Isaiah 43
Дээрги-Чаяакчы – Израильдиң Камгалакчызы
1Иаковту чаяап каан, Израильди тывылдырып каан Дээрги-Чаяакчы ам мынча деп тур: «Кортпа. Мен сени садып хостап кагдым;Мен сээң адың адап, Бодумче кыйгырдым a,
сен – Мээңии сен.
2Суглар кежип туруңда, Мен сээң-биле боор мен,
хемнер кежип туруңда, суг сени хөме албас.
От өттүр эртип тургаш, өрттенмес сен,
чалбыыш сени чивес b.
3Мен – Дээрги-Чаяакчы, сээң Бурганың,
Израильдиң ыдыктыг Камгалакчызы-дыр мен.
Сени хостаар дээш, Мен Египет, Эфиопия болгаш Севаны
сээң орнуңга берип тур мен c.
4Сен Меңээ улуг үнелиг болгаш эргим болганыңда,
сеңээ Мен ынак болганымда, сээң орнуңга өске улусту,
сээң амы-тының дээш – өске чоннарны берип тур мен.
5Кортпа, Мен сээң-биле болгай мен;
сээң үре-салгалыңны чөөн чүктен эккээр мен,
барыын чүктен база сени чыыр мен d.
6Соңгу чүкке: „Оларны дедир бер!“– дээр мен,
мурнуу чүкке: „Оларны салывыт! – дээр мен. –
Мээң оолдарымны ырактан,
Мээң кыстарымны – чер-делегейниң ужу-кыдыындан эдертип эккел –
7Мээң адым-биле адаткан, Бодумга алдар кылдыр чаяап кааным,
Мээң боттандырып, хевирлээним бүгү улусту эдертип эккел“».
8Карактыг-даа болза, согур чонну,
кулактыг-даа болза, дүлей улусту үндүрүп эккел e.
9Бүгү чоннар кады чыглып келзин, аймактар бөлдүнчүп келзин.
Оларның кайызы ол бүгүнү баш бурунгаар чугаалааныл,
болуп эрткен чүүлдер дугайында биске медээлээнил?
Боттарының шынныын көргүзери-биле херечилелден кылзыннар;
оларны дыңнаан улус «Шын-дыр оо!» деп бадытказын f.
10«А Мээң херечилерим – силер силер,
чонум – деп, Дээрги-Чаяакчы медеглээн, –
Мээң чалчаларым база силер силер g;
чүвени билип алгаш, Меңээ бүзүрезин дээш
база Мени Бурган-дыр деп угаап билзин дээш,
Мен силерни шилип алган мен.
Менден аңгы Бурган чок,
кажан-даа турбаан, кажан-даа турбас.
11Мен, чүгле Мен – Дээрги-Чаяакчы мен!
Менден өске Камгалакчы чок! h
12Өске кым-даа эвес, Мен баш бурунгаар чугаалап,
медеглеп база камгалап каан мен!
Мээң херечилерим – силер силер – деп,
Дээрги-Чаяакчы медеглээн. – Мен – Бурган мен.
13Шагдан бээр Мен ол-ла Бодум мен!
Мээң холумдан улусту кым-даа адырып шыдавас i.
Мээң кылган чүвемни күш чок болдуруп шыдаар кижи бар бе?!»
14Дээрги-Чаяакчы, силерниң Камгалакчыңар,
Израильдиң ыдыктыг Бурганы: «Мен силер дээш
Вавилонга удур Бодумнуң холумну сунар мен;
халдейлерни чылча шаап, шуптузун дестириптер мен,
оларның алгы-кышкызы корабльдарны дола бээр ▼
▼ Бо домактың утказы эки билдинмес. Болгу дег өске утказы: «Мен ооң камгалалын чылча шавар мен. Халдейлерниң өөрүшкүлүг шимээн-даажы качыгдал ыры бооп хуула бээр».
.15Мен – Дээрги-Чаяакчы, ыдыктыг Бурганыңар мен,
Израильдиң Чаяакчызы, Хааныңар мен!» – дээн.
16– 17Дээрги-Чаяакчы далай кежир орукту ажыткан,
ханы сугларга орукту кылып каан k,
дайынчы тергелер биле аъттарны,
аг-шериг биле күштүг дайынчыларны эдертип аппарган.
Олар шупту кады кээп дүшкеш, туруп шыдавастаан,
чырыткы өзээ ышкаш өжүп калган.
Ам Дээрги-Чаяакчы мынча дээн:
18«Биеэде болган чүвени уттуптуп,
эрткен чүве дугайында бодавайн барып болур силер.
19Көрүңер, Мен чаа чүвени кылып тур мен! l
Ол ам көстүп кээр – таанда-ла ону билип ап шыдавас силер бе?
Бо удаада Мен ээн кургаг ховуда орук кылып,
ээн черже хемнер аксып тур мен m.
20Черлик аң-мең безин Мени алдаржыдар – шөө-бөрүлер, страус куштар.
Чүге дээрге Мен Бодумнуң шилип алган чонумга ижиртир дээш,
ээн кургаг ховуже суг, ээн черже – хемнер аксып тур мен n.
21Ол чонну Мен Бодумга, Мени алгап-мактазын дээш,
чаяап алган мен.
22А сен, Иаков, Мени кыйгырбайн турдуң,
Израиль, сен Мени аартыктап турдуң o.
23Сен Меңээ бүрүн өрттедир өргүл хойлары салбайн,
Мени алдаржыткан өргүлдер кылбайн турдуң.
Мен сени бергедетпедим – далган-тараа өргүлдери негеведим,
сени шылатпадым – чаагай чыттыг чүүлдер айтырбадым.
24Сен Меңээ чаагай чыттыг кулузун садып бербээн сен,
өргүл малдарының чаа-биле Мээң сеткилимни хандырбаан сен.
Харын Менче бодуңнуң бачыттарың чүдүрүп,
кем-бурууң-биле Мени шыладып турган сен p.
25Мен, чүгле Мен, Бодумну бодааш,
сээң кем-бурууңну балап каар мен q;
сээң бачыттарыңны оон ыңай сагынмас мен r.
26Мени буруудат, чаргылдажыыл s;
бодуңнуң херээңни чугаалап, актыыңны шынзыт.
27Сээң баштайгы өгбең бачыт үүлгеткен t,
сээң эптештирикчилериң Менче тура халаан u.
28Ынчангаш Мен ыдыктыг черде бараалгакчыларымны
бужартаашкынче чыгадым,
Иаковту бүрүнү-биле узуткаттырар кылдыр,
Израильди – дорамчылаттырар кылдыр хүлээдип бердим».
Copyright information for
TyvTUV