‏ Isaiah 5

Виноград шөлүнүң дугайында ыр

1Мен ынак Эжимге Ооң виноград шөлүнүң дугайында ырдан ырлап берейн.

Мээң Эжим дүжүткүр тейге виноград тарыыр шөлдүг турган ^a.
2Ол Бодунуң шөлүн коптарып каскаш, дажын аштааш,
виноград сыптары олуртуп каан.
Ол аңаа таңныылдар суургазы туткаш,
чимистен чулук сыскырар оңгар кылып каан.
Ол чаагай чимис манап турда, винограды багай чимис берген.
3Эжим мынча дээн: «Иерусалимниң чурттакчылары, Иудеяның чону,
силер ам виноградым шөлү-биле Мээң чаргымны чарып көрүңер.
4Виноград шөлүнге ам-даа чүнү кылып берип болур турган мен,
чүнү чедир кылбаан мен?
Чаагай чимис манап турумда, чүге ол багай чимис бергенил?
5Виноградым шөлүн канчаарымны силерге чугаалап берейн:
ооң херимин бузуп кааптарымга, ол хоозурап каар,
ооң ханазын үреп кааптарымга, ол таптай бастырар ^b.
6Мен ону ээн чер кылып каар мен, артык адырларын кеспес мен,
хөрзүнүн коптарбас мен, ону тенниг бок үнүш дуй үнер ^c.
Ынаар чаъс чагдырбас кылдыр булуттарга дужаар мен ^d».

7Аг-шериглиг Дээрги-Чаяакчының виноград шөлү – израиль чон-дур ^e,
Иудеяның чону – Ооң ынак сесерлии-дир.
Ол аңаа шынныг шииткел көрүксеп тургаш,
хан төгүүшкүнү көрүп каан,
чөптүг чорук көөрүнге идегеп тургаш,
күчүлелдиң алгы-кышкызын дыңнап каан.

Дээрги-Чаяакчы бузуттугларны шиидип, ат кылыр

8Чер кырында чааскаан чурттап турар чүве дег,
өске улуска хостуг чер арттырбайн,
бажыңга немей бажың, шөлге немей шөл ээлеп ап турар улус,
ат болур силер! ^f

9– 10Аг-шериглиг Дээрги-Чаяакчының:
«Хөй санныг бажыңнар ээнзирээр,
улуг каас-чараш бажыңнар чурттакчы чок артар.
Виноград шөлүнде он гектар чер чүгле чаңгыс көгээржик ишти арага бээр,
чашкан он шоодай ишти үрезин чаңгыс борбак хапчыгаш ишти дүжүт бээр» – деп даңгыраглаанын дыңнадым.

11Эртен эрте туруп келгеш, эзиртир суксун дилээр,
орай кежээ дүшкүже, арага куттунар улус ат болур! ^g
12Олар дээрге чадаган, чанзы, дамбыра болгаш лимби үнү дыңнап,
арага ижип, дойлаар, а Дээрги-Чаяакчының ажыл-херээн эскербес,
Ооң холу-биле кылган херектерин кичээнгейге албас улус-тур ^h.
13Ынчангаш мээң чонум билииниң четпезинден ⁱ дайзынга туттуруп алгаш,
хары черже чоруй баар, ооң алдар-аттыг улузу аштап өлүр, бай улузу ▼

▼ Азы: «Мөөң улузу».

кагып-суксаар.
14Өлүглер ораны алгып, аксын улгаттыр аазадыпкан ^k: алдар-аттыг,
бай улус*, хөглээн шуугакчылар ынаар кире бээр.

15Кижи амытан куду көрдүртүр, кижилер томаарыыр,
турамык улус бажын халайтыр ^l.
16А Аг-шериглиг Дээрги-Чаяакчы Бодунуң шынныг шииткели-биле
өндүр бедиин көргүзер,
ыдыктыг Бурган Бодунуң чөптүг чоруун дамчыштыр
Бодунуң ыдыктыын илередир.
17Хойлар бо хоорайга одарга-даа дег оъттаар,
хураганнар бо хоорайның бузундуларының аразындан чем дилээр.

18Мегениң хендирлери-биле бузут-бакты сөөртүп чоруур,
тергеге суктунуп алган дег, бачыт сөөртүр улус ат болур!
19«Бурган далажып, Бодунуң ажыл-херээн дүргедетсин –
бис ону көрүксеп тур бис;
Израильдиң ыдыктыг Бурганының бодалы бисче чоокшулап, чогуп бүтсүн ^m –
бис ону билип алыксап тур бис» – деп кыжырып чугаалаар улус ат болур!
20Бузутту буян деп, буянны бузут деп адаар,
дүмбейни чырык деп, чырыкты дүмбей деп санаар,
ажыг чүүлдү амданныг деп,
амданныг чүүлдү ажыг деп санаар улус ат болур! ⁿ
21Боттарының караанга мерген угаанныг бооп,
боттарының мурнунга угаан-сарыылдыг бооп көстүр улус ат болур! ^o
22Эрес-маадырлыы чүгле эңдере арага ижери-биле илерээр,
күш-шыдалы чүгле эзиртир суксун белеткээри-биле илерээр улус ат болур;
23хээли алгаш, буруулуг кижини агартыр,
а буруу чок кижиге шынныг шииткел үндүрбес кижи ат болур! ^p

24Ол бүгү дээш, ол улус от чиген тараа саваңы дег ^q,
чалбыыштың хүл кылып кааны сиген дег болур,
оларның дазылы ирип каар, чечээ довурак ышкаш эстеп тарай бээр.
Чүге дээрге олар Аг-шериглиг Дээрги-Чаяакчының хоойлузундан ойталап,
Израильдиң ыдыктыг Бурганының чугаазын тооваан-дыр.
25Ол дээш, Дээрги-Чаяакчының килеңи Ооң чонунче кыптыгар;
Ол Бодунуң холун оларже көдүрүп, эттеп-согар.
Даглар сирилей бээр ^r,
улустуң мөчү-сөөктери кудумчуларда өдек-бок дег чыдып бээр.
Ынчан безин Ооң килеңи чайлаттынмас,
Ооң холу ам-даа улусту кезедип, көдүрлүр! ^s

26Дээрги-Чаяакчы ыракта чоннарны кыйгырып, тук көдүрер ^t,
чер-делегейниң кыдыында чурттап турар улуска демдек берип, сыгырар.
Көрүңер, дайзын дүрген, божуу-шалып кел чыдыр!
27Дайзыннарның кайызы-даа могаг билбес, бергедевес,
кайызы-даа удумзурап, удуп калбас;
оларның белинде куру чештинмес, идииниң шидии үзүлбес!
28Оларның согуннары чидиг, чаларын хере тыртып каан;
оларның дайынчы тергелериниң дугуйлары казыргы дег! ^u
29Оларның алгы-кышкызы арзылаң алгызы-ла ^v,
олар араатан аң дег ырланыр;
олчазын сегирип алгаш, ырланып-ырланып, тудуп аппаар –
кым-даа камгалап шыдавас!
30Ол хүн кээрге, дайзыннар олчазын тудуп алгаш,
олче далай чалгыы мөөрээн дег алгыржыр.
Кандыг-бир кижи черже көргеш, дүмбей караңгы биле качыгдал көөр;
булуттар дуглаптарга, чырык безин бүлүртүң апаар ^w.