Isa 49 | TyvTUV | STEP | Ортулуктарның чурттакчылары, мени дыңнаңар, ыракта чоннар, кичээнгейден салыңар! Дээрги-Чаяакчы мени төрүттүнүп кээрим мурнунда-ла кыйгырып алган . Ол мээң адымны иемниң иштинге турумда-ла, адап берген .

‏ Isaiah 49

Дээрги-Чаяакчының Бодунуң чалчазын кыйгырганы

1 Ортулуктарның чурттакчылары, мени дыңнаңар, ыракта чоннар, кичээнгейден салыңар!
Дээрги-Чаяакчы мени төрүттүнүп кээрим мурнунда-ла кыйгырып алган ^a.
Ол мээң адымны иемниң иштинге турумда-ла, адап берген ^b.
2 Ол мээң аксы-дылымны чидиг хылыш ышкаш кылып каан ^c,
мени Бодунуң холу-биле чаглактап алган.
Мени бажын чидидип каан согун кылдыр хуулдургаш,
Бодунуң саадаанче чажырып алган.

3 Ол меңээ: «Сен – Мээң чалчам Израиль сен,
сени дамчыштыр алдаржыыр мен» – дээн ^d.
4 А мен «Хей-ле чилчиим үзүлдүр ажылдаан-дыр мен,
күжүмнү хей черге, ажык чок чарыгдап каапкан-дыр мен» деп бодаан болгай мен.
Шынап-ла, мээң чаргымны Дээрги-Чаяакчы шиитпирлээр,
мээң шаңналым – Бурганымдан кээр!

5 Дээрги-Чаяакчы мени иемниң иштинге –
Бодунуң чалчазы болзун дээш, Иаковту Олче эгитсин дээш
база Израиль Ооң чоогунга чыглып келзин дээш – чаяап каан.
Мен Дээрги-Чаяакчының мурнунга алдар-аттыг мен,
Бурганым меңээ күчү-күштү хайырлаан.
6 Ам Дээрги-Чаяакчы: «Иаковтуң аймактарын катап тургузар болгаш
Израильдиң артынчызын дедир эгидер чалчам бооруң эвээш-тир.
Ооң кырынга, Мээң хайырлаан камгалалым
чер-делегейниң ужу-кыдыынга четсин дээш,
Мен сени бүгү чоннарга чырык кылып каар мен ^e» – деп чугаалаан.

7 Бүгү чоннарга бак көрдүрген, дорамчылаткан кижиге ^f,
чагырыкчыларының кулунга
Дээрги-Чаяакчы, Израильдиң ыдыктыг Камгалакчызы:
«Хааннар сени көргеш, туруп кээр,
нояннар сени көргеш, сөгүрүүр,
чүге дээрге сөзүнге шынчы Дээрги-Чаяакчы,
Израильдиң ыдыктыг Бурганы сени шилип алган-дыр» – дээн.

Израильдиң катап тургустунары

8 Дээрги-Чаяакчы мынча дээн:
«Таарымчалыг үеде сеңээ харыылаар мен,
камгалал хүнүнде дузалаар мен ^g.
Сени камгалап-карактап турар мен,
сени дамчыштыр улус-чон-биле керээ чарар мен ^h:
чуртту катап тургузар сен,
9 туттурган улуска: „Үнүңер!“– дээр сен,
дүмбей караңгыда олурар улуска: „Хостуг силер!“– дээр сен ⁱ.
Чонум оруктар кыйыынга оъттаар чер тып аар,
бүгү тас тейлер безин оларга одар-белчиир апаар.
10 Олар аштавас-даа, суксавас-даа,
дендии изиг хүнден-даа качыгдавас ^j.
Кээргей көрген Бурган оларны эдертип аппаргаш,
суг баштарынга чедире бээр ^k.
11 Мээң бүгү дагларымны орук кылып каар мен,
Мээң оруктарым бедиктерге шөйлүр».

