны малгаш ышкаш базып кылаштаар –
дой сава кылыкчызы дойну ынчаар таптай базар.
26 Бисти ол дугайында билип алзын дээш,
кым баш бурунгаар чугаалааныл ⁿ;
бисти: „Ооңуу шын болду“– деп чугаалаар кылдыр,
кым баштай дамчытканыл?
Араңардан кым-даа чугаалаваан, кым-даа медээлевээн.
Чугаа-сөзүңерни дыңнаан кижи чок.
27 Мен ол дугайында Сионга эң баштай чугаалаан мен,
Иерусалимче буянныг медээлиг медээчини чоруткан мен! ^o

28 Мен көөрүмге, кым-даа чок болду –
өске бурганнарның аразында сүмелекчи чок болду.
Мен олардан чүве айтырар болзумза, харыылап шыдавастар.
29 Олар шупту – меге-дир, оларның ажыл-херээ – чүү-даа эвес-тир,
оларны көргүскен дүрзүлер – хат дег хоозун чүүл-дүр».