‏ Isaiah 42

Дээрги-Чаяакчының шилип алган чалчазы

1«Мээң шилип алган чалчам бо-дур ^a, Мен ону быжыглап турар мен; сеткилимге кирер кижи ол-дур! ^b
Мен ону Бодумнуң Сүлдем-биле бүргээр мен ^c –
ол өске чоннарга чөптүг шииткел үндүрер ^d.
2Ол алгырбас база кырышпас, дыңзыдыр чугаалавас,
ооң үнү кудумчуларга дыңналбас.
3Ол шала сынган хыыргыышты сыйбас,
имистелген чырыткыны өжүрбес;
ёзулуг чөптүг шииткелди үндүрер.
4Черге шын шииткелди үндүрбээн шаанда, ол сыйылбас, өшпес;
ырак ортулуктар ооң чагыг-суртаалын манап турар».

5Дээрни чаяап, чада салган,
черни ында төрүттүнген бүгү чүве-биле кады боттандырган,
чер кырында кижилерге амы-тынны хайырлаан ^e –
ында шимчеп чоруп турар бүгү улусту тынгарган
Дээрги-Бурган-Чаяакчы мынча дээн:
6«Мен, Дээрги-Чаяакчы, чөптүг-шынныг чорук боттандырар дээш
чалчам сени кыйгырган мен ^f,
сени холуңдан чедип аар мен, кадагалаар мен.
Сени дамчыштыр улус-чон-биле керээ чарар мен ^g
база бүгү чоннарга чырык эккээр мен ^h.
7Согур улустуң карактарын ажыдар сен,
хоругдаттырганнарны хоругдалдан үндүрер сен,
дүмбей черде олурар улусту кара-бажыңдан хостаар сен! ⁱ

8Мен – Дээрги-Чаяакчы мен, Мээң адым ол-дур!
Бодумнуң алдарымны өске кымга-даа бербес мен ^j
база Меңээ хамааржыр макталды дүрзү-бурганнар-биле үлешпес мен!
9Баш бурунгаар чугаалаан чүүлдерим бүде берген,
Мен ам чаа чүүлдерни медеглеп тур мен,
ам-даа боттанмаан чүүл дугайында силерге чугаалап тур мен».

Дээрги-Чаяакчыны алгап-мактаан ыры

10Дээрги-Чаяакчыга чаа ырдан ырлаңар ^k,
Ону чер-делегейниң ужу-кыдыындан алгап-мактаңар –
далайжылар болгаш далайны долган бүгү дириг амытаннар,
ортулуктар болгаш ында чурттап турар бүгү улус!
11Ээн кургаг хову болгаш ооң хоорайлары,
кедар аймак ^l чурттаан бүгү суурлар өөрүшкүлүг кыйгы салзын.
Хая-даштыг черде чурттаан улус өөрүп-байырлап,
даглар баштарындан алгырышсын!
12Дээрги-Чаяакчыны алдаржытсын,
Ону ырак ортулуктарга алгап-мактазын!

13Дээрги-Чаяакчы күчүлүг маадыр дег ^m чедип кээр,
дайынчы дег, килеңи кыптыгар,
дайынчы кыйгы салып, алгырар,
дайзыннарынга күжүн көргүзер:
14«Дыка үр ыыттавайн келдим,
шыпшыңны кадагалап, туттунуп келдим;
а ам, божаан херээжен дег, алгырар мен ⁿ,
тыныжым бачыдап, агаарны харамдыгып тынар мен.
15Тейлер, дагларны ээнзиредип,
оларның хамык оът-сигенин кадырып каар мен,
хемнерни кургаг ортулуктар кылдыр хуулдуруп,
хөөлбектерни кургадып каар мен ^o.
16Мен согурларны оларның билбези оруктар-биле эдертир мен,
оларга билдинмес турган оруктар-биле эдертир мен.
Оларның мурнунга дүмбей караңгыны чырык кылдыр хуулдуруптар мен,
ээр-дагыр оруктарны дорттап каар мен ^p.
Чонум дээш, ол бүгүнү кылыр мен, оон ойталавас мен.
17А дүрзү-бурганнарга идегээр улус,
шуткуп каан дүрзүлерге: „Силер – бистиң бурганнарывыс силер“– дээр улус
кончуг бак атка кирип, аткаарлаар ^q».

Согур, дүлей израиль чон

18«Дүлейлер, дыңнаңар, согурлар, көрүп көрүңер! ^r
19Мээң чалчам ^s ышкаш согур кижи бар бе?
Мээң айбылап чоруткан айбычым ышкаш дүлей кижи бар бе?
Дээрги-Чаяакчыга бердинген чалча дег согур кижи бар бе?
20Сен хөйнү көрген сен, ынчалза-даа эскерген чүвең чок-тур;
кулактарың дуглаглыг эвес, ынчалза-даа дыңнавас-тыр сен ^t».

21Дээрги-Чаяакчы чөптүг-шынныг болгаш,
ыдыктыг хоойлуну алдаржыдып, алгап-мактаары Аңаа таарымчалыг болган.
22А бо чон үптеттирип, когараан-дыр,
оларның шуптузу оңгарларда суктурган
азы кара-бажыңнарда чажыртынган.
Олар дайзынга олча-тывыш апарган,
оларны кым-даа адырып хоставаан;
оларны тудуп аппарган, кым-даа оларга болчуп:
«Оларны дедир эгит!» – дивээн ^u.

23Силерниң кайыңар ынаар кулаан ээктирерил,
кичээнгейге ап, моон-даа соңгаар дыңнаарыл?
24Кым Иаковту тудуп аппаар кылдыр,
Израильди – үптээр кылдыр берипкенил?
Аңаа удур бачыт үүлгеткенивис Дээрги-Чаяакчы-дыр!
Израильчилер Ооң оруун истевейн,
Ооң хоойлузун тооп дыңнавайн турган болгай.
25Ынчангаш Ол бисти кыптыккан килеңи-биле хөме ап,
бисче кам-хайыра чок дайын ыткан!
Шак ол дайын чалбыыштыг от бооп,
бисти бүгү чүктен бүзээлеп алган,
а бис ону ожаап билбээн бис;
от бисти чиирге, таптыг угаап билбээн бис ^v.