12 Көрүңер, ырактан улус кел чыдыр –
бир чамдыызы соңгу чүктен, өскелери – барыын чүктен ^l,
база чамдыызы – Синим деп черден ^{▼▼ Синим чер – кандыг черни ынча деп турары билдинмес. Мурнуу Египет бооп чадавас.}.
13 Дээрлер, өөрүп-байырлаңар, чер-делегей, өөрүп-хөгле!
Даглар хөглүү-биле кыйгы салзын! ⁿ
Дээрги-Чаяакчы Бодунуң чонун аргалап каан-дыр ^o,
Бодунуң хилинчек көрген улузунче кээргел-биле көрген-дир.

14 А Сион: «Дээрги-Чаяакчы мени каапкан-дыр.
Дээрги мени уттупкан-дыр» – деп бодап турган ^p.

15 «Ие кижи бодунуң чаш төлүн уттур бе,
божуп алган төлүн кээргей бербес бе?
Херээжен кижи уттуптар болза безин,
Мен сени утпас мен! ^q
16 Мен сени Бодумнуң адыштарымда шыйып, демдеглеп алдым,
сээң ханаларың кезээде Мээң сагыжымда.
17 Сээң ажы-төлүң бээр далаш-биле кел чыдар,
а сени үреп бузуп, хоозураткан улус моон чоруп тур.
18 Долгандыр топтап көрүп көр:
сээң хамык чурттакчыларың чыылгаш, сенче чедип кел чыдар-дыр ^r.
Дириг Бодумнуң адым-биле даңгыраглап тур мен ^s:
сен оларның шуптузун, каасталга-шимелде дег, аяннанып кедип аар сен,
олар-биле, келин кыс дег, шиметтинип аар сен.

19 Сээң чериң ээнзиреп, кижи чок арткан,
сээң чуртуң хоозурап калган турган,
ынчалза-даа ам ол чер-чурт бодунуң чурттакчыларынга дакпыш апаар,
а сени сыырып турганнар чоруй баар ^t.
20 Биеэги ажы-төлүңнү чидирген сен,
ындыг-даа болза, ам-даа ажы-төлдүг болур сен.
Ол ажы-төлүң сеңээ: „Бо чер биске дыка дакпыш-тыр ^u.
Чурттап болгу дег черден биске берип көр“– дээр.
21 Сен ынчан „Оларны меңээ кым божуп берген чүвел?
Мен ажы-төлүмнү чидирдим, төл төрүвес апардым,
туттуруушкунга чурттап, аал-чурттан ыракка турдум.
Оларны кым өстүрүп кааныл?
Мен көңгүс чааскаан арткан болгай мен,
а олар кайыын келгенил?“деп боданыр сен».

22 Дээрги-Бурган-Чаяакчы: «Көр даан,
Мен чоннарга холум-биле демдек көргүзейн,
Бодумнуң тугумну аймактарга көдүрейн ^v –
олар сээң оолдарыңны кужактап алгаш, эккээр,
сээң кыстарыңны эктинге чүктеп эккээр ^w.
23 Хааннар сээң азыраан адаларың,
оларның кадыннары – азырадыкчыларың болур.
Олар сээң мурнуңга черге чедир доңгайып, сөгүрүүр
база сээң буттарың баарында довуракты пактаар! ^x
Сен ынчан Мени Дээрги-Чаяакчы деп
база Меңээ идегээр улустуң ады баксыравас деп
билип каар сен ^y» – дээн.

24 Күштүг дайынчының олча-тывыжын хунаап ап болур бе,
түрлүг ^{▼▼ Өске бурунгу сөзүглелде «чөптүг» деп бижээн.} кижиниң тудуп алган улузун хостап ап болур бе? ^aa
25 Дээрги-Чаяакчы мынча дээн: «Ийе,
күштүг дайынчының тудуп алган улузун адырып болур,
түрлүг кижиниң олча-тывыжы хосталыр.
Сээң удурланыкчыларыңга Мен удурланыр мен ^ab,
сээң ажы-төлүңнү Мен камгалаар мен!
26 Сени кызагдап турар улуска боттарының эът-бодун чиртир мен,
олар боттарының ханын ишкеш ^ac, арагадан дег, эзирип каар.
Бүгү улус Мени Дээрги-Чаяакчы деп,
сээң Камгалакчың, Хостакчың болгаш Иаковтуң күштүг Бурганы деп билип аар».