‏ Isaiah 48

Бурган шупту чүвени баш бурунгаар билир

1– 2«Дыңнаңар, Иаковтуң салгалы, Израильдиң ады-биле адаттырган, Иудеядан келген улус!
Дээрги-Чаяакчының ады-биле даңгыраглаар силер,
Израильдиң Бурганын алгап-мактаар силер.
Боттарыңарга хамаарыштыр „Ыдыктыг хоорайның чурттакчылары бис“ ^a
база „Аг-шериглиг Дээрги-Чаяакчы деп аттыг
Израильдиң Бурганынга идегээр бис“дээр силер ^b,
ынчалза-даа Бурганга шынчы чоруктан,
чөптүг-шынныг чоруктан ырак силер.
3Мен болган чүвени баш бурунгаар чугааладым,
Мээң аксы-дылым ону чарлаан, Мен ону медеглээн мен,
оон хенертен бүгү чүве боттаны бээр кылып каан мен ^c.
4Силерниң чөрүүңерни – мойнуңарның сиирлери демирден,
хавааңар хүлерден бүткенин билир турган мен ^d.
5Ынчангаш Мен силерге баш бурунгаар,
бүгү чүве боттаныр бетинде, чугаалап каан мен,
ооң соонда „Бистиң дүрзү-бурганывыс ынчаар кылган,
бистиң бурганывыс, шуткумал дүрзүвүс
ынчаар болур кылдыр дужааган“– дивезиннер дээш ^e,
Мен силерге медеглеп каан мен.
6Силер ол бүгү дугайында дыңнадыңар,
ам көрүңер, бо ышкажыл!
Таанда-ла силер ону хүлээп көрбес силер бе?!

Амдан эгелээш, израиль чон, Мен сеңээ чаа чүве дугайында,
чажыт, сеңээ билдинмес турган чүве дугайында,
чугаалаар мен ^f.
7Ол чүүл эрте шагда эвес, ам чаа болуп турар-дыр,
амдыгаа чедир сен ол дугайында дыңнап көрбээн сен,
„Мен ону билир турдум“деп шыдавас сен.
8Ийе, сен дыңнаваан сен, билбес сен,
сээң кулааң шаг шаандан бээр хааглыг турган.
Кайы хире кара сагыштыыңны билир мен,
төрүттүнгеш-ле, үймээнчи деп адаттырдың.

9Бодумнуң адымны бодааш,
Мен килеңимни амдыызында өйлеп көрейн,
Бодумнуң алдарымны бодааш,
туттунуп, сени узуткаваайн.
10Көрем, Мен сени эзилдирип арыглап кагдым,
ынчалза-даа мөңгүн ышкаш эвес кылдыр;
сени хилинчек-човалаңның суугузунга шылгап көрдүм ^g.
11Мен Бодум дээш, Бодумну бодааш, ону кылып тур мен,
чүге дээрге Мээң адым канчап баксыраарыл? ^h
Мен Бодумнуң алдарымны кымга-даа бербес мен ⁱ.

12Иаков, Мени дыңна,
Мээң кыйгырып алганым Израиль, дыңна!
Бурган – Мен мен! Мен – эгезинде турган мен,
Мен – төнчүзүнде турар мен ^j.
13Мээң холум черни үндезилээн,
дээрни база Мээң күштүг холум хере чаткан ^k.
Оларны кыйгырыптарымга, мурнумга кээп туруптарлар.

14Бүгү улус, силер шупту чыглып келгеш, дыңнаңар!
Дүрзү-бурганнарыңарның кайызы ону баш бурунгаар чугаалааныл? ^l
Дээрги-Чаяакчының ынак кижизи
Ооң Вавилонга хамаарышкан күзел-соруун күүседир,
бодунуң күчү-күжүн халдейлерге удур угландырар ^m.
15Мен, чүгле Мен ону медеглээн мен,
ол кижини кыйгырган мен ⁿ.
Ону эккеп алдым, ол ам чедимчелиг болур.
16Менче чоокшулап келгеш, мону дыңнаңар!
Эң эгезинден-не Мен силерге ажыы-биле чугаалап келдим;
ол бүгү болуп эгелээн үеде-ле Мен бар турдум».

Израиль Вавилондан үнүп чоруй баар

Ам Аг-шериглиг Дээрги-Бурган-Чаяакчы
мени Бодунуң Сүлдези-биле айбылап чорудупту! ^o
17Сээң Камгалакчың, Дээрги-Чаяакчы,
Израильдиң ыдыктыг Бурганы мынча дээн:
«Мен – Дээрги-Чаяакчы мен, сээң Бурганың мен,
сеңээ ажыктыг болзун дээш сени сургап,
сээң чоруур ужурлуг орууңче сени башкарып турар мен.
18О, Мээң айтыышкыннарымны сен тооп дыңнаан болзуңза! ^p
Ынчан сээң чаагай чорууң хем ышкаш агар ийик,
чедимче сени далай чалгыы дег хөме аптар ийик.
19Сээң үре-салгалың элезин дег хөй боор ийик,
ажы-төлүң быйыргын элезин дег эңдерик боор ийик! ^q
Оларның ады арлып читпейн, узуткаттынмайн,
Мээң мурнумга артар ийик».

20Вавилондан чоруңар, халдей черден дүрген дезиңер! ^r
Бо медээни өөрүшкүлүг алгы-биле медээлеңер,
ол дугайында чарлаңар, чер-делегейниң ужу-кыдыынга чедириңер:
«Дээрги-Чаяакчы Бодунуң чалчазы Израильге хосталганы хайырлаан-дыр! ^s»
21Дээрги-Чаяакчы Бодунуң чонун
ээн кургаг хову кежир эдертип бар чыдырда,
олар кагып-суксаваан.
Ол хаядан сугну оларга аксып берген:
хаяны Ол оя кагарга, суг аттыгып үнген ^t.
22«А бузуттуг-бактарга чаагай чорук турбас!» – деп,
Дээрги-Чаяакчы чугаалаан.