Isa 47 | TyvTUV | STEP | «Күжүр Вавилон-кыс, дүжүлгеден дүшкеш , довуракка олуруп ал, черге олуруп ал – дүжүлгең ам чок-тур. Халдей чон, сээң дугайыңда моон соңгаар „Хоюг-чымчаан, шевергин чаражын!“дивес .

‏ Isaiah 47

Турамык Вавилоннуң буурааны

1 «Күжүр Вавилон-кыс, дүжүлгеден дүшкеш ^a, довуракка олуруп ал, черге олуруп ал – дүжүлгең ам чок-тур.
Халдей чон, сээң дугайыңда моон соңгаар
„Хоюг-чымчаан, шевергин чаражын!“дивес ^b.
2 Дээрбе даштары долгап, далгандан дээрбеле ^c;
баш шывар пөзүң уштуп каавыт,
хевиң эдээн өрү тыртып, буттарың чанагаштааш,
хемнерни сүзүп кеш.
3 Сээң шалдаңың ажыттынзын, бужарың көстүп келзин ^d.
Мен өжээн негээр мен – кымга-даа хайыра көргүспес мен ^{▼▼ Азы: «Кым-даа Меңээ шаптыктап шыдавас».}».

4 Бистиң Камгалакчывыс – Израильдиң ыдыктыг Бурганы,
Ооң ады – Аг-шериглиг Дээрги-Чаяакчы!

5 «Ыыт чок олур, дүмбей караңгыже чоруй бар, халдей чон;
сени моон соңгаар „Күрүнелерниң чагырыкчызы“деп адавас.
6 Мен Бодумнуң чонумга килеңней бердим,
Бодумнуң өнчүмнүң адын бакка суп, сээң холуңга хүлээдип бердим.
А сен оларга өршээл көргүспедиң,
кырганнарга безин аар дөңгү кедирип кагдың ^f.
7 Сен: „Кезээ мөңгеде чагырыкчы боор мен!“– дидиң ^g.
А ол бүгүнүң сөөлү кандыг боорун эргий бодавадың.

8 А ам дыңнап көр, таалал сүрген, айыыл чок чурттап турар,
„Мен кончуг мен, менден өске кым-даа чок.
Дулгуяк апарбас мен, ажы-төлүм чидирбес мен!“деп бодаар Вавилон-кыс! ^h
9 Ол-даа, өске-даа айыыл сени таварыыр –
хенертен, чаңгыс хүн дургузунда, ажы-төлүң-даа чидирер сен,
дулгуяк-даа апаар сен.
Хөй санныг караң көрнүүшкүн кылып турзуңза-даа,
илби-шидилиг сөстериң аажок күштүг-даа болза,
ол бүгүнү бүрүнү-биле көрүп эртер сен.
10 Сен коргуш чок бузут үүлгедип:
„Мени кым-даа көрбейн турар“– деп турдуң.
Мерген угааның биле эртем-билииң сени орууңдан астыктыра бээрге,
бодуңга: „Мен кончуг мен, менден өске кым-даа чок“– деп турар-дыр сен.
11 Айыыл-халап сени таварыыр –
ооң кайыын кээрин билип ^{▼▼ Бо сөстерниң утказы эки билдинмес. Болгу дег өске утказы мындыг: «Караң көрнүүшкүн-биле камгаланып».} шыдавас сен ^j;
хай-халап кырыңга кээр –
ону чайладыр аайын тыппас сен,
хенертен ооң дугайында безин бодавааның буураашкын сени таварыыр.

12 Ам канчаар, аныяаңдан мергежээниң
илби-шидилиг аргаларың ажыгла,
караң көрнүрүң улам көвүдет.
Бир-ле чүвени чедип аарың-даа чадавас,
чамдык кижилерни коргудуптарың-даа чадавас.
13 Хөй санныг чөвүлелдер чыыр дээш, могай бердиң.
Дээрни шинчилеп, сылдыстарны хайгаарап турар чурагачыларың
база ай чаазында салым-чолуңну баш бурунгаар чугаалап бээр улузуң келгеш,
болур ужурлуг чүведен сени камгалазын.
14 Олар тараа саваңы дег апаар, от оларны чиптер,
чалбыыштан боттарын безин камгалап ап шыдавас улус-тур ^k.
А ол от чыннып аар хире көстерлиг-даа эвес,
чанынга олуруп болгу дег-даа эвес ^l.
15 Кады ажылдап турган, аныяаңдан-на садыглажып чораан улузуң ындыг апаар.
Кайызы-даа бодунуң оруу-биле тарап чоруй баар,
кым-даа сени камгалавас».