Isa 44 | TyvTUV | STEP | «А ам – Мени дыңна, Мээң чалчам Иаков , Мээң шилип алганым Израиль!

‏ Isaiah 44

Дээрги-Чаяакчыдан өске Бурган чок

1 «А ам – Мени дыңна, Мээң чалчам Иаков ^a, Мээң шилип алганым Израиль!
2 Сени чаяап каан, төрүттүнүп келгениңден бээр
сеңээ дузалап турар Дээрги-Чаяакчы мынча деп тур:
Мээң чалчам Иаков, Мээң шилип алганым Ешурун ^{▼▼ Ешурун – Израильдиң ойзу адаан ады. «Чөптүг-шынныг, мөзүзү эки» дээн уткалыг (Ы. х. к. 32:15; 33:5 көр).},
сен кортпа.
3 Мен кагып-суксаан черже сугну,
кургап калган черже – сугларны аксыр мен.
Бодумнуң Сүлдем-биле сээң үре-салгалыңны,
ачы-буяным-биле – ажы-төлүңнү бүргээр мен! ^c
4 Олар оът-сиген аразынга, суг эриинде чыраа-тал дег, өзер.
5 Бир кижи: „Мен Дээрги-Чаяакчыга хамааржыр мен“– дээр,
өске кижи: „Мен база Иаковтан укталган мен“– дээр.
Улус боттарының холдарынга ^{▼▼ Азы: «Боттарының холдары-биле».} „Дээрги-Чаяакчыныы мен“деп
бижип аар болгаш Израиль деп адаттырар».

6 Дээрги-Чаяакчы, Израильдиң Хааны, ооң Камгалакчызы,
Аг-шериглиг Дээрги-Чаяакчы мынча дээн: «Мен – эгезинде турган мен ^e,
Мен – төнчүзүнде турар мен;
Менден өске Бурган чок ^f.
7 Мээң-биле дөмейлежир кижи бар бе? Харыыдан берзин!
Эрте-бурунгу чонну чаяап каан үемден бээр болган
бүгү чүвени меңээ чугаалап берзин.
Келир үеде болур чүвени база чаа-ла кел чыдар чүвени чугаалап берзин.
8 Мээң улузум, кортпаңар, сүрээдевеңер!
Мен силерге эрте шагда-ла медеглевежик мен бе,
баш бурунгаар чугаалаважык мен бе?
Мээң херечилерим – силер болгай силер.
Менден өске Бурган бар бе?
Чок, өске кандыг-даа Хая билбес мен! ^g»

Дүрзү-бурганга мөгеер чорук – мелегей будулуушкун

9 Дүрзү-бурганнар кылып турар бүгү улус чүү-даа эвес-тир, оларның аажок үнелээр дүрзүлери кандыг-даа ажык-дуза чок ^h. Оларның ол херечилери чүнү-даа көрбес, чүнү-даа угаап билбес, ынчангаш бак атка кирер! 10 Кымнар кандыг-даа ажык-дуза чок бурганнар кылып, дүрзүлер шуткуп кудуп турарыл? ⁱ 11 Ол ажыл-херекке бердинген бүгү улус бак атка кирер. Ус-шевер улус дээрге чүгле кижилер-дир. Олар шупту чыглып келгеш, кады туруп алзын – дөгерези аажок коргарлар, бак атка кирерлер! ^j

12 Дарган кижи дүрзүнү хевирлээр херекселин туткаш, көс отчудуп, ажылдаар, маскалары-биле болбаазырадыр, бодунуң күштүг холу-биле дүрзүнү хевирлеп, иженир. Аштаанындан дарганның шаа төнер, суксаанындан чилчии үстүр. 13 Азы бызаңчы кижи дүрзүнү хемчээр хендирин шөер, шиш херексел-биле шыйып демдектээш, кескизи-биле чона кезип, төгериктей хемчээр. Ол бызаңчы дүрзүнү, ыдыктыг черже ^{▼▼ Азы: «Бодунуң бажыңынче».} салыр дээш, кижиниң овур-хевирин ёзугаар, кижи ышкаш чараш-каас кылдыр кылып каар. 14 Азы ол кижи бодунга пөш, шиви азы дуб ыяш шилип алгаш, ону үезинге чедир арга-эзиминге арттырып каар; азы ол кижи хады олуртуп каарга, чаъс ону өстүрүп бээр. Оон ол кижи ыяштарны кезип алгаш, 15 оттулар чүүл кылып аар – ооң чартыын чынныр дээш ап алгаш, от салып, хлевин быжырар. А оон аңгыда бурган кылып алгаш, ооң мурнунга доңгая кээп дүжер – дүрзү чазап алгаш, аңаа мөгеер. 16 Ыяштың чартыын ол өрттеткеш, аъш-чем белеткеп, эът быжыргаш, тоттур чемненип аар. Ол чылыккаш: «Чылыга бердим, от чырып тур» – дээр. 17 А арткан ыяштан ол дүрзү-бурганны оя кезип аар; оон аңаа мөгейип, ооң мурнунга доңгая кээп дүшкеш: «Мени камгала, сен дээрге мээң бурганым болгай сен!» – деп мөргүүр. 18 Ындыг улус чүнү-даа билбес, чүнү-даа угаап шыдавас ^l; олар дээрге карактарын шийдирип каан, көөр чүвези чок, угаанын дуглап каан улус-тур. 19 Оларның кайызы-даа боданмас, кайызы-даа чүвени шын билип алыр харыы-даа, угаан-сарыылы-даа чок болгаш, бодунга «Бо ыяштың чартык кезиин өрттеткеш, көзүнге хлеб быжырып, эът шиштеп чип алдым. А ооң артыындан чүдек-бужар дүрзү кылган херээм бар бе, токпар ыяшка мөгейген ажыым бар бе?» деп шыдавас. 20 Ындыг кижи анаа хүлдү сүрүп турар ^m, ооң угаан-сарыылы мегелеткен болгаш, ол будулуп турар. Ол бодунуң амы-тынын камгалап шыдавас, бодунга «Мээң холумда чүгле меге бар-дыр!» дивес.

21 «Иаков, ол бүгүнү утпа, чүге дээрге сен Мээң чалчам болгай сен, Израиль! ⁿ Сени Мен чаяап каан мен, сен – Мээң чалчам сен, Мен сени утпас мен ^{▼▼ Азы: «Сен Мени утпа».}, Израиль. 22 Мен сээң кем-бурууңну туман дег, бачыттарыңны – булуттар дег тарадып каапкан мен ^p. Сени садып хостап кагдым – Менче эглип кел!»

23 Дээрлер, Дээрги-Чаяакчының кылган чүвези дээш, өөрүп-байырлаңар, черниң ханы дүптери, өөрүшкүлүг алгыржыңар, даглар, арга-эзим болгаш бүгү ыяштар, шимээргеп байырлаңар! ^q Дээрги-Чаяакчы Иаковту садып хостаан-дыр, Израильди хостап кааш, алдаржаан-дыр! ^r

Кир хаан – Бурганның чепсээ

24 Сени ботталдырган Камгалакчың Дээрги-Чаяакчы мынча дээн:
«Мен – Дээрги-Чаяакчы, бүгүдениң Чаяакчызы мен,
дээрни чааскаан хере чаткан мен,
черни чаңгыс Бодум чада салган мен ^s.
25 Меге медээчилерниң бадыткал демдектерин чүү-даа эвес кылып,
төлгечилерни эпчок байдалга таварыштырып,
мерген угаанныг деп санаттырар улустуң билиин
утка чок чүве кылып турар мен ^t.
26 А Бодумнуң чалчамның медээлээн чүвезин ^u бадыткап,
Бодумнуң айбычыларымның чугаалаан чүвезин боттандырып турар мен.
Иерусалимниң дугайында: „Аңаа улус база катап чурттай бээр“– деп,
Иудеяның хоорайларының дугайында: „Оларны катап тудар!
Ол бузундуларны Мен катап тургузар мен!“– деп турар мен.

27 Ханы сугларга: „Када бериңер –
Мен силерни соолдурар мен!“– деп турар мен ^v.
28 Кир хаанның дугайында ^w: „Ол – Мээң айбылап чоруткан кадарчым-дыр.
Ол Мээң күзел-соруумну күүседип ^x,
Иерусалимниң дугайында: ‘Ону катап тудар!’ – деп,
Бурганның өргээзиниң дугайында: ‘Ону катап база үндезилеп тудар!’ – деп чугаалаар мен“».